.jpg)
អ្នកដំណើរម្នាក់ធ្វើដំណើរឆ្លងកាត់ អគារ គ.ជ.ប។ ហេង ជីវ័ន
ភ្នំពេញៈ គណៈកម្មការជាតិរៀបចំការបោះឆ្នោត (គ.ជ.ប) បានទទួលបណ្តឹងសរុបចំនួន ១៦៦ បណ្តឹងដែលភាគច្រើនជាបណ្ដឹងរបស់ប្រជាពលរដ្ឋប្ដឹងពាក់ព័ន្ធជាមួយបេក្ខជនឈរឈ្មោះរបស់គណបក្សភ្លើងទៀនដែលមិនចេះអក្សរ ក្រោយពីមានការបិទផ្សាយបញ្ជីបេក្ខជនឈរឈ្មោះដំបូងរបស់គណបក្សនយោបាយសម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី ៥ ដែលនឹងប្រព្រឹត្តទៅនៅថ្ងៃទី ៥ ខែមិថុនា ឆ្នាំ ២០២២។
លោក សោម សូរីដា អ្នកនាំពាក្យ គ.ជ.ប ប្រាប់ភ្នំពេញប៉ុស្តិ៍នៅថ្ងៃទី ១៦ ខែមីនានេះ ថា គណៈកម្មការឃុំ សង្កាត់រៀបចំការបោះឆ្នោត គណៈកម្មការរាជធានី ខេត្តរៀបចំការបោះឆ្នោត និងគណៈកម្មាធិការជាតិរៀបចំការបោះឆ្នោត ទទួលបានបណ្តឹងសរុបទាំងអស់ ១៦៦ បណ្តឹង ដោយនៅក្នុងនោះ ១៤៦ បណ្តឹងត្រូវបានប្តឹងនៅគណៈកម្មការឃុំ សង្កាត់រៀបចំការបោះឆ្នោត ប៉ុន្តែ ១៤៤ បណ្តឹងត្រូវបានបដិសេធ ពាក់ព័ន្ធនឹងមិនឈរឈ្មោះរបស់បេក្ខជន។ ចំពោះ ២ បណ្តឹងទៀតពាក់ព័ន្ធការផ្តន្ទាទោសមន្ត្រី គណៈកម្មការឃុំ-សង្កាត់រៀបចំការបោះឆ្នោត ប៉ុន្តែត្រូវបានធ្វើលិខិតរដ្ឋបាលបដិសេធការប្តឹងនោះ។
លោកបន្តថា ជាមួយគ្នានេះ នៅគណៈកម្មការរាជធានីខេត្តរៀបចំការបោះឆ្នោតទទួលបានចំនួន ៧ បណ្តឹង ដោយក្នុងនោះបានប្តឹងផ្តន្ទាទោស សមាសភាពគណៈកម្មការឃុំ-សង្កាត់រៀបចំការបោះឆ្នោត ២ បណ្តឹង និង ៥ បណ្តឹងទៀត ករណីប្តឹងតវ៉ា ការបដិសេធសុំចុះបញ្ជីបេក្ខជនឈរឈ្មោះនៃគណបក្សនយោបាយពាក់ព័ន្ធនឹងគណៈកម្មការឃុំសង្កាត់រៀបចំការបោះឆ្នោត បដិសេធមិន ចុះបញ្ជីបេក្ខជនគណបក្សនយោបាយ។ ដូច្នេះ គណបក្សនយោបាយមានសិទ្ធិប្តឹងមកគណៈកម្មការរាជធានី ខេត្តរៀបចំការបោះឆ្នោត។
បើតាមលោក សោម សូរីដា ចំណែក គ.ជ.ប ទទួលបានបណ្តឹងសរុបចំនួន ១៤ បណ្តឹង ដោយក្នុងនោះ ១៣ បណ្តឹងពាក់ព័ន្ធនឹងបញ្ជីបេក្ខជនដំបូង និង ១ បណ្តឹង ប្តឹងបន្តពីគណៈកម្មការរាជធានី ខេត្តរៀបចំការបោះឆ្នោត ប្តឹងឱ្យមានការផ្តន្ទាទោសមន្ត្រី គណៈកម្មការឃុំ សង្កាត់រៀបចំការបោះឆ្នោត។ ជាមួយគ្នានេះ គ.ជ.ប ទើបតែបើកសវនាការលើកដំបូង ដើម្បីដោះស្រាយលើបណ្តឹងប្រជាពលរដ្ឋពាក់ព័ន្ធនឹងបញ្ជីបេក្ខជនឈរឈ្មោះបោះឆ្នោតដំបូងនៅខេត្តកោះកុង។
លោកថ្លែងថា៖ «ករណីនៅខេត្តកោះកុងនេះ គ.ជ.ប បានសម្រេចលុបឈ្មោះ បេក្ខជនចំនួន ៤ រូប និងរក្សាឈ្មោះ ១ រូបទេ មកពីគណបក្សភ្លើងទៀន ដោយការប្តឹងនេះពាក់ព័ន្ធនឹងការចោទប្រកាន់បេក្ខជនមិនចេះអាន និងមិនចេះសរសេរអក្សរខ្មែរ។ ចាប់ពី (ថ្ងៃទី ១៨ មីនា) នឹងបន្តបើកសវនាការ និងដោះស្រាយបណ្តឹងបេក្ខជនលើកដំបូងទៀត។ បណ្តឹងទាំងអស់ភាគច្រើនពាក់ព័ន្ធនឹងគណបក្សភ្លើងទៀន»។
លោក ថាច់ សេដ្ឋា អនុប្រធានគណបក្សភ្លើងទៀន ប្រាប់ភ្នំពេញប៉ុស្តិ៍នៅថ្ងៃទី ១៦ ខែមីនាថា គណបក្សភ្លើងទៀនបានដាក់បេក្ខជនឈរឈ្មោះបោះឆ្នោតច្រើនជាងគេនៅគ្រប់ ឃុំ សង្កាត់នៅទូទាំងប្រទេស បន្ទាប់ពីគណបក្សប្រជាជនកម្ពុជា ដែលនេះបានធ្វើឱ្យមានការជួបនូវបញ្ហាជាច្រើន ជាពិសេសមានការគំរាមកំហែងមកលើបេក្ខជនឈរឈ្មោះឱ្យគណបក្ស។ លោកថ្លែងថា៖ «បើយើងពិនិត្យទៅបើបេក្ខជនរបស់យើង បើមិនមានលក្ខណៈគ្រប់គ្រាន់ ដូចជាមិនចេះអក្សរ ឬ មិនចេះអាន យើងត្រៀមផ្លាស់ប្តូរ ប៉ុន្តែក្នុងករណីណាដែលស្រាវជ្រាវនិងពិនិត្យ វាមិន ដូចជាការសម្រេចរបស់ គ.ជ.ប យើងបន្តប្តឹងទៀត ដើម្បីទទួលបានភាពយុត្តិធម៌»។ គ.ជ.ប ការចុះបញ្ជីបេក្ខជននៃគណបក្សនយោបាយឈរឈ្មោះបោះឆ្នោតកាលពីដើមខែមីនា មានគណបក្សនយោបាយចំនួន ១៧ បានចុះបញ្ជី ដែលបេក្ខជនសរុបចំនួន ៨៤ ២០៨ រូបក្នុងនោះស្ត្រីសរុបចំនួន ២៦ ៥៨៤ រូប៕
វីដេអូ៖
