.jpg)
ក្រុមជនសង្ស័យនិងវត្ថុតាងដែលសមត្ថកិច្ចចាប់បាននៅខេត្តកំពង់ស្ពឺថ្មីៗនេះ ។ រូបថត ប៉ូលិស
ព្រះសីហនុៈកងរាជអាវុធហត្ថខេត្តព្រះសីហនុកំពុងរៀបចំបញ្ជូនជនសង្ស័យប្រុសស្រី៣៥នាក់(ស្រីម្នាក់)ទៅតុលាការនៅថ្ងៃទី២២មីនាជាមួយវត្ថតាងគ្រឿងញៀន៦៨កញ្ចប់តូចបន្ទាប់ពីសហការចាប់ខ្លួនបាន៥ថ្ងៃ ករណីជួញដូរ រក្សាទុកនិងប្រើប្រាស់គ្រឿងញៀន ប្រព្រឹត្តនៅភូមិ៦ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។
លោក ឡុង គឹមហួរ នាយការិយាល័យប្រឆាំងបទល្មើសគ្រឿងញៀននៃបញ្ជាការដ្ឋានកងរាជអាវុធហត្ថខេត្តព្រះសីហនុប្រាប់នៅថ្ងៃទី២១មីនាថា សមត្ថកិច្ចរបស់លោកគ្រោងបញ្ជូនជនសង្ស័យចំនួន៣៥នាក់(ស្រីម្នាក់) ទៅសាលាដំបូងខេត្តព្រះសីហនុនៅថ្ងៃទី២២មីនា ពាក់ព័ន្ធបទប្រើប្រាស់ រក្សាទុក និងជួញដូរគ្រឿងញៀន។ ក្រុមជនសង្ស័យទាំងនេះមានអាយុ១៧ឆ្នាំម្នាក់ ហើយក្រៅពីនេះអាយុចន្លោះពី១៨ឆ្នាំរហូតដល់អាយុ៦២ឆ្នាំ។
លោកថ្លែងថា៖«ដោយសារតែចំនួនជនសង្ស័យច្រើន ហេតុដូច្នេះហើយសមត្ថកិច្ចរបស់យើងទើបតែបំពេញនីតិវិធីចប់នៅថ្ងៃនេះ(ថ្ងៃទី២១មីនា)ហើយយើងគ្រោងបញ្ជូនពួកគេទៅតុលាការនៅថ្ងៃស្អែក(ថ្ងៃទី២២មីនា)
នេះហើយ»។
លោកបញ្ជាក់ថាការបង្ក្រាបបទល្មើសគ្រឿងញៀននេះតាមពិតទៅគឺជាទឹកដីខេត្តកំពង់ស្ពឺ តែសមត្ថកិច្ចអាវុធហត្ថរបស់លោកបានសហការជាមួយអាវុធហត្ថខេត្តកំពង់ស្ពឺសុំពន្លាតដែនសមត្ថកិច្ចដើម្បីចាប់ជនល្មើសទាំងនោះព្រោះមុនមានការបង្ក្រាបនេះ សមត្ថកិច្ចចាប់បានពួកគេមួយចំនួនក្នុងទឹកដីខេត្តព្រះសីហនុ។ក្រុមជនសង្ស័យជាប់ពាក់ព័ន្ធបទរក្សាទុក ជួញដូរ និងប្រើប្រាស់គ្រឿងញៀន។
លោកគឹមហួរ បានឱ្យដឹងថា កន្លងមក កម្លាំងអាវុធហត្ថរបស់លោកធ្លាប់ចាប់បានជនសង្ស័យមួយចំនួនមកហើយដែលពាក់ព័ន្ធនឹងទីតាំងក្នុងភូមិសាស្ត្រខាងលើ។ពេលខ្លះសមត្ថកិច្ចលោកស្លៀកពាក់ឯកសណ្ឋានទៅទិញថ្នាំញៀននៅទីនោះទៀតក៏នៅតែពួកគេមិនខ្លាចសមត្ថកិច្ចដែរ។ទីតាំងដីឡូត៍១កន្លែងនោះគឺជាទីតាំងជួញដូរ និងប្រើប្រាស់គ្រឿងញៀនយ៉ាងសេរី ទើបនៅថ្ងៃទី១៧ មីនា កម្លាំងជំនាញរបស់លោកសុំគោលការណ៍ពីលោកឧត្តមសេនីយ៍ត្រី ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុ និងមានការសម្របសម្រួលផ្លូវច្បាប់ពីអយ្យការអមសាលាដំបូងខេត្តព្រះសីហនុចុះបង្ក្រាបតែម្តង។
លោកបានបន្ថែមថា សមត្ថកិច្ចនៅមិនអាចបែងចែកជនទាំង៣៥នាក់នោះឱ្យដាច់ពីគ្នាថាអ្នកណាជាអ្នកជួញដូរ និងអ្នកណាជាអ្នកប្រើប្រាស់គ្រឿងញៀននោះទេ ព្រោះពួកគេជាអ្នកជក់ថ្នាំផងនិងជាអ្នកលក់គ្រឿងញៀនផង។ ជនខ្លះជាអ្នកប្រើប្រាស់ហើយបានទិញថ្នាំញៀនឱ្យគ្នីគ្នាបន្តទៀតដែលករណីនេះក៏ជាអ្នកជួញដូរដែរ។
ចំពោះវត្ថុតាងដែលសមត្ថកិច្ចរឹបអូសបាន រួមមាន ថ្នាំញៀនមេតំហ្វេតាមីនចំនួន៦៨កញ្ចប់ ថ្នាំគ្រាប់ពណ៌ក្រហមចំនួន១០គ្រាប់ ខ្សៀសម្រាប់ជក់៥ ដបសម្រាប់ជក់៤ កន្រ្តៃចំនួន៣ កាំភ្លើងខ្លីម៉ាកK59 មួយដើមមានគ្រាប់ចំនួន៦គ្រាប់ ម៉ូតូចំនួន១០គ្រឿង ទូរស័ព្ទដៃ១៣គ្រឿង ផៅវើប៊ែងចំនួន២ ដាវ១ កាំបិតបុ័ងតោ១ និង លុយចំនួន១២ម៉ឺនរៀល។
លោកបន្តថា៖«នៅទីតាំងនោះយើងបានចុះចាប់ប៉ុន្មានឆ្នាំមកហើយ តែពួកគេហាក់មិនញញើតសមត្ថកិច្ចយើងទេ។យើងជាសមត្ថកិច្ចស្លៀកពាក់ឯកសណ្ឋានក៏ពួកគេនៅតែហ៊ានលក់ឱ្យយើងទៀត។យើងសាកល្បងបែបនេះ២ទៅ៣លើកមកហើយ ពួកគេនៅមិនតែខ្លាចច្បាប់»៕
