ក្នុងជំនួបពិភាក្សាការងារជាមួយរដ្ឋមន្ត្រីការបរទេស អារ៉ាប៊ីសាអ៊ូឌីត ព្រះអង្គម្ចាស់ Faisal bin Farhan Al Saud នារសៀលថ្ងៃទី ១៨ ខែមីនា ឆ្នាំ ២០២២ នេះ លោកនាយករដ្ឋមន្ត្រី ហ៊ុន សែន បានលើកទឹកចិត្ត និងជំរុញឱ្យប្រទេសទាំង ២ ធ្វើកិច្ចសហប្រតិបត្តិការលើរាល់សកម្មភាព និងសក្តានុពលដែលកម្ពុជាមាន។
យោងតាមបណ្តាញសង្គមហ្វេសប៊ុករបស់លោកនាយករដ្ឋមន្ត្រី ហ៊ុន សែន ព្រះអង្គម្ចាស់ Faisal bin Farhan Al Saud បាននាំនូវការផ្ដាំផ្ញើសួរសុខទុក្ខពីសំណាក់ព្រះមហាក្សត្រ និងព្រះរាជទាយាទ ចំពោះលោកនាយករដ្ឋមន្ត្រី និងបានជម្រាបពីគោលបំណងនៃដំណើរទស្សនកិច្ចរបស់ព្រះអង្គម្ចាស់មកកាន់ព្រះរាជាណាចក្រកម្ពុជាផងដែរ។
ព្រះអង្គម្ចាស់ Faisal bin Farhan Al Saud បានលើកឡើងថា ដំណើរទស្សនកិច្ចលើកនេះ គឺដើម្បីពង្រីកចំណងមិត្តភាពរវាងប្រទេសទាំង ២ ផង និងដើម្បីពង្រីកកិច្ចសហប្រតិបត្តិការរវាងប្រទេសទាំង ២ ផង តាមរយៈកិច្ចពិភាក្សាជាមួយឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ដោយប្រទេសទាំង ២ មានសក្តានុពលច្រើនសម្រាប់ធ្វើកិច្ចសហប្រតិបត្តិការ។
សក្តានុពលទាំងនោះមានដូចជា វិស័យទេសចរណ៍ បច្ចេកវិទ្យា ថាមពល អប់រំ វប្បធម៌ កសិកម្ម។ល។ ក្នុងន័យនេះព្រះអង្គម្ចាស់ក៏បានគោរពសុំការគាំទ្រពីលោកនាយករដ្ឋមន្ត្រី ហ៊ុន សែន ផងដែរ។
ជាការឆ្លើយតប លោក ហ៊ុន សែន បានយល់ស្របជាមួយព្រះអង្គម្ចាស់ ហើយក៏បានស្វាគមន៍ និងលើកទឹកចិត្តឱ្យព្រះអង្គម្ចាស់ជំរុញកិច្ចសហប្រតិបត្តិការលើរាល់សកម្មភាព និងសក្តានុពលដែលយើងមាន ជាពិសេសលើវិស័យទេសចរណ៍ កសិកម្ម ពាណិជ្ជកម្ម ការរៀបចំផែនការសកម្មភាព និងជំរុញការអនុវត្តឱ្យបានជោគជ័យនាពេលខាងមុខ៕