.jpg)
ប្រជាការពារក្នុងស្រុកអង្គស្នួលពេលបំពេញការងារកាលពីដើមខែមីនានេះ។ រូបថត ហ្វេសប៊ុក
ភ្នំពេញៈ លោក នេត សាវឿន អគ្គស្នងការនគរបាលជាតិណែនាំដល់ស្នងការនៃស្នងការដ្ឋាននគរបាល រាជធានី ខេត្ត ទាំងអស់ឱ្យយកចិត្តទុកដាក់ពង្រឹងសមត្ថភាពកម្លាំងប្រជាការពារឱ្យមានគុណភាព និងលទ្ធភាពសមស្របជាកម្លាំងជំនួយក្នុងការរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ស្របតាមគោលនយោបាយ «ភូមិ ឃុំ សង្កាត់មានសុវត្ថិភាព»។
តាមរយៈលិខិតមួយផ្ញើទៅកាន់ស្នងការនៃស្នងការដ្ឋាននគរបាលរាជធានី-ខេត្ត កាលពីថ្ងៃទី ១៦ ខែមីនា លោក នេត សាវឿន បញ្ជាក់ថា តាមរយៈការចាត់តាំងអនុវត្តគោលនយោបាយ «ភូមិ ឃុំ សង្កាត់មានសុវត្ថិភាព» និងការអនុវត្តការងារនគរបាលប៉ុស្តិ៍រដ្ឋបាលតាមទម្រង់ការងារនគរបាល និងសហគមន៍កន្លងមក ពិនិត្យឃើញថា កម្លាំងប្រជាការពារបានចូលរួមយ៉ាងសកម្មជាមួយនគរបាលប៉ុស្តិ៍រដ្ឋបាល និងបានក្លាយជាកម្លាំងជំនួយក្នុងការរក្សាសន្តិសុខសណ្តាប់ធ្នាប់សាធារណៈ និងសុវត្ថិភាពសង្គមនៅតាមមូលដ្ឋាន។
លោកសរសេរក្នុងលិខិតនេះបន្តថា ក្នុងបំណងបន្តលើកទឹកចិត្តដល់កម្លាំងប្រជាការពារ...«អគ្គស្នងការដ្ឋាននគរបាលជាតិសូមធ្វើការណែនាំឯកឧត្តមអស់លោកស្នងការនៃស្នងការដ្ឋាននគរបាល រាជធានី ខេត្ត ទាំងអស់ត្រូវយកចិត្តទុកដាក់ពង្រឹងសមត្ថភាពកម្លាំងប្រជាការពារឱ្យមានគុណភាព និងលទ្ធភាពសមស្របជាកម្លាំងជំនួយក្នុងការរក្សាសន្តិសុខសណ្តាប់ធ្នាប់សាធារណៈ និងសុវត្ថិភាពសង្គម...»។
ជាមួយគ្នានេះលោកអគ្គស្នងការនគរបាលជាតិបានជំរុញឱ្យបច្ចុប្បន្នភាពពង្រឹងកងជួររបស់កម្លាំងប្រជាការពារ នៅតាមឃុំ សង្កាត់ឱ្យបានច្បាស់លាស់ និងថែបំប៉ន លើកទឹកចិត្ត និងត្រូវបណ្ដុះបណ្ដាល ហ្វឹកហ្វឺន អប់រំអំពីវិន័យកងជួរ សីលធម៌ អាកប្បកិរិយា និងពាក្យសម្តីក្នុងពេលបំពេញការងារ ឬទំនាក់ទំនងជាមួយប្រជាពលរដ្ឋ។
លោកបានបញ្ជាក់ថា «ត្រូវធ្វើសេនាធិការជូនគណៈបញ្ជាការឯកភាពរដ្ឋបាលគ្រប់ថ្នាក់ក្នុងការរៀបចំផែនការ កសាង ពង្រឹង និងគាំទ្រលើកទឹកចិត្តកម្លាំងប្រជាការពារឱ្យក្លាយជាកម្លាំងជំនួយប្រកបដោយសមត្ថភាពចូលរួមក្នុងចលនាសន្តិសុខមាតុភូមិ ក៏ដូចជាជំរុញចលនាអនុវត្តគោលនយោបាយ «ភូមិឃុំ សង្កាត់មានសុវត្ថិភាព» ឱ្យទទួលបានជោគជ័យ»។
លោក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិ ប្រាប់ ភ្នំពេញ ប៉ុស្តិ៍ នៅថ្ងៃទី ១៧ ខែមេសា ថា កម្លាំងប្រជាការពារនេះកើតឡើងពីការស្ម័គ្រចិត្តរបស់ពលរដ្ឋនៅតាមមូលដ្ឋាន។ ដូច្នេះពួកគាត់គ្មានមូលដ្ឋានចំណេះដឹងផ្នែកពាក់ព័ន្ធនឹងក្រមសីលធម៌ និងច្បាប់ទម្លាប់នោះទេ ប៉ុន្តែពួកគាត់គឺជាកម្លាំងជំនួយយ៉ាងសំខាន់ក្នុងការរក្សាសណ្តាប់ធ្នាប់នៅមូលដ្ឋាន។
លោកបន្តថា៖ «ពួកគាត់បានជួយសម្រួលសណ្តាប់ធ្នាប់នៅតាមទីផ្សារ ទីប្រជុំជន រោងការ និងបុណ្យទានផ្សេងទៀត ប៉ុន្តែពេលខ្លះពួកគាត់ច្រឡំខ្លួនឯងជាសមត្ថកិច្ច ដើម្បីចៀសវាង អាហ្នឹង យើងឱ្យគាត់ធ្វើការប្រកបដោយក្រមសីលធម៌។ ដូច្នេះយើងឱ្យខេត្តទាំងអស់អប់រំគាត់ រៀបចំគាត់ឱ្យបានហ្មត់ចត់ ណែនាំឱ្យគាត់បានត្រឹមត្រូវ មានសីលធម៌ មានអាកប្បកិរិយាទន់ភ្លន់ក្នុងការទាក់ទងជាមួយប្រជាពលរដ្ឋនៅក្នុងមូលដ្ឋាន»។
លោកពន្យល់ថា បើពួកគាត់ (ប្រជាការពារ) ទៅទាត់កញ្ច្រែងគេលក់នៅតាមផ្សារទាំងមិនមានសីលធម៌ គេនឹងជេរបញ្ចោរ ប៉ុន្តែបើពួកគាត់ទៅលួងលោមគេថាធ្វើនេះខុសពីគោលការណ៍ឃុំសង្កាត់ មិនឱ្យមានការលក់ដូរនៅតាមផ្លូវទេ។ ដូច្នេះត្រូវបង្រៀនពួកគាត់ឱ្យយល់ដឹងពីបញ្ហានេះ ដើម្បីកុំឱ្យមានទំនាស់នៅក្នុងមូលដ្ឋាន។
លោក លឹម ពុទ្ធាឡា ស្នងការរងនគរបាលខេត្តបាត់ដំបង ប្រាប់ ភ្នំពេញ ប៉ុស្តិ៍ នៅថ្ងៃទី ១៧ ខែមីនា ថា ពាក់ព័ន្ធនឹងបញ្ហានេះ ស្នងការខេត្តបានណែនាំទៅកាន់ផ្នែកជំនាញទទួលបន្ទុកកិច្ចការងារប៉ុស្តិ៍ ចុះទៅអប់រំ និងណែនាំដល់ប្រជាការពារទាំងនោះ ដើម្បីពង្រឹងសន្តិសុខសណ្តាប់ធ្នាប់ ជាពិសេសភូមិ ឃុំមានសុវត្ថិភាព។
លោកថ្លែងថា៖ «ស្នងការគាត់ណែនាំឱ្យស្នងការរង ១ រូប ស្រុក ១ រូបឱ្យចុះអនុវត្តតាមការណែនាំរបស់ ឯកឧត្តម អគ្គស្នងការ នៅគ្រប់ស្រុក និងឃុំ-សង្កាត់។ ពួកគាត់ (ប្រជាការពារភូមិ) ដោយខាងប៉ុស្តិ៍បានហៅគាត់មកសហការគ្នា និងណែនាំឱ្យធ្វើកិច្ចការរួមគ្នាលើការងារដែលពាក់ព័ន្ធ មិនមានជាបញ្ហាអ្វីទេ ព្រោះពួកគាត់ពេញចិត្តចំពោះការងារហ្នឹង»៕
