សៀមរាបៈ ស្នងការដ្ឋាននគរបាលខេត្តសៀមរាប បំពាក់បំពង់ពន្លត់អគ្គិភ័យចំនួន ១៤ បំពង់ នៅតាមម៉ូតូចល័តចំនួន ៧ គ្រឿង ដែលមន្ត្រីនគរបាលចរាចរណ៍ប្រើប្រាស់សម្រាប់ល្បាត និងប្រចាំការនៅតាមគោលដៅ។ ការបំពាក់នេះដើម្បីបង្ការ និងជួយសង្គ្រោះបឋមពេលមានអគ្គិភ័យកើតឡើង។
លោក សោម វីរៈ ប្រធានការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តសៀមរាប ថ្លែងនៅថ្ងៃទី ១៦ ខែមីនាថា ក្នុងពេលកន្លងមកធ្លាប់មានករណីគ្រោះថ្នាក់ចរាចរណ៍ ដែលរថយន្តបុកគ្នាបណ្តាលឱ្យមានអគ្គិភ័យ មានការឆេះតូបអាហារ និងមានអគ្គិភ័យទ្រង់ទ្រាយតូចកើតឡើងផ្សេងៗមួយចំនួនទៀត ដែលមន្ត្រីចរាចរណ៍បានទៅដល់មុន ប៉ុន្តែមិនមានវិធីក្នុងការជួយ ក្រៅពីការសម្រួលចរាចរណ៍នោះ ទើបមានការបំពាក់បំពង់ពន្លត់អគ្គិភ័យនេះដើម្បីបានជួយសង្គ្រោះបឋមកុំឱ្យមានការឆេះរីករាលដាលខ្លាំង។
លោកប្រធានការិយាល័យនគរបាលចរាចរណ៍ផ្លូវគោក ប្រាប់ថា ការបំពាក់បំពង់ពន្លត់អគ្គិភ័យនេះទើបធ្វើឡើងជាលើកដំបូង ដែលមានចំនួន ១៤ បំពង់ បំពាក់លើម៉ូតូសមត្ថកិច្ចនគរបាលចរាចរណ៍ផ្លូវគោកចំនួន ៧ គ្រឿង ក្នុង ១ គ្រឿង បំពាក់ ២ បំពង់ ហើយប្រតិបត្តិការនេះធ្វើឡើងសម្រាប់តែក្នុងក្រុងសៀមរាបប៉ុណ្ណោះ។
លោកថ្លែងថា៖ «ប៉ូលិសចរាចរណ៍តែងទៅដល់គោលដៅមុន ហើយប៉ូលិសចរាចរណ៍ច្រើនតែនៅតាមគោលដៅគ្រប់ទីកន្លែងផង អ៊ីចឹងការបំពាក់នៅលើម៉ូតូប៉ូលិសចរាចរណ៍ជារឿងល្អមួយ។ នៅពេលដែលទទួលព័ត៌មាន ពេលភ្លើងទើបតែចាប់ផ្តើមឆេះ យើងទៅដល់ទាន់ពេលវេលា យើងអាចធ្វើការពន្លត់ជួយសង្គ្រោះបាន មិនឱ្យរាលដាលធ្ងន់ធ្ងរ»។
លោក សោម វីរៈ បានឱ្យដឹងទៀតថា បំពង់ពន្លត់អគ្គិភ័យនេះទៀតសោត គឺជារបស់ស្ថាប័នស្នងការដ្ឋាននគរបាលខេត្តសៀមរាប និងកើតចេញពីគំនិតផ្តួចផ្តើមរបស់លោកស្នងការផ្ទាល់ មិនមែនជំនួយពីខាងណាឡើយ ប៉ុន្តែទៅថ្ងៃក្រោយបើមានសប្បុរសជនជួយផ្តល់បំពង់ពន្លត់អគ្គិភ័យនោះ មន្ត្រីនគរបាលនឹងពង្រីកការបំពាក់បន្ថែមទៅតាមអធិការដ្ឋាននគរបាលតាមស្រុកផ្សេងៗទៀតផងដែរ។ ដើម្បីឱ្យមន្ត្រីនគរបាលចរាចរណ៍ ចេះប្រើប្រាស់បំពង់ពន្លត់អគ្គិភ័យបានត្រឹមត្រូវតាមបច្ចេកទេស នៅថ្ងៃទី ១៥ ខែមីនា មន្ត្រីជំនាញការិយាល័យ នគរបាលបង្ការ ពន្លត់អគ្គិភ័យ និង សង្គ្រោះនៃស្នងការដ្ឋាននគរបាលខេត្តសៀមរាបបានធ្វើការបង្ហាត់បង្រៀនអំពីរបៀបរក្សាទុកបំពង់ពន្លត់អគ្គិភ័យ និងរបៀបប្រើប្រាស់ឱ្យបានត្រឹមត្រូវតាមលក្ខណៈបច្ចេកទេសដោយបានធ្វើការហាត់សមជាក់ស្តែង។
លោកថ្លែងថា៖ «យើងជាប៉ូលិសចរាចរណ៍ យើងដឹងហើយខ្លះៗ ប៉ុន្តែវាមិនត្រឹមត្រូវតាមលក្ខណៈបច្ចេកទេស ដូច្នេះហើយទើបយើងបានអញ្ជើញគាត់ដើម្បីមកធ្វើបទបង្ហាញដោយយើងធ្វើបានរួចរាល់ហើយ ឥឡូវចាប់ផ្តើមដំណើរការ ដោយម៉ូតូហ្នឹងយើងដាក់នៅតាមគោលដៅ បើសិនជាមានបញ្ហាអី គឺយើងទៅប្រើតែម្តង» ។
លោក រិន ដាវេត ប្រជាពលរដ្ឋម្នាក់នៅក្រុងសៀមរាបបានឱ្យដឹងនៅថ្ងៃទី ១៦ ខែមីនាថា នេះជារឿងល្អមួយគួរតែគាំទ្រ ព្រោះបើសិនជាមានហានិភ័យបន្ទាន់អ្វីមួយកើតឡើង ដោយសារអគ្គិភ័យ អាចនឹងជួយសង្គ្រោះបានទាន់ពេល។ លោកថ្លែងថា៖ «ផ្ទះខ្លះផ្ទុះកំប៉ុងហ្គាសតូចៗហ្នឹងក៏អាចបង្កជាអគ្គិភ័យរហូតឆេះផ្ទះ និងរាលដាលខ្លាំងដល់ផ្ទះអ្នកជិតខាងក៏មានដែរ អ៊ីចឹងខ្ញុំគិតថា ការពន្លត់ហេតុតិចតួចដំបូងហ្នឹងសំខាន់ណាស់ ហើយមានតែប៉ូលិសចរាចរណ៍ទេមកដល់មុនគេ អ៊ីចឹងបើគាត់មានបំពង់ហ្នឹងគាត់អាចជួយបាន»៕