កំពត/ព្រះសីហនុៈបុរសម្នាក់បានស្លាប់ និងផ្ទះប្រជាពលរដ្ឋចំនួន ២៣៤ ខ្នងបានរងការខូចខាតយ៉ាងដំណំ ដោយសារភ្លៀងលាយឡំខ្យល់កន្ត្រាក់ និងផ្គររន្ទះកើតឡើងកាលពីរសៀលថ្ងៃទី ១៩ ខែមីនា
ឆ្នាំ ២០២២ នៅក្នុងខេត្តចំនួន៣រួមមាន ខេត្តកំពតព្រះសីហនុ និងខេត្តកំពង់ស្ពឺ។ នេះបើតាមការប្រាប់ឲ្យដឹងពីមន្ត្រីអាជ្ញាធរមូលដ្ឋាន។
លោកមុំ ក្រឹង នាយកប្រតិបត្តិសាខាកាកបាទក្រហមកម្ពុជាខេត្តកំពតបានប្រាប់ភ្នំពេញប៉ុស្តិ៍ថា ភ្លៀងលាយឡំខ្យល់កន្ត្រាក់កាលពីល្ងាចថ្ងៃទី ១៩ ខែមីនាបានបង្កផលប៉ះពាល់ផ្ទះប្រជាពលរដ្ឋសរុប ១៦២ ខ្នង នៅក្នុងស្រុកចំនួន ៣ រួមមាន ស្រុកអង្គរជ័យ ៩៥ ខ្នង ស្រុកឈូក ៤៩ ខ្នង និង ស្រុកជុំគិរី ១៨ ខ្នង។
លោកបានបញ្ជាក់ថា៖ «ផ្ទះចំនួន ១២ ខ្នង ក្នុងចំណោមផ្ទះ ១៦២ ខ្នងដែលរងប៉ះពាល់ទាំងនោះ បានដួលរលំ និងបាក់ខូចខាតទាំងស្រុង។ ប៉ុន្តែគ្មានពលរដ្ឋណាម្នាក់រងគ្រោះដោយបាតុភូតភ្លៀងលាយឡំខ្យល់កន្ត្រាក់នេះទេ»។
បើតាមលោក មុំ ក្រឹង ករណីនេះក្រុមការងារសាខាកាកបាទក្រហមកម្ពុជាខេត្តកំពត សហការជាមួយបញ្ជាការឯកភាពនៃស្រុកអង្គរជ័យ ឈូក និងជុំគិរី កំពុងចុះសួរសុខទុក្ខ និងជួយជួសជុលផ្ទះឡើងវិញជូនដល់គ្រួសារ ពលរដ្ឋរងគ្រោះដោយបាតុភូតខ្យល់កន្ត្រាក់ទាំងនោះ និងបានផ្ដល់អំណោយសង្គ្រោះបឋម រួមមានអង្ករ ទឹកស៊ីអ៊ីវ ទឹកត្រី និងមីកញ្ចប់ មួយចំនួន ដើម្បីជួយសម្រាលបន្ទុកជីវភាពប្រចាំថ្ងៃរបស់ពួកគេក្នុងគ្រាដ៏លំបាកនេះ។
ចំណែកលោក ហួត ចាន់ធី អធិការស្ដីទីស្រុកកំពង់សីលា ខេត្តព្រះសីហនុបានប្រាប់ភ្នំពេញប៉ុស្តិ៍ថា ភ្លៀងលាយឡំដោយខ្យល់កន្ត្រាក់បានបង្កផលប៉ះពាល់ និងខូចខាតផ្ទះ ៣០ ខ្នងរបស់ប្រជាពលរដ្ឋយ៉ាងដំណំនៅក្នុងភូមិចាំស្រី ភូមិថ្មី និងភូមិវាលនៃឃុំកំពង់សីលា ព្រមទាំងខូចខាតដំបូលសាលារៀនចំនួន ៣ និងសំណង់អគាររដ្ឋបាលរបស់រដ្ឋ និងឯកជនមួយចំនួនផងដែរកាលពីរសៀលថ្ងៃទី ១៩ ខែមីនា។ ប៉ុន្តែមិនមានប្រជាពលរដ្ឋសិស្សានុសិស្ស លោកគ្រូអ្នកគ្រូបុគ្គលិក និងមន្ត្រីរាជការណាម្នាក់រងគ្រោះថ្នាក់ដោយគ្រោះធម្មជាតិនេះទេ។
លោកបានថ្លែងថា៖ «ភ្លៀងលាយឡំខ្យល់កន្ត្រាក់នារសៀលថ្ងៃម្សិលមិញពិតជាខ្លាំងមែនដោយបានបង្កការខូចខាតផ្ទះប្រជាពលរដ្ឋ សាលារៀន និងសំណង់អគាររដ្ឋបាលរបស់រដ្ឋនិងឯកជនជាច្រើនខ្នង។ ប៉ុន្តែនៅពេលនេះ អាជ្ញាធរយើង កំពុងចុះអន្តរាគមន៍ជួយជួសជុលផ្ទះឡើងវិញជូនដល់គ្រួសារប្រជាពលរដ្ឋដែលរងគ្រោះ»។
ដោយឡែកគ្រោះធម្មជាតិភ្លៀងលាយឡំខ្យល់កន្ត្រាក់ និងផ្គររន្ទះក៏បានបង្កការខូចខាតផ្ទះប្រជាពលរដ្ឋក្នុងស្រុកបសេដ្ឋ ស្រុកថ្ពង និងស្រុកគងពិសីនៃខេត្តកំពង់ស្ពឺសរុប ៤២ ខ្នងនិងបានបណ្ដាលឲ្យបុរសម្នាក់ស្លាប់ផងដែរកាលពីរសៀលថ្ងៃទី ១៩ ខែមីនាឆ្នាំ ២០២២។ នេះបើតាមសម្ដីលោក កង វណ្ណារ៉ូ នាយករដ្ឋបាល និងជាអ្នកនាំពាក្យរដ្ឋបាលខេត្តកំពង់ស្ពឺ។
លោកបានថ្លែងថា ជនរងគ្រោះដែលបានស្លាប់នៅក្នុងគ្រោះធម្មជាតិរន្ទះបាញ់ ឈ្មោះ សផន់ អាយុ ៦៧ ឆ្នាំ ជាប្រជាកសិករនៅក្នុងភូមិក្រុមហ៊ុន ឃុំ-ស្រុកបសេដ្ឋ។ ជនរងគ្រោះត្រូវបានក្រុមគ្រួសារសាច់ញាតិអះអាងថាបានចេញទៅឃ្វាលគោនៅមុនពេលមានភ្លៀងធ្លាក់ ប៉ុន្តែនៅវេលាម៉ោង ៥ ល្ងាចក្រោយពីមេឃរាំងភ្លៀងហើយនោះ ក្រុមគ្រួសារមិនឃើញគាត់ដឹកគោត្រឡប់មកផ្ទះវិញក៏នាំគ្នាទៅតាមរកទើបប្រទះឃើញជនរងគ្រោះដេកស្លាប់នៅលើវាលស្រែ ក៏ប្រញាប់នាំគ្នាសែងសពជនរងគ្រោះមកផ្ទះ ដើម្បីរៀបចំពិធីបុណ្យតាមប្រពៃណី។
លោកបានបញ្ជាក់ថា៖ «នៅពេលក្រុមគ្រួសារសាច់ញាតិនាំសពជនរងគ្រោះមកដល់ផ្ទះសមត្ថកិច្ចនគរបាលជំនាញក៏បានចុះពិនិត្យសាកសពផងដែរ និងបានសន្និដ្ឋានថាជនរងគ្រោះបានស្លាប់ដោយករណីរន្ទះបាញ់ ដោយសភាពសព មានលក្ខណៈរួញសរសៃដៃនិងជើង និងមានស្នាមកន្តួលក្រហមនៅលើផ្នែកខ្នង»៕