ក្រសួងសុខាភិបាលបានប្រកាសរកឃើញអ្នកឆ្លងវីរុសកូវីដ ១៩ ចំនួនជាង ១០០ នាក់បន្ថែមទៀត ដែលសុទ្ធតែជាករណីប្រភេទអូមីក្រុង និងមានអ្នកជាសះស្បើយជិត ៣០០ នាក់ ប៉ុន្តែមិនមានអ្នកស្លាប់ដោយសារជំងឺកូវីដ ១៩ ឡើយ។
យោងតាមសេចក្តីប្រកាសរបស់ក្រសួងសុខាភិបាលនៅព្រឹកថ្ងៃទី ១៨ ខែ មីនា ឆ្នាំ ២០២២ នេះ បានឱ្យដឹងថា មនុស្សចំនួន ១៤៨ នាក់បន្ថែមទៀតបានរកឃើញឆ្លងវីរុសកូវីដ ១៩ ប្រភេទអូមីក្រុង និងមានអ្នកជាសះស្បើយចំនួន ២៨១ នាក់។ ការរកឃើញឆ្លងនេះ មានរកឃើញឆ្លងសហគមន៍ចំនួន ១១០ នាក់ និងអ្នកដំណើរពីបរទេសចំនួន ៣៨ នាក់។
គិតត្រឹមព្រឹកថ្ងៃទី ១៨ ខែ មីនា ឆ្នាំ ២០២២ កម្ពុជាមានអ្នកឆ្លងវីរុសកូវីដ ១៩ សរុបចំនួន ១៣៤ ៧៧២ នាក់ អ្នកជាសះស្បើយសរុបចំនួន ១៣០ ៦៨៨ នាក់ និងអ្នកស្លាប់ចំនួន ៣ ០៤៩ នាក់៕