.jpg)
ភ្ញៀវទេសចរបរទេសពេលមកដល់ព្រលានយន្តហោះអន្ដរជាតិភ្នំពេញពីថ្ងៃទី ១៦ មីនា។ ហេង ជីវ័ន
ភ្នំពេញៈ លោកនាយករដ្ឋមន្ត្រី ហ៊ុន សែន បានថ្លែងឱ្យដឹងថា លោកបានសម្រេចលុបចោលនូវលក្ខខណ្ឌមួយចំនួន សម្រាប់អ្នកដំណើរមកពីបរទេសដោយលោកមិនតម្រូវឱ្យមានការបង្ហាញលទ្ធផលតេស្ត PCR និងមិនមានការធ្វើតេស្តរហ័សពេលមកដល់ប្រទេសកម្ពុជាទៀតទេ ហើយបានអនុញ្ញាតឱ្យបើកដំណើរការឡើងវិញនូវការផ្តល់ទិដ្ឋាការពេលមកដល់សម្រាប់អ្នកដំណើរអន្តរជាតិទាំងអស់។
ប្រមុខរាជរដ្ឋាភិបាលកម្ពុជា លើកឡើងដូចនេះ នៅព្រឹកថ្ងៃទី ១៧ ខែមីនាឆ្នាំ ២០២២ ក្នុងពិធីសម្ពោធដាក់ឱ្យប្រើប្រាស់ «ភូមិកុមារ SOS» ស្ថិតនៅក្នុងខេត្តព្រៃវែង ក៏ប៉ុន្តែលោកនៅតែបន្តអំពាវនាវដល់ប្រជាពលរដ្ឋឱ្យមានការយកចិត្តទុកដាក់ក្នុងកិច្ចការពារខ្លួនតាមរយៈ ៣ កុំ ៣ ការពារ ជាមួយនឹងរដ្ឋាភិបាល ខណៈមានការកាត់បន្ថយនូវការរឹតបន្តឹងលើបញ្ហាមួយចំនួនផងដែរ។
លោក ហ៊ុន សែន បានមានប្រសាសន៍ថា៖ «ម្សិលមិញ ខ្ញុំបានសម្រេចលើបញ្ហា ៣ ដើម្បីដាក់ឱ្យប្រើប្រាស់ចាប់ពីថ្ងៃនេះតទៅ ក្នុងនោះអ្នកដែលមកពីក្រៅប្រទេសមិនតម្រូវឱ្យមានការធ្វើតេស្ត PCR អវិជ្ជមាន ក្នុងរយៈពេល ៧២ ម៉ោងមុនពេលមកដល់កម្ពុជាទៀតនោះទេ ហើយការលើកលែងទី ២ គឺនៅពេលដែលមកដល់ព្រលានយន្តហោះរបស់យើងមិនតម្រូវឱ្យមានការធ្វើតេស្តរហ័សទេ»។
ចំណែកការលើកលែងទី ៣ គឺលោកនាយករដ្ឋមន្ត្រី ហ៊ុន សែន អនុញ្ញាតឱ្យបើកដំណើរការឡើងវិញនូវការផ្តល់ទិដ្ឋាការពេលមកដល់ (Visa on Arrival) សម្រាប់អ្នកដំណើរអន្តរជាតិទាំងអស់ ទាំងតាមផ្លូវអាកាស ផ្លូវគោក និងផ្លូវទឹក។
លោកបញ្ជាក់ថា៖ «អ្នកដំណើរមិនចាំបាច់ទៅយកវីសាតាមប្រទេសណាទេគឺពួកគាត់យកវីសាពេលមកដល់តែម្តង តាមសំណូមពររបស់រដ្ឋមន្ត្រីក្រសួងទេសចរណ៍។ ដូច្នេះមុនពេលមកដល់កម្ពុជាគឺពួកគាត់ចាំបាច់ទៅយកវីសានៅកន្លែងនេះ ឬកន្លែងនោះ ប៉ុន្តែឥឡូវនេះយើងប្រើវីសាពេលមកដល់តែម្តង»។
លោកនាយករដ្ឋមន្ត្រីបានបន្ថែមថា រាជរដ្ឋាភិបាលបានចំណាយថវិកាយ៉ាងច្រើនក្នុង ១ ថ្ងៃៗទៅលើឧបករណ៍តេស្តរហ័សរកមេរោគកូវីដ ១៩ សម្លៀកបំពាក់ពេទ្យការពារពីការឆ្លងកូវីដ ១៩ ពេលធ្វើតេស្ត ហើយក៏វាជាការរំខានទៅដល់ការធ្វើការងារផងដែរ។
លោក ហ៊ុន សែន បានថ្លែងថា៖ «យើងសម្រួលលើការងារនេះដើម្បីទាក់ទាញការធ្វើវិនិយោគ និងសម្រួលទៅឱ្យអ្នកដែលធ្វើធុរកិច្ចដែលមកទេសចរណ៍នៅកម្ពុជា។ ចំណុចទាំងនេះ ជាចំណុចដែលយើងទាំងអស់គ្នាត្រូវតែបន្តក្នុងការធ្វើសកម្មភាពឆ្ពោះទៅមុខ ដើម្បីគោលដៅនៃការអភិវឌ្ឍរៀនរស់ជាមួយនឹងកូវីដ ១៩»។
រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ ១៩ លោក ម៉ម ប៊ុនហេង ក៏បានលើកឡើងតាមរយៈសេចក្តីប្រកាសព័ត៌មាននៅថ្ងៃទី ១៧ ខែមីនា ដែរថា ទោះបីមានការលុបចោលលក្ខខណ្ឌទាំងនេះក៏ដោយ ក៏ក្រសួងសុខាភិបាលនៅតែលើកទឹកចិត្តដល់អ្នកដំណើរទាំងអស់ គប្បីធ្វើតេស្តរហ័សដោយខ្លួនឯង។
លោកបានបន្តថា ជាមួយគ្នានេះ អ្នកដំណើរទាំងអស់ត្រូវបង្ហាញវិញ្ញាបនបត្របញ្ជាក់ការចាក់វ៉ាក់សាំងកូវីដ ១៩ នៅពេលមកដល់កម្ពុជាផងដែរ។
លោក ម៉ម ប៊ុនហេង បានបញ្ជាក់ថា៖ «ចំពោះអ្នកដំណើរដែលពុំបានចាក់វ៉ាក់សាំងកូវីដ-១៩ ពេញលេញត្រូវធ្វើចត្តាឡីស័ករយៈពេល ១៤ ថ្ងៃនៅតាមទីតាំងដែលកំណត់ដោយក្រសួងសុខាភិបាល ឬអាជ្ញាធរមានសមត្ថកិច្ច»។
ដោយឡែក ក្រសួងសុខាភិបាលនៅថ្ងៃទី ១៧ ខែមីនា ក៏បានចេញសេចក្តីជូនព័ត៌មានពីការធ្វើយុទ្ធនាការអប់រំសុខភាពដើម្បីរួមគ្នាទប់ស្កាត់ និងបង្ការការចម្លងវីរុសកូវីដ ១៩ជាពិសេសប្រភេទអូមីក្រុងនៅថ្ងៃទី ២២ ខែមីនា ឆ្នាំ ២០២២ នៅខេត្តកំពង់ស្ពឺផងដែរ ក្រោមប្រធានបទ «កូវីដ ១៩ បំប្លែងថ្មីអូមីក្រុង ឆ្លងខ្លាំងជាងមុន អាចបណ្តាលឱ្យមានហានិភ័យដល់អ្នក និងគ្រួសារ»។
ក្រសួងសុខាភិបាលបានលើកឡើងថា មានប្រជាពលរដ្ឋមួយចំនួនមិនបានបន្តយកចិត្តទុកដាក់អនុវត្ត ឬក៏អនុវត្តមិនបានត្រឹមត្រូវ មិនបានហ្មត់ចត់ និងម៉ឺងម៉ាត់ នូវវិធានការការពារការចម្លងជំងឺកូវីដ ១៩ ជាពិសេសការជួបជុំគ្នានៅតាមពិធីផ្សេងៗ មានការខ្វះខាត ឬមិនមានការប្រតិបត្តិត្រឹមត្រូវតាមវិធានការសុខាភិបាល ដែលជាហានិភ័យខ្ពស់នៃការចម្លងវីរុសកូវីដ ១៩។
ការធ្វើយុទ្ធនាការនេះ គឺដើម្បីជំរុញនូវការទទួលខុសត្រូវរបស់បុគ្គល គ្រួសារ សហគមន៍ និងស្ថាប័នពាក់ព័ន្ធ អាជ្ញាធរមូលដ្ឋាន រួមគ្នាទទួលខុសត្រូវក្នុងស្មារតីសាមគ្គីភាព ដើម្បីកាត់ផ្តាច់ខ្សែចម្លងវីរុសកូវីដ ១៩ បំប្លែងថ្មីឱ្យមាននិរន្តរភាពនៃការរស់នៅជាមួយនឹងវីរុសកូវីដ ១៩ តាមគន្លងប្រកតីភាពថ្មីផងដែរ៕
