.jpg)
វាគ្មិននៅក្នុងវេទិកាពិភាក្សា កាលពីថ្ងៃទី ១៦ ខែមីនា។ រូបថត សហការី
ភ្នំពេញៈ ក្រសួងពាក់ព័ន្ធ អង្គការសង្គមស៊ីវិលជាតិ អន្តរជាតិ និងវិស័យឯកជន រួមគ្នាប្រារព្ធទិវាមួយម៉ោងសម្រាប់ភពផែនដី ឬ Earth Hour ឆ្នាំ ២០២២ ក្រោមប្រធានបទ «អនាគតដែលយើងប្រាថ្នា» ខណៈក្រសួងបរិស្ថាន មានមហិច្ឆតាកាត់បន្ថយការបញ្ចេញឧស្ម័នស្មើសូន្យនៅត្រឹមឆ្នាំ ២០៥០។
សម្រាប់ឆ្នាំ ២០២២ ទិវានេះ ត្រូវបានប្រកាសធ្វើឡើងក្រោមប្រធានបទ «អនាគតដែលយើងប្រាថ្នា» ដោយក្នុងនោះភាគីពាក់ព័ន្ធក៏បានជជែកពិភាក្សា ថាតើកម្ពុជា ត្រូវត្រៀមខ្លួនបែបណា ដើម្បីកសាងអនាគតប្រកបដោយនិរន្តរភាព ដែលកម្មវិធីទាំងនេះ ត្រូវបានសហការរៀបចំពីសំណាក់ក្រសួងបរិស្ថាន អង្គការ WWF កម្ពុជា ក្រុមយុវជន គ្រឹះស្ថានសាធារណៈ និងឯកជន រួមមានក្រុមហ៊ុន ព្រមទាំងអង្គការអន្តរជាតិ និងដៃគូផ្សេងទៀត។
សេចក្តីប្រកាសព័ត៌មានរួមរបស់ស្ថាប័នពាក់ព័ន្ធទាំងនេះបានឱ្យដឹងថា ទិវាមួយម៉ោង សម្រាប់ភពផែនដី ឬ Earth Hour បានក្លាយជាចលនាបរិស្ថានដ៏ធំបំផុតមួយ ដែលប្រារព្ធជាសកលរៀងរាល់ឆ្នាំ និងមានការចូលរួមច្រើនឡើងពីប្រជាជននៅលើពិភពលោកពីគ្រប់ស្រទាប់ទាំងអស់នៃសង្គម រដ្ឋាភិបាល ក្រុមហ៊ុនសហគមន៍ គ្រឹះស្ថាន អង្គការនានា បុគ្គលម្នាក់ៗនៅក្នុងជាង ១៩០ ប្រទេស ដើម្បីធ្វើសកម្មភាពជាវិជ្ជមាន សម្រាប់ការការពារបរិស្ថាន និងធម្មជាតិ។
សេចក្តីប្រកាសព័ត៌មានបន្តថា ក្នុងឆ្នាំកន្លងៗទៅ ទិវា Earth Hour បានផ្តោតលើប្រធានបទរបស់ខ្លួនទៅលើវិបត្តិនៃការប្រែប្រួលអាកាសធាតុ ប៉ុន្តែនាពេលប៉ុន្មានឆ្នាំចុងក្រោយនេះទិវានេះ ក៏បានផ្តល់សារៈសំខាន់ទៅលើបញ្ហានៃការបាត់បង់ធម្មជាតិផងដែរ ក្នុងគោលបំណង ដើម្បីបន្តបំផុសការចូលរួម និងបង្កើនសកម្មភាពជាវិជ្ជមានបន្ថែមទៀតសម្រាប់ការការពារធម្មជាតិមិនខុសពីការដែលទិវានេះបានកៀរគរប្រជាជនពិភពលោកឱ្យរួមគ្នាផ្ដល់ដំណោះស្រាយចំពោះការប្រែប្រួលអាកាសធាតុនោះទេ។ «ចលនាបរិសា្ថនសកលមួយនេះទទួលស្គាល់តួនាទីរបស់បុគ្គលម្នាក់ៗជាស្នូលក្នុងការបង្កើតដំណោះស្រាយចំពោះបញ្ហាប្រឈមនានាដែលបរិស្ថានធម្មជាតិនៃភពផែនដីរបស់យើងកំពុងពើបប្រទះ ហើយផ្តល់សារៈសំខាន់ដល់ឥទ្ធិពលនៃការរួមកម្លាំងគ្នាពីមនុស្សរាប់លាននាក់នៅលើពិភពលោក ក្នុងការជំរុញឱ្យមានការផ្លាស់ប្តូរជាវិជ្ជមានសម្រាប់បរិស្ថាន និងធម្មជាតិ»។
សូមជម្រាបថា កម្ពុជាបានចូលរួមប្រារព្ធទិវានេះជាលើកដំបូងក្នុងឆ្នាំ ២០១០ បន្ទាប់ពីទិវានេះត្រូវបានប្រកាសជាលើកដំបូងនៅទីក្រុងស៊ីដនីប្រទេសអូស្ត្រាលីក្នុងឆ្នាំ ២០០៧ ហើយវាបានក្លាយជាព្រឹត្តិការណ៍ប្រចាំឆ្នាំដ៏មានប្រជាប្រិយភាពមួយ ក្នុងចំណោមសាធារណជនទូទៅនៅទូទាំងប្រទេសជាពិសេសយុវជនរហូតដល់បច្ចុប្បន្ន។
លោក នេត្រ ភក្ត្រា អ្នកនាំពាក្យក្រសួងបរិស្ថានបាននិយាយថា ធម្មជាតិមានសារៈសំខាន់ណាស់ សម្រាប់ជីវិតមនុស្ស និងការអភិវឌ្ឍ ហើយបើធម្មជាតិបាត់បង់ អនាគតមនុស្សជាតិនឹងមិនស្ថិតស្ថេរនោះទេ។ ដូច្នេះលោកយល់ថា ក្នុងឆ្នាំ ២០២២ នេះ ទិវាមួយម៉ោង សម្រាប់ភពផែនដីជាឱកាសមួយ ត្រូវយកចិត្តទុកដាក់លើអាទិភាពនៃការយកធម្មជាតិជាស្នូលក្នុងការបង្កើតដំណោះស្រាយសម្រាប់កសាងសេដ្ឋកិច្ច សង្គមឱ្យប្រសើរឡើងក្រោយវិបត្តិដូវីដ ១៩។
លោករំពឹងថា ប្រជាពលរដ្ឋកម្ពុជានឹងចូលរួមជាមួយប្រជាជននៅលើពិភពលោក ដើម្បីបញ្ចេញគំនិត ចំណេះដឹង និងពិភាក្សាអំពីសារៈសំខាន់នៃធម្មជាតិ និងភាពចាំបាច់នៃសាមគ្គីភាពរួមគ្នា ដើម្បីការពារបរិស្ថាន និងកសាងអនាគតមួយប្រកបដោយនិរន្តរភាពសម្រាប់ភពផែនដីយើង។
លោកបញ្ជាក់ថា៖ «កម្ពុជាប្រកបដោយសុខភាពល្អ បរិស្ថានមានគុណភាព និងការអភិវឌ្ឍប្រកបដោយនិរន្តរភាព ជាអនាគតដែលយើងគ្រប់គ្នាប្រាថ្នាចង់បាន។ ដូច្នេះយើងត្រូវរួមគ្នាចាប់ពីពេលនេះទៅក្នុងការថែរក្សា និងការពារបរិស្ថានធម្មជាតិក្នុងនោះមាន ជីវចម្រុះ ប្រព័ន្ធអេកូឡូស៊ីដ៏សម្បូរបែបរបស់កម្ពុជា ដើម្បីប្រព័ន្ធទាំងនេះបន្តទ្រទ្រង់ជីវភាពប្រជាជន បង្កើនភាពធន់ទៅនឹងហានិភ័យអាកាសធាតុ និងហានិភ័យជំងឺឆ្លង និងគាំទ្រដល់ការអភិវឌ្ឍសង្គម សេដ្ឋកិច្ច និងបរិស្ថានដោយចីរភាព»។
ជាមួយនឹងការប្រារព្ធទិវានេះ លោក នេត្រ ភក្ត្រា ក៏បានលើកឡើងដែរថា កម្ពុជាមានមហិច្ឆតាក្នុងការកាត់បន្ថយការបញ្ចេញឧស្ម័នស្មើសូន្យ “Net Zero” នៅត្រឹមឆ្នាំ ២០៥០ ដែលមានសារៈសំខាន់ក្នុងការបំពេញតាមគោលដៅរបស់កិច្ចព្រមព្រៀងទីក្រុងប៉ារីស ដើម្បីរក្សាការកើនឡើងសីតុណ្ហភាពជាមធ្យមរបស់ពិភពលោកឱ្យនៅក្រោម ១,៥ អង្សាសេ ហើយប្រទេសកម្ពុជា ប្តេជ្ញាក្នុងការឆ្ពោះទៅកាន់ផ្លូវមួយនេះ។
លោក បញ្ជាក់បន្ថែមថា៖ «LTS4CN នេះ ជាចំណុចចាប់ផ្តើមមួយយ៉ាងសំខាន់ដើម្បីឈានដល់អព្យាក្រឹត កាបូននៅឆ្នាំ ២០៥០។ ការសម្រេចបាននូវសេណារីយោ LTS4CN របស់ប្រទេសកម្ពុជា គឺជាគោលដៅប្រកបដោយមហិច្ឆតា។ វានឹងអាចធ្វើទៅបានដោយមានការបង្កើតបរិយាកាសអំណោយផលឱ្យទូលាយ លទ្ធភាពទទួលបានហិរញ្ញប្បទានអាកាសធាតុ និងបច្ចេកវិទ្យាគ្រប់គ្រាន់ និងកម្មវិធីពង្រឹងសមត្ថភាព និងការអប់រំយ៉ាងទូលំទូលាយ»។
លោកក៏បានអំពាវនាវដល់ប្រជាជនកម្ពុជាទាំងអស់ សូមចូលរួមទាំងអស់គ្នា ដើម្បីបញ្ឈប់ការបរិភោគសាច់សត្វព្រៃ ការទិញ ផលិតផលសត្វព្រៃ ហើយងាកមករួមគ្នាការពារសម្បត្តិធនធានធម្មជាតិរបស់កម្ពុជាយើងឱ្យស្ថិតនៅគង់វង្ស សម្រាប់ជាប្រយោជន៍ដល់មនុស្សជំនាន់នេះ និងជំនាន់តទៅខាងមុខយូរអង្វែងទៀត៕
