.jpg)
លោក ផាន អូន ក្នុងកិច្ចប្រជុំពីថ្ងៃទី ១៧ មីនា។ រូបថត ក.ប.ប.
ភ្នំពេញៈ អគ្គនាយកដ្ឋាន ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) និង GIZ រួមគ្នាបើកសិក្ខាសាលាថ្នាក់ជាតិផ្សព្វផ្សាយច្បាប់ស្តីពីការប្រកួតប្រជែង ក្រោមប្រធានបទ “ការលើកកម្ពស់ទំនាក់ទំនងពាណិជ្ជកម្មដោយស្មើភាព និងស្មោះត្រង់ ដើម្បីលើកកម្ពស់ការយល់ដឹងរបស់បុគ្គលធ្វើធុរកិច្ចនៅក្នុងប្រទេសកម្ពុជា។
ពិធីនេះត្រូវបានធ្វើឡើងកាលពីថ្ងៃទី ១៧ ខែមីនា ឆ្នាំ ២០២២ ដោយមានការចូលរួមដោយផ្ទាល់ពីភាគីជាតិ និងអន្តរជាតិនៅសណ្ឋាគារហៃយ៉ាត់ រីជិនស៊ីភ្នំពេញ និងតាមរយៈវីដេអូ អនឡាញ ក្រោមប្រធានបទ «ការលើកកម្ពស់ទំនាក់ទំនងពាណិជ្ជកម្មដោយស្មើភាព និងស្មោះត្រង់៖ ប្រសិទ្ធភាពសេដ្ឋកិច្ច និងសុខុមាលភាព អ្នកប្រើប្រាស់»។
អគ្គនាយកដ្ឋាន ក.ប.ប. បានឱ្យដឹងថា សិក្ខាសាលានេះមានគោលបំណងណែនាំ និងលើកកម្ពស់ការយល់ដឹងរបស់បុគ្គលធ្វើធុរកិច្ចលើច្បាប់ស្តីពីការប្រកួតប្រជែង និងបង្កើនកិច្ចសហប្រតិបត្តិការជាមួយស្ថាប័នមានសមត្ថកិច្ច និយតករ អ្នកប្រតិបត្តិច្បាប់ និងបុគ្គលធ្វើធុរកិច្ច ក្នុងការធានាឱ្យមានការអនុវត្តច្បាប់ និងបទប្បញ្ញត្តិនានាប្រកបដោយប្រសិទ្ធភាព ជាពិសេសលើកកម្ពស់ការធ្វើអាជីវកម្មប្រកបដោយក្រមសីលធម៌ និងការប្រកួតប្រជែងដោយស្មោះត្រង់។
លោក ផាន អូន ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋាន ក.ប.ប. បានថ្លែងថា ប្រទេសកម្ពុជា គឺជាប្រទេសដែលទើបមានច្បាប់ស្តីពីការប្រកួតប្រជែងចុងក្រោយគេ ក្នុងចំណោមប្រទេសក្នុងតំបន់អាស៊ានដទៃទៀត។ ដូច្នេះ ការប្រកាសផ្សព្វផ្សាយនូវច្បាប់នេះឱ្យបានទូលំទូលាយ គឺពិតជាមានសារៈសំខាន់ណាស់ ដើម្បីការចូលរួមពីសាធារណជន និងអ្នកពាក់ព័ន្ធដទៃទៀត ជាពិសេសគឺបុគ្គលធ្វើធុរកិច្ចនៅក្នុងប្រទេសកម្ពុជា។
លោកបានបញ្ជាក់ថា៖ «បើទោះជាកម្ពុជាទើបតែដាក់ឱ្យប្រើប្រាស់ច្បាប់នេះក៏ដោយចុះ កម្ពុជានឹងប្តេជ្ញាខិតខំប្រឹងប្រែងឱ្យអស់ពីសមត្ថភាពក្នុងការពង្រឹង ការយកចិត្តទុកដាក់ និងការធានាសិទ្ធិ ការការពារផលប្រយោជន៍របស់អ្នកប្រើប្រាស់ ក៏ដូចជាធុរជនតាមរយៈលិខិតបទដ្ឋានគតិយុត្ត និងតាមរយៈការអនុវត្តច្បាប់ប្រកបដោយប្រសិទ្ធភាព»។
ជាមួយនឹងការផ្សព្វផ្សាយច្បាប់នេះ លោក ផាន អូន ក៏បានអះអាងដែរថា ដើម្បីការប្រកួតប្រជែងដោយស្មើភាព និងតម្លាភាព រដ្ឋាភិបាល ក៏កំពុងតាក់តែងលិខិតបទដ្ឋានពាក់ព័ន្ធនានាមួយចំនួនទៀត ដើម្បីបំពេញបន្ថែម និង គាំទ្រឱ្យដំណើរការនៃការអនុវត្តច្បាប់ស្តីពីការប្រកួតប្រជែងនៅក្នុងប្រទេសកាន់តែមានប្រសិទ្ធភាព។
លោក ផាន អូន បានឱ្យដឹងដែរថា មន្ត្រីនៃអគ្គនាយដ្ឋាន ក.ប.ប. ចំនួន ៥៤២ នាក់ បានទទួលការតែងតាំងជាមន្ត្រីស៊ើបអង្កេតក្រោមច្បាប់ស្តីពីការគ្រប់គ្រងការប្រកួតប្រជែងរួចមកហើយ ខណៈដែលមន្ត្រីជិត ៣០០ នាក់បន្ថែមទៀតនឹងទទួលបានការតែងតាំងជាមន្ត្រីស៊ើបអង្កេតនៅក្រោមច្បាប់នេះ។
ច្បាប់ស្តីពីការប្រកួតប្រជែងនេះ ត្រូវបានព្រះមហាក្សត្រឡាយព្រះហស្ដលេខាប្រកាសឱ្យប្រើប្រាស់ជាផ្លូវការកាលពីថ្ងៃទី ៥ ខែតុលា ឆ្នាំ ២០២១ ដែលច្បាប់នេះ ផ្តោតសំខាន់លើការរារាំងការប្រកួតប្រជែងមិនស្មោះត្រង់ ការរំលោភបំពានលើជំហរឧត្តមភាពលើទីផ្សារ និងការរួមបញ្ចូលគ្នានៃធុរកិច្ច រីឯសកម្មភាពបំពានច្បាប់ប្រកួតប្រជែងភាគច្រើនកើតឡើងក្រោមរូបភាពជាកិច្ចព្រមព្រៀងមិនស្របច្បាប់ ដែលតម្រូវឱ្យស្ថាប័នប្រកួតប្រជែងត្រូវតែយកចិត្តទុកដាក់ឱ្យបានខ្ពស់៕
