ព្រះវិហារៈ ប្រជាពលរដ្ឋដែលមានវិវាទដីធ្លីចំនួន ៧ សហគមន៍បានអះអាងថា អាជ្ញាធរខេត្តព្រះវិហារបានរារាំងពួកគាត់ មិនឱ្យឡើងទៅដាក់ញត្តិនៅសាលាខេត្តព្រះវិហារ ប៉ុន្តែអាជ្ញាធរបានបដិសេធការអះអាងនេះ ខណៈដែលមន្ត្រីបានចុះទៅទទួលយកញត្តិពីប្រជាពលរដ្ឋទាំង ៧ សហគមន៍នៅពាក់កណ្តាលផ្លូវ។
កាលពីថ្ងៃទី ១៥ មីនា ពលរដ្ឋរងគ្រោះដីធ្លីចំនួន ៧ សហគមន៍ ដែលមានគ្នាប្រមាណជាង ២០០ នាក់ បានចេញពីភូមិរៀងៗខ្លួនក្នុងគោលបំណងទៅដាក់ញត្តិនៅសាលាខេត្តព្រះវិហារ ដើម្បីស្នើសុំអភិបាលខេត្តនេះ កាត់ឆ្វៀលដីជូនពួកគាត់។
ប៉ុន្តែការធ្វើដំណើររបស់ពួកគេមិនបានដល់គោលដៅនោះទេ គឺត្រូវបានអាជ្ញាធរស្រុកត្បែងមានជ័យ ខេត្តព្រះវិហារ ធ្វើការរារាំងនៅតាមបណ្តោយផ្លូវជាតិលេខ ៩ ដោយមិនអនុញ្ញាតឱ្យពលរដ្ឋបន្តដំណើរទៅមុខនោះទេ ដោយចាត់ឱ្យមន្ត្រីសាលាខេត្តចុះមកទទួលញត្តិដោយផ្ទាល់វិញ។ នេះបើតាមលោក សឿន ថា ប្រធានសហគមន៍ភូមិបុស្សការពារដីធ្លីប្រើសក្អក។
លោក សឿន ថា បានប្រាប់ភ្នំពេញប៉ុស្តិ៍នៅថ្ងៃទី ១៥ មីនាថា សហគមន៍ទាំង ៧ នេះ គឺមានវិវាទដីធ្លីខុសៗគ្នាជាមួយភាគីពាក់ព័ន្ធ ហើយចំណុចរួមដែលប្រជាសហគមន៍រួមគ្នាដាក់ញត្តិនេះគឺចង់ស្នើសុំឱ្យមានដំណោះស្រាយបញ្ហាដីធ្លី ដោយការកាត់ឆ្វៀលដីជូនពលរដ្ឋតាមស្ថានភាពជាក់ស្តែង។
លោកបញ្ជាក់ថា៖ «ពួកគាត់ បានរារាំងពួកខ្ញុំហើយដាក់កម្លាំងច្រើនមែនទែនមិនឱ្យពួកខ្ញុំបន្តដំណើរទៅសាលាខេត្តទេ។ អាជ្ញាធរគេហាមយើងមិនឱ្យទៅទាំងអស់គ្នាទេ បើសិនជាយើងចង់ទៅគឺគេឱ្យយើងទៅតែ ៥ នាក់ចុះក្រោមទេបើទៅទាំងអស់គ្នាច្រើនបែបនេះគឺគេមិនអនុញ្ញាតទេ»។
លោក អុំ អោនប្រជាសហគមន៍ប្រើសក្អកដែលចូលរួមការឡើងមកដាក់ញត្តិដែរនោះបានសម្តែងការអន់ចិត្តជាខ្លាំងដែលអាជ្ញាធរមិនអនុញ្ញាតឱ្យពួកគាត់បានឡើងទៅដាក់ញត្តិនៅសាលាខេត្ត ខណៈការរារាំងនេះគឺបានបិទសិទ្ធិសេរីភាពរបស់គាត់ក្នុងនាមជាពលរដ្ឋ។ លោករៀបរាប់ថា៖ «ការឃាត់ដំណើរពួកខ្ញុំនេះគឺមិនមែនសម្រួលនោះទេគឺគំរាមតែម្តង ពីព្រោះប៉ូលិសមកដកទូរស័ព្ទមកដកឧបករណ៍ពួកខ្ញុំអស់ទៀតទម្រាំតែមានគេចេញមកអះអាងថា មានអ្នកមកទទួលញត្តិពីពួកខ្ញុំ។ ខ្ញុំមិនដឹងថា ញត្តិដែលពួកខ្ញុំដាក់នេះមានដំណោះស្រាយយ៉ាងណាទេតែពួកខ្ញុំនឹងបន្តការទាមទារទៀតក្នុងពេលខាងមុខ»។
លោក នួន សុវិរិទ្ធ ស្នងការរង នគរបាលខេត្តព្រះវិហារបានប្រាប់ភ្នំពេញប៉ុស្តិ៍នៅថ្ងៃទី ១៥ មីនាថា ការដែលអាជ្ញាធរសុំឱ្យពលរដ្ឋឈប់នៅពាក់កណ្តាលផ្លូវនេះ គឺមិនមែនជាការរារាំង ឬបិទសិទ្ធិសេរីភាពពលរដ្ឋនោះទេ។ លោកបន្តថា ដោយសារតែអាជ្ញាធរមិនចង់ឱ្យពលរដ្ឋធ្វើដំណើរផ្លូវឆ្ងាយទើបអាជ្ញាធរខេត្តចាត់ឱ្យមន្ត្រីចុះទៅទទួលញត្តិដល់ពាក់កណ្តាលផ្លូវយ៉ាងដូច្នេះ។
លោកបញ្ជាក់ថា៖ «ទទួលបានព័ត៌មានពីណាថា យើងរារាំងហ្នឹង? មានអ្នកណារារាំងគាត់ គឺយើងចង់ជួបគាត់ ហើយមិនចង់ឱ្យគាត់បន្តដំណើរទៅឆ្ងាយទៀត ទើបយើងជួបគាត់នៅកន្លែងហ្នឹង ដោះស្រាយភ្លាមៗឱ្យពួកគាត់។ យើងទទួលញត្តិ និងសំណូមពរពីពួកគាត់ទាំង ៧ សហគមន៍»។ ជាមួយនឹងការអះអាងនេះ លោក នួន សុវិរិទ្ធ ឱ្យដឹងថា អភិបាលរងខេត្ត និងមន្ត្រីពាក់ព័ន្ធដែលបានទទួលញត្តិពីប្រជាសហគមន៍ទាំង ៧ នឹងពិនិត្យទៅលើការស្នើសុំរបស់ពលរដ្ឋ ហើយលទ្ធផលយ៉ាងណានោះនឹងមានការឆ្លើយតបនៅពេលក្រោយ។
លោក ថេង សាវឿនប្រធានសម្ព័ន្ធសហគមន៍កសិករកម្ពុជា (CCFC) ដែលឃ្លាំមើលករណីនេះយល់ថា អាជ្ញាធរគួរតែផ្តល់ដំណោះស្រាយជូនពលរដ្ឋឱ្យ បានដាច់ស្រេច និងសមស្រប ដើម្បីឱ្យពលរដ្ឋមានឱកាស និងចាប់ផ្តើមប្រើប្រាស់ដីធ្លីដើម្បីបង្កបង្កើនផល។
សូមជម្រាបថា ប្រជាពលរដ្ឋទាំងជាង ២០០ នាក់នេះ គឺមកពីសហគមន៍ឫស្សីស្រុក សហគមន៍ដីធ្លីអូររំដួល សហគមន៍ជោគជ័យ សហគមន៍សំបូរ សហគមន៍ការឡោត សហគមន៍ភូមិបុស្សការពារដីធ្លីប្រើសក្អក និងសហគមន៍ប្រមេរ ដែលសហគមន៍ទាំងនេះស្ថិតក្នុងស្រុកឆែប៕