.jpg)
បុរសម្នាក់ត្រូវបញ្ជូនទៅតុលាការ រឿងហិង្សាឱ្យក្មេងស្លាប់។ រូបថត ហ្វេសប៊ុក
បន្ទាយមានជ័យៈ នគរបាលព្រហ្មណ្ឌខេត្តបន្ទាយមានជ័យនៅថ្ងៃទី ១៦ មីនា កំពុងរៀបចំសំណុំរឿងបញ្ជូនបុរសម្នាក់ទៅតុលាការខេត្ត បន្ទាប់ពីចាប់ខ្លួនបាន ១ ថ្ងៃករណីវាយម្តាយ តែត្រូវកូនស្រីអាយុ ១ ខួប ៩ ខែស្លាប់ប្រព្រឹត្តនៅភូមិប្រាសាទត្បែង ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ កាលពីថ្ងៃទី ១៥ មីនា។
លោក នូ ជីវ័ន្ត ស្នងការរងទទួលផែនការងារនគរបាលព្រហ្មទណ្ឌនៃស្នងការដ្ឋាននគរបាលខេត្តបន្ទាយមានជ័យបានឱ្យដឹងនៅថ្ងៃទី ១៦ មីនាថា ជនសង្ស័យឈ្មោះ បូ ធំ អាយុ ២៨ ឆ្នាំ ហើយកំពុងត្រូវបានសមត្ថកិច្ចជំនាញរបស់លោករៀបចំកសាងសំណុំរឿងបញ្ជូនទៅសាលាដំបូងខេត្តបន្ទាយមានជ័យ។
លោកថ្លែងថា៖ «ជនសង្ស័យទើបបញ្ជូនមកពីស្រុកហើយនៅ (ថ្ងៃទី ១៦ មីនា)សមត្ថកិច្ចជំនាញរបស់ខ្ញុំកំពុងសាកសួរជនសង្ស័យបន្តទៀត។ យើងកំពុងរៀបចំនីតិវិធីកសាងសំណុំរឿងបញ្ជូនគាត់ទៅតុលាការ»។
លោកបន្តថា បើតាមរបាយការណ៍របស់នគរបាលស្រុកថ្មពួកបង្ហាញថា នៅវេលាម៉ោងប្រមាណជា ២ ជិតភ្លឺ ថ្ងៃទី ១៥ មីនា ជនសង្ស័យបានឈ្លោះគ្នាជាមួយប្រពន្ធ ហើយនៅពេលឈ្លោះគ្នានោះប្រពន្ធរបស់ជនសង្ស័យបានវាយតដៃជាមួយប្តី។ នៅពេលនោះជនសង្ស័យប្រហែលជាខឹងខ្លាំងក៏យកកៅអីជ័រវាយប្រពន្ធតែវាយប្រពន្ធខុសក៏មកត្រូវចំសៀតផ្កាកូនស្រីបណ្តាលឱ្យរបួសធ្ងន់ហើយត្រូវបានក្រុមគ្រួសារខាងប្រពន្ធដឹកទៅសង្គ្រោះនៅមន្ទីរពេទ្យតែបានដាច់ខ្យល់ស្លាប់ បន្ទាប់ពីដល់មន្ទីរពេទ្យ។
លោក ហ៊ិប សាមៀត ជាមេភូមិ ប្រសាទត្បែងបានប្រាប់នៅថ្ងៃទី ១៦ មីនាថា គ្រួសារមួយនេះទើបតែមានកូនស្រីម្នាក់ឈ្មោះ ធំ ស្រីនី អាយុ ១ ខួប ៩ ខែ ជនសង្ស័យបានដើរស៊ីឈ្នួលលីសែងឱ្យគេ ដើម្បីយកលុយមកផ្គត់ផ្គង់ជីវភាព។ ជនសង្ស័យក៏ជាមនុស្សញៀនស្រាផងដែរ៕
