ភ្នំពេញៈ អគ្គលេខាធិការនៃក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ លោក សុខ ស៊ីឡូ លើកឡើងថា អាហារ គ្មានសុវត្ថិភាព បង្កការគំរាមកំហែងដល់សុខភាពជាសាកលដែលបង្កគ្រោះថ្នាក់ដល់មនុស្សគ្រប់រូប ក្នុងនោះក៏មានទារក កុមារតូច ស្ត្រីមានផ្ទៃពោះ មនុស្សចាស់ និងអ្នកដែលមានជំងឺគឺងាយរងគ្រោះជាមួយនឹងបញ្ហាសុវត្ថិភាពម្ហូបអាហារ។
លោក សុខ ស៊ីឡូ ថ្លែងដូចនេះក្នុងពិធីបើកវេទិកាយុវជនស្តីពី “សុវត្ថិភាពចំណីអាហារ” នាថ្ងៃទី ១៥ ខែមីនា ឆ្នាំ ២០២២ នៅសកលវិទ្យាល័យភូមិន្ទចំការដូង ដែលបានរៀបចំឡើងដោយ អង្គការ Helen Keller International និងគម្រោង MUSEFO នៃអង្គការ GIZ។ អង្គការសុខភាពពិភពលោកបានបញ្ជាក់ហើយថា ជារៀងរាល់ឆ្នាំកុមារ ២២០ លាននាក់កើតជំងឺរាករូសហើយ ៩៦ ០០០ នាក់បានស្លាប់ ដោយបញ្ញាសុវត្ថិភាពចំណីអាហារ។ ចំណីអាហារគ្មានសុវត្ថិភាពបានបង្កើតវដ្តដ៏កាចសាហាវនៃជំងឺរាគរូស និងកង្វះអាហារូបត្ថម្ភ ដែលគំរាមកំហែងដល់ស្ថានភាពអាហារូបត្ថម្ភរបស់អ្នកដែលងាយរងគ្រោះបំផុត។
លោក សុខ ស៊ីឡូ ថ្លែងថា៖ «អាហារក្នុងចានរបស់យើង មានឥទ្ធិពលខ្លាំងណាស់ ចំពោះសុខភាពយើង។ យើងទាំងអស់គ្នាប្រាថ្នាចង់បានអាហារ ដែលមានគុណភាព និងសុវត្ថិភាព ដើម្បីធានាបាននូវសុខភាពល្អ ប៉ុន្តែអាហារអាចក្លាយទៅជា វត្ថុកខ្វក់ ឬមានជាតិពុលដោយសារតែមានសារធាតុគីមីហួសកម្រិត ដែលធ្វើឱ្យបាត់បង់សុវត្ថិភាពនៅចំណុចណាមួយនៃការផលិតការកែច្នៃនិងការចែកចាយ និងការរក្សាទុក»។
នៅក្នុងប្រទេសកម្ពុជាប្រជាជនទូទៅរួមទាំងយុវជនផងដែរ មានការព្រួយបារម្ភខ្លាំងពីសុវត្តិភាពម្ហូបអាហារ ហើយតែងតែពិភាក្សាពីបញ្ហាបន្លែ និងផ្លែឈើ ព្រមទាំងផលិតផលអាហារមួយចំនួនទៀត នៅលើទីផ្សារមានសារធាតុគីមីដែលអាចធ្វើឱ្យប៉ះពាល់ដល់សុខភាព។
របាយការណ៍របស់ការិយាល័យសុវត្ថិភាពចំណីអាហារនៃនាយកដ្ឋានឱសថ ចំណីអាហារ បរិក្ខារពេទ្យ និងគ្រឿងសម្អាងរបស់ក្រសួងសុខាភិបាលបង្ហាញថា ចាប់តាំងពីឆ្នាំ ២០១៥ ដល់ឆ្នាំ ២០២១ មានមនុស្ស ១១៩ នាក់បានស្លាប់ក្នុងករណីពុលចំណីអាហារ និងមានអ្នករងគ្រោះសរុបមានចំនួន ៤ ៦៩៩ នាក់។ នេះបើតាមលោក សុខ ស៊ីឡូ។
លោកបានថ្លែងថា៖ «កម្ពុជាបាននិងកំពុងប្រឈមមុខជាខ្លាំងលើសុវត្ថិភាពចំណីអាហារដែលទាមទារឱ្យភាគីពាក់ព័ន្ធចូលរួមដោះស្រាយជាប្រព័ន្ធ ប្រកបដោយប្រសិទ្ធភាពខ្ពស់មួយ។ ថ្ងៃនេះជាឱកាសដ៏ល្អមួយ ដែលភាគីពាក់ព័ន្ធសុវត្ថិភាពម្ហូបអាហារទាំងអស់ រួមទាំងយុវជនបានមកជួបជុំគ្នា ដើម្បីពិភាក្សាលើប្រធានបទដ៏សំខាន់នេះ»។
ជាមួយគ្នានោះដែរ លោកស្រី Sanne Sigh តំណាងគម្រោង MUSEFO នៃអង្គការ GIZ បានលើកឡើងដែរថាយុវជន គឺជាអនាគតរបស់កម្ពុជា និងជាតួអង្គសម្រាប់ការផ្លាស់ប្តូរ និងជាអ្នកដឹកនាំនាពេលខាងមុខនៅក្នុងការធានា និងលើកកម្ពស់របបអាហារសុខភាពល្អ សុវត្ថិភាពចំណីអាហារប្រកបដោយនិរន្តរភាពសម្រាប់ទាំងអស់គ្នា។ ជាពិសេសសម្រាប់ស្ត្រីដែលងាយរងគ្រោះ និងកុមារតូច ដើម្បីដោះស្រាយបញ្ហាអាហារូបត្ថម្ភគ្រប់ទម្រង់។ លោកស្រីបានថ្លែងថា៖ «យុវជន!អ្នកគឺជាអ្នកមានឥទ្ធិពល។ អ្នកគឺជាអ្នកអាចផ្លាស់ប្តូរ! ហើយក្នុងពេលជាមួយគ្នានេះ អ្នកគឺជាតួអង្គសកម្មខ្លាំងនៅក្នុងប្រព័ន្ធស្បៀង និងសុវត្ថិភាពចំណីអាហារ។ ថ្ងៃមួយ អ្នកអាចដឹកនាំផ្លូវដោយមិនដឹងខ្លួនលើការលើកកម្ពស់សុវត្ថិភាពចំណីអាហារនៅគ្រប់ដំណាក់កាលទាំងអស់ ចាប់ពីការគ្រប់គ្រងរហូតដល់ការរៀបចំ និងការរក្សាទុកចំណីអាហារ»។
អ្នកដឹកនាំក្រុមយុវជនជើងឯកអាហារូបត្ថម្ភរបស់អង្គការហេទ្បែន ខេលល័រ អន្តរជាតិ (Helen Keller International Cambodia) កញ្ញា ឈុន បូរមី ឱ្យដឹងដែរថា យុវជនទាំងអស់គ្នា ប្រាថ្នាចង់បាននូវការធានាសុវត្ថិភាពលើចំណីអាហារទាំងឡាយដែលដាក់លក់នៅតាមសាលា និងទីផ្សារទាំងអស់នៅកម្ពុជា ប្រយោជន៍ដើម្បីធានាបាននូវសុខុមាលភាពមនុស្សគ្រប់ៗរូប។ កញ្ញាបានថ្លែងថា ៖ «បញ្ហាសុវត្ថិភាពចំណីអាហារ គឺជាកង្វល់របស់យុវជនទាំងអស់។ យើងមានការព្រួយបារម្ភខ្លាំងណាស់លើចំណីអាហារដែលដាក់លក់លើទីផ្សារនាពេលសព្វថ្ងៃនេះ ជាពិសេសបន្លែ ផ្លែឈើ ត្រី សាច់ដែលនាំចូល និងផលិតផលអាហារកែច្នៃដែលប្រើប្រាស់សារធាតុគីមីលើសកម្រិត ដែលអាចបង្កគ្រោះថ្នាក់ដល់សុខភាពធ្ងន់ធ្ងរក្នុងរយៈពេលវែងដូចជាជំងឺមហារីកជាដើម»។
តំណាងយុវជនរូបនេះក៏បានស្នើឱ្យសមត្ថកិច្ច និងអ្នកជំនាញគ្រប់លំដាប់ថ្នាក់ មេត្តាត្រួតពិនិត្យជាប្រចាំនូវសុវត្ថិភាព និងគុណភាពចំណីអាហារព្រមទាំងធ្វើការផ្សព្វផ្សាយឱ្យបានទូលំទូលាយលើសារអប់រំស្តីពីសុវត្ថិភាពចំណីអាហារនេះឱ្យបានយល់ដឹងស៊ីជម្រៅ ក្នុងចំណោមសាធារណជនទូទាំងប្រទេស រួមទាំងអ្នកផលិត អ្នកចែកចាយ និងអ្នកលក់ដូរផងដែរ៕