.jpg)
នគរបាលជំនាញបាញ់ទឹកពន្លត់ភ្លើងកំពុងឆេះផ្ទះល្វែង។ រូបថត នគរបាល
ភ្នំពេញៈ នៅព្រឹកថ្ងៃទី ១៦ ខែមីនា ឆ្នាំ ២០២២ មានអគ្គិភ័យឆាបឆេះផ្ទះល្វែងក្នុងបុរីជីបម៉ុង ក្នុងសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ បណ្ដាលឱ្យខូចខាតរថយន្តចំនួន ២ គ្រឿង និង ទ្រព្យសម្បត្តិមួយចំនួនធំ។ ប៉ុន្តែគ្មានពលរដ្ឋណាម្នាក់រងរបួស ឬស្លាប់នោះទេ។
លោក ព្រហ្ម យ៉ន ប្រធានការិយាល័យបង្ការពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញបានប្រាប់ភ្នំពេញប៉ុស្តិ៍ថា អគ្គិភ័យនេះ បានឆាបឆេះនៅវេលាម៉ោងប្រមាណ ៧ ព្រឹក។ គ្មាននរណាម្នាក់ស្នាក់នៅក្នុងផ្ទះល្វែងនោះទេ ប៉ុន្តែមានស្ដុកគ្រឿងសម្ភារសំណង់ ក្រដាសសែនកុងម៉ា និងគ្រឿងឧបករណ៍ សម្ភារអគ្គិសនីមួយចំនួនទៀត។
លោកបញ្ជាក់ថា៖ «ដោយបារម្ភពីការឆេះរាលកាន់តែខ្លាំង ក្រុមសមត្ថកិច្ចយើងបានសម្រេចទម្លាយកញ្ចក់ទ្វារផ្ទះហើយបាញ់ទឹកចូលទៅខាងក្នុង និងពីជាន់ខាងលើ ដើម្បីទប់អណ្ដាតភ្លើងកុំឱ្យរាលដាលបន្ត។ ទោះយ៉ាងណារថយន្ត ២ គ្រឿង និងទំនិញដែលបានស្តុកទុកនៅក្នុងអគារផ្ទះល្វែងនេះបានរងការខូចខាតស្ទើរទាំងស្រុង។ ប៉ុន្តែគ្មានអ្នករងរបួស ឬស្លាប់ឡើយ»។
លោកថា តាមការត្រួតពិនិត្យអង្កេតនៅកន្លែងកើតហេតុក្នុងជំហានដំបូងនេះ ក្រុមមន្ត្រីជំនាញបានសន្និដ្ឋានថា គ្រោះអគ្គិភ័យនេះ អាចបណ្ដាលមកពី «ការផ្ទុះឆ្លងចរន្តអគ្គិសនី» ប៉ុន្តែក្រុមការងារកំពុងបន្តការស្រាវជ្រាវលើករណីនេះបន្ថែមទៀត។
លោក សុខ ចាន់ អាយុ ៤២ ឆ្នាំ ប្រធានគ្រប់គ្រងផ្នែកលក់នៃក្រុមហ៊ុន Parts Station & Service Co.; Ltd បានប្រាប់ភ្នំពេញប៉ុស្តិ៍ថា ផ្ទះល្វែងដែលឆេះនោះ គឺជាកម្មសិទ្ធិរបស់កញ្ញា ប៊ូ នីកា ក្មួយម្ចាស់ក្រុមហ៊ុន Parts Station & Service Co.; Ltd។ ផ្ទះនេះមានទីតាំងស្ថិតនៅជាប់ជញ្ជាំងគ្នាជាមួយហាងលក់ទំនិញរបស់ក្រុមហ៊ុន និងមានស្ដុកទំនិញជាច្រើនប្រភេទ ដែលភាគច្រើនជាគ្រឿងសម្ភារសំណង់ ក្រដាសសែនកុងម៉ា និងគ្រឿងឧបករណ៍ សម្ភារអគ្គិសនី។
លោក ចាន់ ថា៖ «ខ្ញុំមិនដឹងថា អគ្គិភ័យនេះបង្កឡើងពីមូលហេតុអ្វីឱ្យពិតប្រាកដទេ ព្រោះគ្មាននរណាម្នាក់ស្នាក់នៅក្នុងផ្ទះហ្នឹងទេ។ នៅពេលដែលយើងខ្ញុំមកដល់កន្លែងធ្វើការ ក៏ស្រាប់តែឃើញអគ្គិភ័យឆាបឆេះជាអណ្ដាតភ្លើងយ៉ាងពេញបន្ទុក និងឆាបចេញមកក្រៅ ឆេះរថយន្តចំនួន ២ គ្រឿង ដែលចតនៅខាងមុខផ្ទះ»។
លោក ចាន់ ថា នៅពេលនេះកញ្ញា ប៊ូ នីកា នៅមិនទាន់អាចប៉ាន់ប្រមាណអំពីការខូចខាតសរុបគិតជាទឹកប្រាក់អស់ប៉ុន្មាននៅឡើយនោះទេ ដោយគល់បញ្ជីនៃមុខទំនិញត្រូវបានឆេះអស់ទៅហើយ។ ក្រុមសមត្ថកិច្ចបានប្រើប្រាស់រថយន្តពន្លត់អគ្គិភ័យចំនួន ១៦ គ្រឿង ដោយប្រើរយៈពេលជាង ២ ម៉ោង៕
វីដេអូ៖
