.jpg)
លោករដ្ឋមន្ត្រីអប់រំ (ឆ្វេង) និងឯកអគ្គរដ្ឋទូតសហរដ្ឋអាមេរិកដួសបាយសម្លដាក់ឱ្យសិស្ស។ រូបថត ក្រសួងអប់រំ
ភ្នំពេញៈ ក្រសួងអប់រំ យុវជន និងកីឡាស្ថានទូតអាមេរិក និងតំណាងកម្មវិធីស្បៀងអាហារពិភពលោក (WFP) រួមគ្នាពង្រីកបន្ថែមទៀតនូវកម្មវិធីជាតិផ្តល់ស្បៀងអាហារតាមសាលារៀនក្នុងនោះសាលារៀនចំនួន ៨៥ បន្ថែមទៀតដែលអនុវត្តកម្មវិធីនេះត្រូវបានផ្ទេរពីកម្មវិធីស្បៀងអាហារពិភពលោកជូនដល់រាជរដ្ឋាភិបាល។
ការប្រកាសរួមគ្នានេះត្រូវបានធ្វើឡើងកាលពីថ្ងៃទី ១៧ ខែមីនា ក្នុងពិធីទស្សនកិច្ចទៅកាន់ខេត្តសៀមរាបរបស់លោក ហង់ជួន ណារ៉ុន រដ្ឋមន្ត្រីក្រសួងអប់រំយុវជន និងកីឡា ឯកអគ្គរដ្ឋទូតសហរដ្ឋអាមេរិកប្រចាំកម្ពុជា និងតំណាងកម្មវិធីស្បៀងអាហារពិភពលោក (WFP)។
សេចក្តីប្រកាសព័ត៌មានរួមនេះ បានឱ្យដឹងថា ភាគីទាំង ៣ បានរួមគ្នាពង្រីកកម្មវិធីជាតិផ្តល់ស្បៀងអាហារតាមសាលារៀន និងបានផ្ទេរជាផ្លូវការនូវសាលារៀនដែលអនុវត្តកម្មវិធីនេះចំនួន ៨៥ បន្ថែមទៀតពីកម្មវិធីស្បៀងអាហារពិភពលោកជូនដល់រាជរដ្ឋាភិបាល។
សេចក្តីប្រកាសដដែលបានឱ្យដឹងបន្តថា កម្មវិធីនេះផ្តល់នូវរបបអាហារមានជីវជាតិ ដែលជួយរួមចំណែកឱ្យកុមារមានសុខភាពល្អ និងដើរតួក្នុងការលើកកម្ពស់ដោយប្រយោលនូវប្រាក់ចំណូលរបស់ក្រុមគ្រួសារដែលងាយរងគ្រោះបំផុតផងដែរ។ ក្រៅពីនេះកម្មវិធីនេះក៏បានរួមចំណែកជំរុញសេដ្ឋកិច្ចតាមមូលដ្ឋានតាមរយៈការដាំដុះ និងទិញដូរកសិផលនៅក្នុងសហគមន៍ផងដៃរ។
សេចក្តីប្រកាសបានបញ្ជាក់ថា «កម្មវិធីផ្តល់ស្បៀងអាហារតាមសាលារៀនផ្តល់អាហារមានជីវជាតិដល់សិស្ស ដើម្បីទទួលទាននៅតាមសាលារៀន។
ការទទួលទានអាហារនៅសាលារៀនមានសារៈសំខាន់ណាស់ដោយបានរួមចំណែកដល់ការអប់រំតាមរយៈការបង្កើនការចុះឈ្មោះចូលរៀនវត្តមាន ការយកចិត្តទុកដាក់ និងភាពរហ័សរហួនរបស់សិស្សក្នុងថ្នាក់រៀន»។
នៅកម្ពុជាកម្មវិធីផ្តល់ស្បៀងអាហារតាមសាលារៀនផ្តល់អត្ថប្រយោជន៍ដល់សិស្សថ្នាក់មត្តេយ្យ និងបឋមសិក្សាចំនួន ២៨ ម៉ឺននាក់ នៅក្នុងសាលារៀនចំនួន ១ ១១៣ នៅក្នុងខេត្តចំនួន ១០។ បច្ចុប្បន្ន រាជរដ្ឋាភិបាលកម្ពុជាគឺជាអ្នកផ្ដល់មូលនិធិ និងចាត់ចែងកម្មវិធីនៅតាមសាលាចំនួន ២៩០ (២៦%) និងបានបែងចែកថវិកាចំនួន ២៩ លានដុល្លារ សម្រាប់កម្មវិធីនៅក្នុងឆ្នាំនេះ។ នេះបើតាមការអះអាងនៅក្នុងសេចក្តីប្រកាសព័ត៌មាន។
លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡាបានថ្លែងថា ការប្រគល់ជូនរដ្ឋាភិបាលនូវសាលារៀនទាំងនេះ គឺជាព្រឹត្តិការណ៍ដ៏សំខាន់មួយសម្រាប់កម្មវិធីផ្តល់ស្បៀងអាហារតាមសាលារៀននៅកម្ពុជាដែលលោកចាត់ទុកថា វាបង្ហាញនូវការប្ដេជ្ញាចិត្តរបស់រាជរដ្ឋាភិបាលក្នុងការពង្រីកកម្មវិធីនេះជាបណ្តើរៗ ដោយទទួលស្គាល់ពីឥទ្ធិពលជាវិជ្ជមានរបស់កម្មវិធីនេះទៅលើការអប់រំ អាហារូបត្ថម្ភ និងកិច្ចគាំពារសង្គម។
លោកបានបញ្ជាក់ថា៖ «រាជរដ្ឋាភិបាលមានមោទនភាពដែលបានចូលរួមជាមួយបណ្ដាញសកលនៃកម្មវិធីផ្ដល់ស្បៀងអាហារតាមសាលារៀនកាលពីខែសីហា ឆ្នាំ ២០២១ និងបានទទួលស្គាល់ថា ការផ្តល់អាហារតាមសាលារៀនកាន់តែមានសារៈសំខាន់ជាពិសេសក្នុងការជួយទប់ទល់ទៅនឹងផលប៉ះពាល់ដែលបង្កដោយជំងឺរាតត្បាតទៅលើការអភិវឌ្ឍធនធានមនុស្ស»។
លោកស្រី គ្លែរ កូណាន់ តំណាងកម្មវិធីស្បៀងអាហារពិភពលោកនៅកម្ពុជាបានលើកឡើងថា ការគាំទ្រសប្បុរសពីរដ្ឋាភិបាលសហរដ្ឋអាមេរិកដែលមានទឹកប្រាក់សរុបជាង ៨៤ លានដុល្លា ចាប់តាំងពីឆ្នាំ ២០២១ បានអនុញ្ញាតឱ្យកុមារកម្ពុជាមកពីក្រុមគ្រួសារក្រីក្រទទួលបានអាហារពេលព្រឹកដែលមានជីវជាតិ និងបានរួមចំណែកលើកកម្ពស់ការអប់រំ និងអាហារូបត្ថម្ភរបស់ពួកគេ។
លោកស្រីបានបញ្ជាក់បន្ថែមថា៖ «អ្វីដែលជាចំណុចសំខាន់បំផុតនោះគឺ វាជាមូលដ្ឋានគ្រឹះសម្រាប់កម្មវិធីជាតិ ដោយជួយអភិវឌ្ឍសមត្ថភាពជាតិក្នុងការចាត់ចែងកម្មវិធី និងការកសាងហេដ្ឋារចនាសម្ព័ន្ធសម្រាប់ទទួលទានអាហារ ទឹកស្អាត ក៏ដូចជាអនាម័យនៅក្នុងសាលារៀនទូទាំងប្រទេស»។
ចំណែកលោក Patrick W. Murphy ឯកអគ្គរដ្ឋទូត្ឋអាមេរិកប្រចាំកម្ពុជាបានបង្ហាញនូវសេចក្តីសោមនស្សរីករាយដោយបានឃើញលទ្ធផលនៃការគាំទ្រកន្លងមករបស់សហរដ្ឋអាមេរិកសម្រាប់អាហារូបត្ថម្ភតាមសាលារៀននៅកម្ពុជា។
លោកបានបញ្ជាក់ថា៖ «ការផ្ដល់អាហារប្រកបដោយគុណភាពតាមសាលារៀនមានសារៈសំខាន់ណាស់សម្រាប់សិស្ស និងក្រុមគ្រួសាររបស់ពួកគេហើយនេះគឺជាសកម្មភាពជាទីរីករាយ និងសាទរដែលក្រសួងអប់រំទទួលយកកម្មវិធីនេះ និងពង្រីកនៅតាមសាលារៀនទូទាំងប្រទេស»។
សូមជម្រាបថា រាជរដ្ឋាភិបាលកម្ពុជា សហការជាមួយម្ចាស់ជំនួយដទៃទៀតបានចូលរួមចំណែកផ្ដល់មូលនិធិដល់កម្មវិធីស្បៀងអាហារពិភពលោក សម្រាប់ដំណើរការកម្មវិធីនៅតាមសាលារៀនដែលនៅសេសសល់ដោយបានផ្ដល់វិភាគទានសរុបចំនួន ២៤ លានដុល្លារចាប់ពីឆ្នាំ ២០០៧ មក៕
