.jpg)
លោក កឹម សុខា លើកដៃលាអ្នកគាំទ្រពេលចេញពីសាលាដំបូងរាជធានីភ្នំពេញ នៅថ្ងៃទី ១៦ ខែមីនា។ ហុង មិនា
ភ្នំពេញៈ សហមេធាវីរបស់លោក កឹម សុខា ស្នើសុំចៅក្រមជំនុំជម្រះលើសំណុំរឿងលោក កឹម សុខា ប្រធានអតីតគណបក្សសង្គ្រោះជាតិ កុំពន្យារពេលសវនាការបន្តទៀត ក្រោយពីត្រូវបានពន្យារពេលចំនួន ២ លើកក្រោមហេតុផល តំណាងអយ្យការ ឬអ្នកផ្សេងមានវិជ្ជមានកូវីដ ១៩ ដោយលើកឡើងថា ការពន្យារពេលនេះ វានឹងធ្វើឱ្យមានការអូសបន្លាយពេលវេលាកាន់តែយូរ និងធ្វើឱ្យប៉ះពាល់ដល់សិទ្ធិជនជាប់ចោទ។
ក្រោយបញ្ចប់សវនាការពេញ ១ ព្រឹកនាថ្ងៃទី ១៦ ខែមីនា លោក អាង ឧត្តម សហមេធាវីលោក កឹម សុខា ប្រាប់ក្រុមអ្នកសារព័ត៌មាននៅខាងមុខសាលាដំបូងរាជធានីភ្នំពេញថា លោកបានលើកឡើងពីការកត់សម្គាល់ចំពោះសវនាការនាពេលកន្លងមក ជាពិសេសករណីលើកពេលសវនាការ ២ ដងចុងក្រោយនេះ ដែលមិនសមហេតុសមផល និងមិនត្រឹមត្រូវ ដោយសារតែ បុគ្គលម្នាក់មានវិជ្ជមានជំងឺកូវីដ ១៩ បែរជាផ្អាកសវនាការទាំងមូល ដែលនេះវាបានប៉ះពាល់ដល់សិទ្ធិរបស់ជនជាប់ចោទ ដែលត្រូវទទួលបានការកាត់ក្តីដោយឆាប់រហ័ស។
លោកបន្តថា ទោះជាយ៉ាងណាលោក ថា វិធានការសុខាភិបាល វាមិនធំជាងអនុសាសន៍របស់លោកនាយករដ្ឋមន្ត្រីនោះទេ ដែលលោក ហ៊ុន សែន ថា អ្នកណាមានវិជ្ជមាន ត្រូវយកអ្នកនោះទៅពេទ្យ ដើម្បីព្យាបាល ហើយអ្នកដទៃទៀត ដែលមិនមានវិជ្ជមានទេ គឺនៅតែបន្តធ្វើការ ហើយស្ថាប័ន គឺនៅតែមានដំណើរការដដែល។
លោកបានបញ្ជាក់ថា៖ «សហមេធាវីរបស់ខ្ញុំ ស្នើសុំកុំឱ្យករណីនេះបន្តកើតឡើងបន្ថែមទៀត ព្រោះថ្ងៃក្រោយអាចមានអ្នកផ្សេងទៀតជាក្រឡាបញ្ជី ចៅក្រម និងបុគ្គលិកនៅក្នុងសវនាការផ្សេងទៀតមានវិជ្ជមាន។ យើងមានសវនាការ ១ អាទិត្យ តែ ១ ព្រឹក និង ១ ព្រឹកបានតែ ៣ ម៉ោងទៀត មិនដូចលើកមុន (លើកមុនសវនាការ ៣ ដងក្នុង ១ សប្តាហ៍)»។
លោកបន្តថា សវនាការលើកនេះក៏បានផ្តោតលើសេចក្តីសន្និដ្ឋាន លើភ័ស្តុតាងបន្ថែមថ្មីចំនួន ២ ដែលភាគីតំណាងអយ្យការបានដាក់ជូនទៅតុលាការ ខណៈភ័ស្តុតាងទាំង ២ នេះ ក្រុមមេធាវីរបស់លោកបានពិភាក្សា ពន្យល់រួចរាល់ហើយកាលពីសវនាការមុនៗ។ ទោះជាយ៉ាងណា តុលាការបានអនុញ្ញាតឱ្យតំណាងអយ្យការធ្វើសេចក្តីសន្និដ្ឋាន និងច្រានចោលនូវភ័ស្តុតាងដែលក្រុមសហមេធាវីរបស់លោកបានដាក់មួយចំនួនដោយសំអាងថា គ្មានកាលបរិច្ឆេទច្បាស់លាស់។
បើតាមលោក អាង ឧត្តម ជាមួយគ្នានេះ សហមេធាវីរបស់លោកក៏បានស្នើសុំតុលាការច្រានចោលភ័ស្តុតាងថ្មីដែលតំណាងអយ្យការបានដាក់ ដោយសារវាខុសគោលការណ៍ច្បាប់ និងខុសនីតិវិធី ព្រោះតំណាងអយ្យការមិនអាចដាក់ភ័ស្តុតាងនៅគ្រប់ដំណាក់កាលបានទេ។
លោកថ្លែងថា៖ «មេធាវីយើង ដាក់ភ័ស្តុតាងថ្មី ដើម្បីបញ្ជាក់ គេសង្កត់ថា យើងមានភារកិច្ចដោះបន្ទុក ហើយគេដាក់ភ័ស្តុតាងថ្មីរបស់គេចំនួន ៧ ដើម្បីបញ្ជាក់លើភ័ស្តុតាងដែលយើងបានដាក់ចុងក្រោយចំនួន ២៨ ភ័ស្តុតាងថ្មី គេច្រានចោល។ នៅសប្តាហ៍ក្រោយថ្ងៃទី ២៣ មីនា តុលាការនឹងប្រកាសសាលដីកាទទួលយកភ័ស្តុតាងណាខ្លះ និងភ័ស្តុតាងណាខ្លះច្រានចោល»។
លោក ផ្លង់ សុផល អ្នកនាំពាក្យអយ្យការអមសាលាដំបូងរាជធានីភ្នំពេញប្រាប់ភ្នំពេញប៉ុស្តិ៍យ៉ាងខ្លីថា សវនាការលោក កឹម សុខា នៅថ្ងៃទី ២៦ ខែមីនា គឺបានប្រព្រឹត្តទៅជាធម្មតា ហើយសវនាការនឹងបន្តនៅថ្ងៃទី ២៣ ខែមីនាទៀត។
លោកស្រី ចក់ សុភាព នាយិកាមជ្ឈមណ្ឌលសិទ្ធិមនុស្សកម្ពុជា ដែលបានចូលរួមស្តាប់ និងតាមដាននៅក្នុងបន្ទប់សវនាការរបស់លោក កឹម សុខា បានកត់សម្គាល់ថា បញ្ហាពន្យារពេលដំណើរការក្តី និងហេតុផលឆ្លងកូវីដ ១៩ ត្រូវបានដេញដោលគ្នាដោយភាគីមេធាវីការពារក្តីរបស់លោក កឹម សុខា បានស្នើសុំតុលាការ គួរពិចារណា មិនពន្យារពេលសវនាការនាពេលខាងមុខទៀតដោយសារសវនាការតែ ១ ដងក្នុង ១ សប្តាហ៍ និងទទូចឱ្យមានការដាក់កាលវិភាគបន្ថែម ដែលកន្លងមក ធ្លាប់ដាក់រហូត ៣ ដងក្នុង ១ សប្តាហ៍ ហើយប្រការដែលបន្តអូសបន្លាយពេលវេលានៃការបើកសវនាការនោះ នឹងប៉ះពាល់សិទ្ធិរបស់កូនក្តីដែលត្រូវទទួលបានការជំនុំជម្រះដោយមិនពន្យារពេល។
លោកស្រីបន្តថា ទាំងចៅក្រម ព្រះរាជអាជ្ញា និងមេធាវីដើមបណ្តឹងបានអះអាងពីភាពចាំបាច់នៃការអនុលោមតាមវិធានសុខាភិបាល ដើម្បីទប់ស្កាត់ការរីករាលដាលជំងឺឆ្លងផង និងជាបទល្មើសផង បើមិនអនុលោមត្រឹមត្រូវ ដូចជាការតម្រូវឱ្យធ្វើចត្តាឡីស័កជាដើម ចំពោះអ្នកពាក់ព័ន្ធដែលធ្វើឱ្យត្រូវលើកពេលថ្មីៗនេះ ពេលមានករណីវិជ្ជមាន។ អយ្យការបានថ្លែងពីភាពចាំបាច់ផងដែរនៃសិទ្ធិទទួលបានការជំនុំជម្រះដោយយុត្តិធម៌ ដោយឥតពន្យារពេលរបស់ជនជាប់ចោទដទៃទៀត ជាពិសេសអ្នកដែលជាប់ឃុំក្រៅពីលោក កឹម សុខា ដូចនេះមិនអាចជំនុំជម្រះតែករណីលោក កឹម សុខា នោះទេ។
លោកស្រីថ្លែងថា៖ «ត្រង់ចំណុចនេះ ខ្ញុំយល់ស្របថា សិទ្ធិទទួលបានការជំនុំជម្រះដោយឥតពន្យារពេលរបស់ជនជាប់ចោទគ្រប់រូប គួរត្រូវបានធានា ប៉ុន្តែមិនគួរបន្ទុកត្រូវរងទៅជនជាប់ចោទណាម្នាក់ ដែលត្រូវដកហូតសិទ្ធិរបស់បុគ្គលនោះ ដើម្បីជនជាប់ចោទដទៃនោះទេ។ បន្ទុកគឺតុលាការត្រូវធានាពន្លឿនដំណើរការក្តីទាំងឡាយ ហើយចំណោទចំពោះការឃុំខ្លួនរង់ចាំសវនាការនោះ គឺជាអ្វីដែលតុលាការមិនគួរប្រើជាវិធានដំបូងនោះឡើយ ហើយគួរជាវិធានចុងក្រោយ និងចាំបាច់ខ្លាំងតែប៉ុណ្ណោះ»៕
វីដេអូ៖
