.jpg)
សកម្មភាពអាជ្ញាធរដឹកអង្ករចែកជូនពលរដ្ឋ ដែលជាជំនួយរបស់លោកនាយករដ្ឋមន្ត្រី ហ៊ុន សែន។ រូបថត CNC
ភ្នំពេញៈ លោកនាយករដ្ឋមន្រ្តី ហ៊ុន សែន បានផ្តល់អង្ករចំនួន ១៤០ តោន ជូនខណ្ឌទាំង ១៤ ចំណុះឱ្យរដ្ឋបាលរាជធានីភ្នំពេញ ដើម្បីបន្តចែកជូនប្រជាពលរដ្ឋក្រីក្រ ដែលកំពុងខ្វះខាតក្នុងអំឡុងពេលនៃការរីករាលដាលជំងឺកូវីដ ១៩។
រដ្ឋបាលនៅតាមខណ្ឌនីមួយៗ នៅព្រឹកថ្ងៃទី ២០ មីនា ឆ្នាំ ២០២២ បានយកយានយន្ត ទៅទទួលអង្ករនៅសាលារាជធានីភ្នំពេញ ដើម្បីបន្តយកទៅផ្តល់ជូនតាមសង្កាត់ និងប្រជាពលរដ្ឋ ដែលមានជីវភាពខ្វះខាតពិតប្រាកដនៅក្នុងមូលដ្ឋានរបស់ខ្លួន។
អ្នកនាំពាក្យរដ្ឋបាលរាជធានីភ្នំពេញ លោកម៉េត មាសភក្តី ថ្លែងថា៖ «អង្ករដែលប្រគល់ជូនទៅខណ្ឌទាំង ១៤ ខាងលើនេះ ជាអំណោយដ៏ថ្លៃថ្លារបស់សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត តាមរយៈឯកឧត្តម ឃួង ស្រេង អភិបាលរាជធានីភ្នំពេញ ដោយក្នុងមួយខណ្ឌៗទទួលបានអង្ករ ១០ តោន ដើម្បីបន្តយកទៅចែកជូនទៅឱ្យបងប្អូនប្រជាពលរដ្ឋដែលជួបការលំបាកខ្វះខាត នៅក្នុងមូលដ្ឋានខណ្ឌរបស់ខ្លួន»។
អភិបាលខណ្ឌបឹងកេងកង លោក ធឹម សំអាន ប្រាប់ភ្នំពេញប៉ុស្តិ៍ថា លោកបានចាត់ចែងក្រុមការងារទៅដឹកអង្ករនៅសាលារាជធានីភ្នំពេញ នៅវេលាម៉ោង ៧ ព្រឹក ថ្ងៃទី ២០ ខែមីនា ដើម្បីបន្តចែកជូនបងប្អូនដែលកំពុងខ្វះខាត។
លោកបញ្ជាក់ថា៖ «សម្រាប់ខណ្ឌយើងទទួលបានដូចខណ្ឌផ្សេងៗដែរចំនួន ១០ តោន ហើយខ្ញុំនឹងយកអង្ករនេះចែកជូនពលរដ្ឋដែលក្រីក្រពិតប្រាកដ។ ខ្ញុំចែកជូនរាល់ដងបានទៅដល់ដៃពលរដ្ឋក្រីក្រ ដូចអ្នកកើតកូវីដអីហ្នឹង យើងមិនមើលរំលងគាត់ទេ។ យើងមិនឱ្យមានអ្នកណាអត់ទទួលបានអំណោយទេ នៅក្នុងខណ្ឌខ្ញុំនោះ ហើយបើប្អូនដឹងថា កន្លែងណាក្រខ្សត់ប្រាប់មក ខ្ញុំនឹងចុះទៅចែកអំណោយ»។
កាលពីឆ្នាំ ២០២១ ប្រមុខរាជរដ្ឋាភិបាលកម្ពុជា ធ្លាប់បានផ្តល់អង្ករជូនខណ្ឌទាំង ១៤ ក្នុងរាជធានីភ្នំពេញ ដោយក្នុងមួយខណ្ឌទទួលបានអង្ករ ១០ តោនដូចគ្នា ដើម្បីយកទៅចែកជូនពលរដ្ឋដែលខ្វះខាត។ ក្នុងគ្រានោះដែរ អភិបាលរាជធានីភ្នំពេញ លោក ឃួង ស្រេង បានណែនាំដល់អភិបាលខណ្ឌទាំងអស់ រៀបចំស្បៀងដូចជាអង្ករ មី ចុះចែកជូនពលរដ្ឋដែលខ្វះខាត និងដង្ហោយរកជំនួយ។
លោកបានថ្លែងថា៖ «សូមឱ្យអភិបាលខណ្ឌទាំងអស់ពិនិត្យមើលក្រុមការងារប្រចាំការរៀងខ្លួន ដើម្បីឆ្លើយតបតម្រូវការពលរដ្ឋទាន់ពេលវេលា ដែលកំពុងខ្វះខាតស្បៀងអាហារ»៕
វីដេអូ៖
