.jpg)
ជំនួបរវាងភាគីកម្ពុជា-មីយ៉ាន់ម៉ា កាលពីដើមខែមករា ឆ្នាំនេះ។ រូបថត SPM
ភ្នំពេញៈ រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិក្នុងនាមជាប្រេសិតពិសេសរបស់ប្រធានអាស៊ានស្តីពីមីយ៉ាន់ម៉ា លោក ប្រាក់ សុខុន នឹងដឹកនាំគណៈប្រតិភូទៅបំពេញទស្សនកិច្ចការងារនៅប្រទេសមីយ៉ាន់ម៉ា ពីថ្ងៃទី ២១ ដល់ថ្ងៃទី ២៣ ខែ មីនា ឆ្នាំ ២០២២ ដើម្បីបង្កើតលក្ខខណ្ឌអំណោយផលឈានទៅបញ្ចប់អំពើហិង្សានៅទីនោះ។
ក្រសួងការបរទេស និងសហប្រតិបត្តិការអន្តរជាតិបានប្រកាសព័ត៌មាននៅថ្ងៃទី ១៨ ខែមីនាថា នៅក្នុងដំណើរទស្សនកិច្ចនេះដែរ គណៈប្រតិភូសំខាន់ៗមួយចំនួនទៀតក៏នឹងរួមដំណើរជាមួយនឹងប្រេសិតពិសេសរបស់ប្រធានអាស៊ានស្តីពីមីយ៉ាន់ម៉ានេះផងដែរ។ ក្នុងនោះមាន លោក ចម ប្រសិទ្ធ រដ្ឋមន្ត្រីក្រសួងឧស្សាហកម្មវិទ្យាសាស្ត្របច្ចេកវិទ្យា និងនវានុវត្តន៍, លោក លឹម ចុក ហ៊ុយ អគ្គលេខាធិការអាស៊ាន, លោក លី យ៉ាម មីង នាយកប្រតិបត្តិនៃមជ្ឈមណ្ឌលសម្របសម្រួលអាស៊ាន ដើម្បីជំនួយមនុស្សធម៌ និងការគ្រប់គ្រងគ្រោះមហន្តរាយ (AHA Centre) និងមន្ត្រីជាន់ខ្ពស់របស់រាជរដ្ឋាភិបាលមួយចំនួនព្រមទាំងបុគ្គលិករបស់លេខាធិការដ្ឋានអាស៊ាន និង AHA Centre ផងដែរ។
ដំណើរទស្សនកិច្ចនេះធ្វើឡើងតបតាមការអញ្ជើញរបស់ភាគីមីយ៉ាន់ម៉ា ក្នុងបំណងបង្កើតលក្ខខណ្ឌអំណោយផលដើម្បីឈានដល់ការបញ្ចប់អំពើហិង្សាក៏ដូចជា ការអត់ធ្មត់ឱ្យបានខ្ពស់បំផុតពីគ្រប់ភាគី, ការចែកជំនួយមនុស្សធម៌ដោយមានការគាំទ្រ និងសម្របសម្រួលពីលេខាធិការដ្ឋានអាស៊ាន និងមជ្ឈមណ្ឌលសម្របសម្រួលអាស៊ាន ដើម្បីជំនួយមនុស្សធម៌ និងការគ្រប់គ្រងគ្រោះមហន្តរាយ និងលើកទឹកចិត្តឱ្យមានកិច្ចពិគ្រោះយោបល់/កិច្ចសន្ទនានយោបាយ ក្នុងចំណោមភាគីពាក់ព័ន្ធ។
សេចក្តីប្រកាសព័ត៌មាននេះ បានបញ្ជាក់ទៀតថា ដំណើរទស្សនកិច្ចនេះនឹងផ្អែកលើឯកសារមូលដ្ឋាននៃកិច្ចព្រមព្រៀងជាឯកច្ឆន្ទ ៥ ចំណុចរបស់អាស៊ាន, លទ្ធផលនៃដំណើរទស្សនកិច្ចការងាររបស់សម្តេចតេជោនាយករដ្ឋមន្ត្រី ហ៊ុន សែន ទៅកាន់ប្រទេសមីយ៉ាន់ម៉ា កាលពីថ្ងៃទី ៧-៨ ខែ មករា ឆ្នាំ ២០២២, លទ្ធផលនៃកិច្ចពិភាក្សារវាងលោកនាយករដ្ឋមន្ត្រី ហ៊ុន សែន និងលោក មីង អ៊ុងឡាំង រួមនឹងលទ្ធផលនៃកិច្ចប្រជុំចង្អៀតរដ្ឋមន្ត្រីការបរទេសអាស៊ាននាពេលថ្មីៗនេះ។
លោក ប៉ា ចន្ទរឿន ប្រធានវិទ្យាស្ថានប្រជាធិបតេយ្យកម្ពុជាបានប្រាប់ ភ្នំពេញ ប៉ុស្តិ៍ នៅថ្ងៃទី ២០ ខែមីនាថា ការធ្វើដំណើរទស្សនកិច្ចរបស់ប្រេសិតពិសេសប្រធានអាស៊ាននៅមីយ៉ាន់ម៉ាលើកនេះជាការបើកទំព័រថ្មីរបស់កម្ពុជាក្នុងនាមប្រធានអាស៊ានប្តូរវេន។
លោកថ្លែងថា៖ «ខ្ញុំជឿជាក់ថា ដំណើរទស្សនកិច្ចនេះ អាចនឹងមានផ្លៃផ្កាច្រើនជាងដំណើរទស្សនកិច្ចដែលប្រមុខរាជរដ្ឋាភិបាលបានធ្វើកាលពីកន្លងទៅ ហើយក៏ជាការភ្ជាប់ទំនាក់ទំនងរវាងប្រធានអាស៊ាន និងមេដឹកនាំប្រទេសភូមា នាពេលបច្ចុប្បន្ននេះសាជាថ្មី ដើម្បីរិះរកច្រកក្នុងការដោះស្រាយវិបត្តិនៅក្នុងប្រទេសភូមាផងដែរ»។
លោក ប៉ា ចន្ទរឿន បានបញ្ជាក់ថា ជាពិសេសដំណើរទេស្សនកិច្ចនេះក៏ជាច្រកមួយ សកម្មភាពមួយ ចាំបាច់ដើម្បីផ្តល់នូវជំនួយមនុស្សធម៌ដល់ប្រជាពលរដ្ឋមីយ៉ាន់ម៉ាដែលកំពុងមានបញ្ហា ពិសេសអ្នកដែលប្រឈមមុខនឹងជំងឺកូវីដ ១៩ ផងដែរ៕
