.jpg)
ពិធីបិទបញ្ចប់គម្រោងចំណាកស្រុកឆ្លងដែនដោយសុវត្ថិភាពពីថ្ងៃទី ១៨ មីនា ។ រូបថត គ.ជ.ប.ជ
ភ្នំពេញៈ គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ.) និងអង្គការឃែរអន្ដរជាតិប្រចាំប្រទេសកម្ពុជា ប្រកាសបិទបញ្ចប់គម្រោង “ចំណាកស្រុកឆ្លងដែនដោយសុវត្ថិភាព” ខណៈមន្ត្រីជាន់ខ្ពស់ក្រសួងមហាផ្ទៃជំរុញឱ្យក្រុមគោលដៅនៃគម្រោងក្នុងខេត្តចំនួន ២ បន្តសកម្មភាពផ្សព្វផ្សាយអំពីបញ្ហាចំណាកស្រុក។
គម្រោង “ចំណាកស្រុកឆ្លងដែនដោយសុវត្ថិភាព” ត្រូវបានប្រកាសអនុវត្តកាលពីឆ្នាំ ២០២១ នៅក្នុងស្រុកចំនួន ២ គឺក្នុងស្រុកបសេដ្ឋ ខេត្តកំពង់ស្ពឺ និងស្រុកកំពង់សីលា ខេត្តព្រះសីហនុ ដោយមានកិច្ចសហការរវាងក្រសួងមហាផ្ទៃ និងអង្គការឃែរអន្តរជាតិប្រចាំកម្ពុជា។
គម្រោងនេះ ត្រូវបានប្រកាសបិទបញ្ចប់កាលពីថ្ងៃទី ១៨ ខែ មីនា ឆ្នាំ ២០២២ ដែលមានការចូលរួមពីលោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្រៃ្តយ៍ គ.ជ.ប.ជ តំណាងអង្គការឃែរ រួមទាំងមន្ត្រីពាក់ព័ន្ធក្នុងខេត្តព្រះសីហនុ និងខេត្តកំពង់ស្ពឺ ជិតជាង ៧០ នាក់ នៅសាលាខេត្តកំពង់ស្ពឺ។
លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្រៃ្តយ៍ គ.ជ.ប.ជ បានប្រាប់ ភ្នំពេញ ប៉ុស្តិ៍ នៅថ្ងៃទី ២០ មីនាថា ក្រោយគម្រោងនេះ គឺទទួលបានជោគជ័យលើសពីការគ្រោងទុក ដោយសារមានការចូលរួមពីប្រជាពលរដ្ឋជាច្រើន ខណៈពលរដ្ឋក្នុងគម្រោងបានបន្តផ្សព្វផ្សាយយ៉ាងទូលំទូលាយអំពីការធ្វើចំណាកស្រុកឆ្លងដែនដោយសុវត្ថិភាព។
លោកស្រីបានបញ្ជាក់ថា៖ «គោលបំណងគម្រោងនេះ គឺយើងនឹងប្រាប់គាត់ថា ប្រសិនបើមានការធ្វើទេសន្តប្រវេសន៍ហ្នឹង សុំឱ្យគាត់ជ្រើសយកផ្លូវដែលមានសុវត្ថិភាព គាត់ត្រូវយល់ពីបញ្ហាច្បាប់ និងដឹងអំពីរបៀបរបបនៃការចូលរួមទៅធ្វើការបរទេស និងលក្ខខណ្ឌការងារដែលគាត់ត្រូវបំពេញជាដើម។ យើងបានជោគជ័យ ព្រោះមានការចូលរួមច្រើន»។
លោកស្រី ជូ ប៊ុនអេង បានប្រាប់ទៀតថា គម្រោងនេះ បានបង្កើតឱ្យមានមិត្តអប់រំមិត្តចំនួន ៥២ ក្រុម ស្របពេលដែលប្រទេសថៃ ក៏មានក្រុមនេះចំនួន ៥២ ក្រុម ដើម្បីរួមគ្នាចុះអប់រំអំពីការធ្វើចំណាកស្រុកឆ្លងដែនដោយសុវត្ថិភាព ចៀសវាងប្រឈមនឹងគ្រោះថ្នាក់ និងការធ្វើចំណាកស្រុកដោយខុសច្បាប់ផងដែរ។
លោកស្រីបានអះអាងថា៖ «បើទោះជាគម្រោងនេះ ត្រូវបានបញ្ចប់ដោយសារតែអង្គការឃែរបានបញ្ចប់គម្រោងរបស់គេ ក៏ការងារដែលយើងបានបង្កើតក្រុមមិត្តអប់រំមិត្តនៅក្នុងស្រុកទាំង ២ នេះ នៅបន្តដើម្បីបន្តផ្សព្វផ្សាយទៅកាន់ពលរដ្ឋរបស់យើងឱ្យបញ្ឈប់ការឆ្លងដែនដោយខុសច្បាប់ និងប្រថុយប្រថានទៅរកការងារធ្វើនៅក្រៅប្រទេស»៕
