.jpg)
ជំនួយវ៉ាក់សាំងនៃសមាជិកប្រទេសអាស៊ានដឹកមកដល់។ រូបថត AKP
ភ្នំពេញៈ វ៉ាក់សាំងកូវីដ ១៩ ប្រភេទ Pfizer ដែលជាជំនួយរបស់ប្រទេសសមាជិកអាស៊ាន និងប្រទេសជាដៃគូ ចំនួនជិត ១៤ ម៉ឺនដូស បានដឹកមកដល់ភ្នំពេញ នៅរសៀលថ្ងៃទី ១៩ ខែមីនា ១ ថ្ងៃក្រោយពីប្រធានាធិបតីចិន ស៊ី ជីនភីង បានប្រកាសផ្ដល់ជំនួយវ៉ាក់សាំងកូវីដ ១៩ ចំនួន ២០ លានដូសថែមទៀត មកដល់រាជរដ្ឋាភិបាលកម្ពុជា។
កម្ពុជានឹងទទួលបានវ៉ាក់សាំងបង្ការជំងឺកូវីដ ១៩ ជាបន្តបន្ទាប់ពីបណ្តាប្រទេសជាមិត្ត និងប្រទេសទ្វេភាគីមួយចំនួនទៀតនៅក្នុងឆ្នាំ ២០២២ នេះចាប់ពីខែមីនាតទៅ ដែលក្នុងនោះរួមមាន ប្រទេសចិន ប្រទេសអ៊ីតាលី និងសហរដ្ឋអាមេរិកផងដែរ ខណៈតែក្នុងខែមីនានេះ កម្ពុជាអាចនឹងទទួលបានវ៉ាក់សាំងចន្លោះពី ៥ ទៅ ៧ លានដូស។
ថវិកាទាំងនេះ ជាការតាំងចិត្តរបស់សមាជិកនៃប្រទេសអាស៊ានទាំងអស់ និងប្រទេសជាដៃគូដែលធ្វើការជាមួយនឹងប្រទេសអាស៊ានទាំងអស់ ដែលក្នុងនោះមានសហរដ្ឋអាមេរិក សហគមន៍អឺរ៉ុប ប្រទេសអូស្ត្រាលី និងប្រទេសកូរ៉េជាដើម ដោយថវិកាប្រមូលបានប្រមាណជា ១៥ លានដុល្លារ ហើយក្នុងនេះក៏ធ្វើការបែងចែកក្នុងប្រទេសអាស៊ានទាំងអស់ផងដែរ។
លោកស្រី យក់ សម្បត្តិ រដ្ឋលេខាធិការក្រសួងសុខាភិបាលបានថ្លែងនៅរសៀលថ្ងៃទី ១៩ ខែមីនា ក្នុងពេលចុះទទួលវ៉ាក់សាំងនេះថា ក្នុងចំណោមប្រទេសសមាជិកអាស៊ាន និងប្រទេសដៃគូ ប្រទេសកម្ពុជា ទទួលបានថវិកាចំនួន ១ លាន ១ សែន ដែលបានបញ្ជាទិញវ៉ាក់សាំងនេះតាមរយៈអង្គការយូនីសេហ្វដែលជាអ្នកធ្វើលទ្ធកម្មជូនកម្ពុជា ដោយទទួលបានវ៉ាក់សាំងចំនួន ១៣៩
២៣០ ដូសនាពេលនេះផងដែរ។
ជាមួយគ្នានេះដែរ នៅក្នុងជំនួបពិភាក្សារវាងលោកនាយករដ្ឋមន្ត្រី ហ៊ុន សែន និងប្រធានាធិបតីចិន លោក ស៊ី ជីនភីង នាថ្ងៃទី ១៨ ខែមីនានេះ តាមរយៈ Video Conference ប្រទេសចិនបានប្រកាសសន្យាផ្តល់វ៉ាក់សាំងកូវីដ ១៩ មកដល់ប្រទេសកម្ពុជា ចំនួនរហូតដល់ ២០ លានដូសផងដែរ។
លោក កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី បានប្រាប់ឱ្យដឹងបន្ទាប់ពីជំនួបនេះថា លោក ស៊ី ជីនភីង បានសន្យាផ្តល់វ៉ាក់សាំងកូវីដ ១៩ មកដល់ប្រទេសកម្ពុជា ចំនួនរហូតដល់ ២០ លានដូស ដែលក្នុងនោះវ៉ាក់សាំងចំនួន ៥ លានដូសនឹងដឹកមកដល់នៅចុងខែមីនា ឆ្នាំ ២០២២ នេះ។
លោកបានបន្តថា៖ «ក្នុងនោះដែរ ប្រធានាធិបតីចិនក៏បានប្រកាសធ្វើការរួមគ្នាជាមួយនឹងភាគីកម្ពុជាក្នុងការបង្កើតរោងចក្រផលិតវ៉ាក់សាំងនាពេលខាងមុខនេះផងដែរ ហើយលោកក៏បានធ្វើការបន្តជំរុញបង្កើនជើងយន្តហោះរវាងប្រទេសទាំង ២ រួមនឹងគម្រោងមួយចំនួនទៀតក្នុងនោះមានដូចជា ផ្លូវ និងការកសាងសាលារៀនជាដើម»។
ក្នុងការពិភាក្សានេះដែរ លោកនាយករដ្ឋមន្ត្រី ហ៊ុន សែន ក៏បានអញ្ជើញលោកប្រធានាធិបតីចិន លោក ស៊ី ជីនភីង មកបំពេញទស្សនកិច្ចនៅប្រទេសកម្ពុជា តាមពេលវេលាសមស្រប ហើយលោក ស៊ី ជិនភីង ក៏បានទទួលយក ដោយលោក ស៊ី ជិនភីង ក៏បានអញ្ជើញលោកនាយករដ្ឋមន្ត្រី ហ៊ុន សែន ទៅទស្សនកិច្ចនៅប្រទេសចិនតាមពេលវេលាសមស្របផងដែរ។
លោកបានមានប្រសាសន៍ថា៖ «សម្តេចតេជោបានថ្លែងអំណរគុណដល់ប្រធានាធិបតីចិន ចំពោះការគាំទ្រកម្ពុជាជាប្រធានអាស៊ាន ក៏ដូចជាការផ្តល់នូវជំនួយមកដល់ប្រទេសកម្ពុជា ជាពិសេសវ៉ាក់សាំងដែលប្រទេសកម្ពុជាកំពុងតែត្រូវការនាពេលនេះផងដែរ»។
បើតាមការលើកឡើងរបស់លោកស្រី យក់ សម្បត្តិ នៅក្នុង ខែមីនានេះ កម្ពុជារំពឹងថា នឹងទទួលបានវ៉ាក់សាំងជាជំនួយទ្វេភាគីពីប្រទេសអ៊ីតាលី និងពីប្រទេសចិន ដែលមានវ៉ាក់សាំងចន្លោះពី ៥ ទៅ ៧ លានដូស ដោយក្នុងនោះកម្ពុជាក៏បន្តទទួលបានវ៉ាក់សាំងតាមយន្តការកូវ៉ាក់ចំនួន ៥ លាន ៥ សែនដូសទៀតដែរ ពីខែមីនានេះ រហូតដល់ចុងខែកញ្ញា ឆ្នាំ ២០២២ នេះ។
លោកស្រីបញ្ជាក់ថា នៅពេលខាងមុខនេះ សហរដ្ឋអាមេរិកនឹងផ្តល់វ៉ាក់សាំងមកកម្ពុជាចំនួន ២ លានដូសបន្ថែមទៀតតាមរយៈយន្តការកូវ៉ាក់។
លោកស្រី យក់ សម្បត្តិ មានប្រសាសន៍ថា៖ «ជំងឺកូវីដ ១៩ មិនចប់ទេ វ៉ាក់សាំងជាចំណែកយុទ្ធសាស្ត្រមួយសំខាន់ណាស់ ដើម្បីការពារជំងឺឆ្លងកូវីដ ១៩។ ដូចនេះការចាក់វ៉ាក់សាំងត្រូវតែបន្តចាក់ដោយរដ្ឋាភិបាលបន្តជំរុញឱ្យមានការចាក់វ៉ាក់សាំងនេះឱ្យបានលឿន ដើម្បីបង្កើតភាពស៊ាំកាន់តែច្រើន ក្នុងការធ្វើឱ្យការចម្លង ក៏ដូចជាការធ្លាក់ខ្លួនទៅក្នុងជំងឺធ្ងន់ធ្ងរនោះនឹងមានការកាត់បន្ថយកាន់តែច្រើនផងដែរ»៕
វីដេអូ៖
