ភ្នំពេញៈ នគរបាលជំនាញបានកំពុងចាប់ផ្ដើមស្រាវជ្រាវពាក់ព័ន្ធបទល្មើសជួញដូរគ្រឿងញៀន កាលពីថ្ងៃទី ២០ មីនា បន្ទាប់ពីសមត្ថកិច្ចគយឃាត់រថយន្តប្រើស្លាកលេខក្លែងក្លាយ ១ គ្រឿង ជាមួយនឹងបុរសបើករថយន្តម្នាក់ហើយឆែកក្នុងរថយន្តឃើញគ្រឿងញៀនជាង ២០ គីឡូក្រាម នៅថ្ងៃទី ១៨ មីនា នៅស្រុកព្រះស្តេច ខេត្តព្រៃវែង។
លោក មាស វីរិទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀននៃក្រសួងមហាផ្ទៃ ថ្លែងឱ្យដឹងនៅថ្ងៃទី ២០ មីនាថា ករណីគ្រឿងញៀននេះ សមត្ថកិច្ចរបស់លោកកំពុងធ្វើការស្រាវជ្រាវបន្តទៀត ហើយចំពោះបុរសម្នាក់ដែលសមត្ថកិច្ចគយចាប់ខ្លួនបានជាមួយរថយន្ត ១ គ្រឿងនោះ គឺសមត្ថកិច្ចមិនទាន់បញ្ចេញអត្តសញ្ញាណជូនបានទេ។ ជនសង្ស័យបានលាក់គ្រឿងញៀននៅក្នុងរថយន្តហើយពេលសមត្ថកិច្ចគយឃាត់រថយន្ត និងឆែកក្នុងរថយន្តក៏ឃើញគ្រឿងញៀនតែម្តង។
លោកថ្លែងថា៖ «ករណីនេះកម្លាំងជំនាញគ្រឿងញៀនរបស់យើង និងសមត្ថកិច្ចយើងកំពុងបើកការស៊ើបអង្កេតរកអ្នកណាជាម្ចាស់ទំនិញគ្រឿងញៀននោះ»។
លោក មាស វីរិទ្ធ បានបញ្ជាក់ថា ការចរាចរគ្រឿងញៀនបច្ចុប្បន្នស្ទើរមាននៅគ្រប់ប្រទេសក្នុងសកលលោក ហើយកំពុងតែមានកំណើននៃការផលិតគ្រឿងញៀនផង។ ដោយឡែកនៅប្រទេសកម្ពុជា ជនល្មើសបានឆក់ឱកាសក្នុងការធ្វើចរាចរណ៍គ្រឿងញៀននៅពេលដែលប្រទេសមានការបិទខ្ទប់ដោយសារជំងឺកូវីដកន្លងមក។ គ្រឿងញៀនភាគច្រើន ត្រូវបាននាំចេញពីតំបន់ត្រីកោណនៃប្រទេសឡាវ ហើយចូលទៅក្នុងប្រទេសថៃ រួចមកប្រទេសកម្ពុជា។ ករណីមួយទៀតគឺជនល្មើសបានលួចនាំចូលពីប្រទេសឡាវ មកប្រទេសកម្ពុជា ផ្ទាល់តែម្តង។
លោក មាស វិរិទ្ធ បន្តថា៖ «ក្រុមឧក្រិដ្ឋជនគ្រឿងញៀននេះ គេមានបណ្តាញច្រើន អ៊ីចឹងពួកនេះមាននៅគ្រប់ទីកន្លែង»។
លោកថា នៅចុងឆ្នាំ ២០២១ កន្លងមក និងនៅដើមឆ្នាំ ២០២២ នេះ កម្លាំងសមត្ថកិច្ចប្រឆាំងបទល្មើសគ្រឿងញៀនបានរកឃើញកន្លែងផលិតគ្រឿងញៀនធំមួយនៅខេត្តកំពង់ស្ពឺ។
លោក អ៊ិន សុង នាយករងមន្ទីរប្រឆាំងគ្រឿងញៀនបានឱ្យដឹងថា ករណីបទល្មើសគ្រឿងញៀននេះ បន្ទាប់ពីសមត្ថកិច្ចរបស់លោកសហការជាមួយសមត្ថកិច្ចគយហើយបានឃាត់ខ្លួនជនសង្ស័យបានម្នាក់មក គឺសមត្ថកិច្ចជំនាញរបស់លោកកំពុងស្រាវជ្រាវបន្តទៀត ដើម្បីស្វែងរកចាប់ខ្លួនជនពាក់ព័ន្ធ។
លោកប្រាប់ថា៖ «រឿងនេះសមត្ថកិច្ចគយបានឃាត់ខ្លួនបុរសម្នាក់ជាអ្នកបើករថយន្តដែលមានគ្រឿងញៀន។ ប៉ុន្តែពេលនេះខ្ញុំមិនទាន់បានទទួលព័ត៌មានគ្រប់ដែរ ហើយការិយាល័យជំនាញរបស់ខ្ញុំកំពុងតែស៊ើប និងបន្តការស្រាវជ្រាវទៀត»។
ពាក់ព័ន្ធការរកឃើញគ្រឿងញៀននៅក្នុងរថយន្តនេះ បើតាមអគ្គនាយកដ្ឋានគយ និងរដ្ឋាករកម្ពុជាបង្ហាញថា កាលពីថ្ងៃទី ១៨ មីនា ឆ្នាំ ២០២២ សមត្ថកិច្ចគយបានដឹកនាំដោយលោក កើត សុទ្ធារ៉ា អគ្គនាយករងបានឃាត់រថយន្ត ១ គ្រឿង ម៉ាកអូឌី ពាក់ស្លាកលេខក្លែងក្លាយភ្នំពេញ 2AF-4537 នៅចំណុចភូមិឡឹក ឃុំរំចេក ស្រុក ព្រះស្តេច ខេត្តព្រៃវែង និងបុរសអ្នកបើករថយន្តម្នាក់។
អគ្គនាយកដ្ឋានគយបង្ហាញបន្តថា ពេលឃាត់រថយន្តនោះសមត្ថកិច្ចគយបានឆែកនៅក្នុងរថយន្តក៏ឃើញកញ្ចប់គ្រឿងញៀនហើយបានបើកកញ្ចប់ពិនិត្យមើលដោយមាននគរបាលមន្ទីរប្រឆាំងគ្រឿងញៀន និងមានការសម្របសម្រួលផ្លូវច្បាប់ពីលោក ឆាយ ហុង ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញផង។ ក្នុងការពិនិត្យនោះសមត្ថកិច្ចរកឃើញថ្នាំញៀនប្រភេទ MDMA ចំនួន ១៥,៧៤២ ក្រាម ថ្នាំញៀនប្រភេទកេតាមីនចំនួន ៤,៩៩៦ ក្រាម និងថ្នាំញៀនមេតំហ្វេតាមីនចំនួន ១៤,៤ ក្រាម៕