.jpg)
លោកនាយករដ្ឋមន្ត្រី ហ៊ុន សែន ក្នុងពិធីប្រគល់ទទួលវ៉ាក់សាំងកូវីដ ១៩ ប្រភេទ AstraZeneca ពីប្រជាជន និងរដ្ឋាភិបាលហុងគ្រីផ្តល់ដល់ប្រជាជន និងរាជរដ្ឋាភិបាលកម្ពុជា ចំនួនជាង៥២ម៉ឺនដូសនាព្រឹកថ្ងៃទី ១៨ ខែ មីនា ឆ្នាំ ២០២២ នេះ។ SPM
ការឆ្លងរាលដាលនៃជំងឺកូវីដ ១៩ នៅតែបន្តអូសបន្លាយនិងកំពុងវិវត្ត ជាពិសេសតាមរយៈការបង្កើតជាប្រភេទមេរោគបំប្លែងខ្លួនថ្មីៗជាបន្តបន្ទាប់ ដែលជាកត្តាមួយធ្វើឱ្យប្រទេសកម្ពុជាបានយកចិត្តទុកដាក់ខ្ពស់ ដោយបានពន្លឿននិងជំរុញយុទ្ធនាការចាក់វ៉ាក់សាំង សំដៅបង្កើតភាពស៊ាំសហគមន៍នៅទូទាំងប្រទេសកម្ពុជា។
នេះជាការថ្លែងឡើងរបស់លោកនាយករដ្ឋមន្ត្រី ហ៊ុន សែន នាព្រឹកថ្ងៃទី ១៨ ខែ មីនា ឆ្នាំ ២០២២ នេះ ក្នុងពិធីប្រគល់ទទួលវ៉ាក់សាំងកូវីដ ១៩ ប្រភេទ AstraZeneca ពីប្រជាជន និងរដ្ឋាភិបាលហុងគ្រីផ្តល់ដល់ប្រជាជន និងរាជរដ្ឋាភិបាលកម្ពុជា ចំនួនជាង៥២ម៉ឺនដូស។
ហុងគ្រី គឺជាប្រទេសទី ៦ ដែលបានផ្តល់អំណោយវ៉ាក់សាំងកូវីដ១៩ ដល់ប្រជាជន និងរាដ្ឋាភិបាលកម្ពុជា ក្នុងក្របខ័ណ្ឌទ្វេភាគី ហើយអំណោយនេះ គឺជាសក្ខីភាពមួយដែលឆ្លុះបញ្ចាំងពីកាយវិការមនុស្សធម៌ និងការយកចិត្តទុកដាក់ខ្ពស់របស់ប្រជាជន និងរដ្ឋាភិបាលហុងគ្រី លើការប្រយុទ្ធនឹងជំងឺកូវីដ១៩ នៅកម្ពុជា និងនៅលើសកលលោកទាំងមូល។
លោកបានថ្លែងថា ៖ «ការចែករំលែកនូវវ៉ាក់សាំងកូវីដ១៩ ពិតជាមានសារៈសំខាន់ និងប្រសិទ្ធភាពខ្ពស់ ក្នុងការទប់ស្កាត់ការឆ្លងរាលដាលនៃជំងឺដ៏កាចសាហាវនេះ។ កម្ពុជាជឿជាក់ថា ការចាក់វ៉ាក់សាំងគឺជាកិច្ចការអាទិភាព សម្រាប់យើងទាំងអស់គ្នា ហើយវ៉ាក់សាំងនឹងបន្តដើរតួនាទីជាទំនិញយុទ្ធសាស្ត្រគន្លឹះ ក្នុងការទប់ទល់នឹងការឆ្លងរាលដាល ក៏ដូចជាការរៀនរស់នៅជាមួយជំងឺកូវីដ១៩ និងការបើកកិច្ចដំណើរការសកម្មភាពសង្គម-សេដ្ឋកិច្ច ឡើងវិញ»។
លោក អិសវ៉ាន់ បាកូស (István BAKOS) ភារធារីស្តីទីស្ថានទូតហុងគ្រីប្រចាំព្រះរាជាណាចក្រកម្ពុជា បានលើកឡើងនាឱកាសនោះដែរថា ប្រទេសហុងគ្រីពិតជាមានសេចក្តីសោមន្សរីករាយដែលឃើញប្រទេសកម្ពុជាសម្រេចបាននូវជោគជ័យដ៏អស្ចារ្យនូវការប្រយុទ្ធប្រឆាំងជំងឺដ៏កាចសាហាវនេះ ដោយឈានដល់អត្រាចាក់វ៉ាក់សាំងបានខ្ពស់បំផុតនិងអត្រាមរណភាពទាបបំផុត បើប្រៀបធៀបក្នុងតំបន់និងទូទាំងពិភពលោក។
លោកមានប្រសាសន៍ថា ៖ «ការប្រគល់អំណោយវ៉ាក់សាំងAstraZenecaជាងកន្លះលានដូសនៅថ្ងៃនេះ ជាជំហានថ្មីនៃសហប្រតិបត្តិការទ្វេភាគី ហើយហុងគ្រីសូមប្តេជ្ញាចិត្តជួយដល់ប្រទេសកម្ពុជាក្នុងការអភិវឌ្ឍប្រទេសដើម្បីជាផលប្រយោជន៍រួមគ្នារបស់ប្រទេសយើងទាំង២។ យើងមានការជឿជាក់ថាជំនួយក្នុងពេលមានតម្រូវការគឺជាជំនួយពិតប្រាកដ»។
គិតត្រឹមថ្ងៃទី១៧ ខែមីនា ឆ្នាំ២០២២, កម្ពុជា គឺជាប្រទេសមួយដែលទទួលបានជោគជ័យក្នុងយុទ្ធនាការ ជាតិចាក់វ៉ាក់សាំង ដោយសម្រេចបានអត្រាចាក់វ៉ាក់សាំងប្រមាណ ៩២,៣៤ ភាគរយនៃប្រជាជនសរុប ប្រមាណ ១៦ លាននាក់៕
