.jpg)
យុវជនជាប់ចោទ ២ នាក់ ក្នុងចំណោម ៤ នាក់។ រូបថត នគរបាល
សៀមរាបៈ យុវជន ២ នាក់ ក្នុងចំណោម ៤ នាក់ មានវ័យពី ១៥-១៧ ឆ្នាំ ដែលព្រួតគ្នាចាប់រំលោភសេពសន្ថវៈយុវតីអាយុ ១៦ ឆ្នាំម្នាក់ បានសម្រេចនៅឃុំស្រែណូយ ស្រុកវ៉ារិន ត្រូវបានតុលាការធ្វើការចោទប្រកាន់ និងឃុំខ្លួន នៅពន្ធនាគារខេត្ត កាលពីថ្ងៃទី ២០ មីនា បន្ទាប់ពីនគរបាលចាប់ខ្លួន និងបញ្ជូនដល់សាលាដំបូងខេត្តសៀមរាបបាន ១ ថ្ងៃ។
លោក យិន ស្រាង អ្នកនាំពាក្យតុលាការខេត្តសៀមរាបឱ្យដឹងនៅថ្ងៃទី ២១ មីនាថា យុវជនត្រូវចោទឈ្មោះ ផើង ស៊ីផូ អាយុ ១៦ ឆ្នាំ និង បាន ប៊ូន អាយុ ១៧ ឆ្នាំត្រូវបានចៅក្រមសម្រេចចេញដីកាឃុំខ្លួនបណ្តោះអាសន្នក្នុងពន្ធនាគារខេត្តកាលពីថ្ងៃទី ២០ មីនា។ ពួកគេរស់នៅភូមិត្រពាំងក្រសាំង ឃុំស្រែណូយ ស្រុកវ៉ារិន។ លោកថា៖ «ជនទាំង ២ នាក់ត្រូវចោទពីបទរំលោភសេពសន្ថវៈមានស្ថានទម្ងន់ទោសតាមមាត្រា ២៤១ នៃក្រមព្រហ្មទណ្ឌ»។
បើតាមមាត្រា ២៤១ នៃក្រមព្រហ្មទណ្ឌនេះ ប្រសិនបើតុលាការរកឃើញថា ជនត្រូវចោទទាំង ២ នាក់ពិតជាបានប្រព្រឹត្តមែននោះនឹងត្រូវផ្តន្ទាទោសដាក់ពន្ធនាគារពី ៧ ដល់ ១៥ ឆ្នាំ។
លោក សុខ សុខុន នាយនគរបាលប៉ុស្តិ៍ឃុំស្រែណូយ ប្រាប់នៅថ្ងៃទី ២១ មីនាតាមសម្តីរបស់យុវជនសង្ស័យថា កាលពីថ្ងៃទី ១៧ ខែឧសភា ឆ្នាំ ២០២១ និងក្នុងអំឡុងខែកញ្ញា ឆ្នាំ ២០២១ ពួកគេមានគ្នា ៤ នាក់ហើយបានព្រួតគ្នាចាប់យុវតីម្នាក់ឈ្មោះ ថ.ប អាយុ ១៦ ឆ្នាំ រំលោភបានសម្រេចគ្រប់ៗគ្នានៅក្នុងដីឡូត៍មួយកន្លែង។ ប៉ុន្តែថ្ងៃក្រោយៗមក ពួកគេមិនបានធ្វើអ្វីជាមួយនារីរងគ្រោះទៀតទេ។
លោកបន្តថា មុនមានរឿងនេះកើតឡើង គឺនារីរងគ្រោះបានរស់នៅជាមួយយាយរបស់នាងនៅឃុំ-ស្រុកផ្សេងមិនបានរស់នៅជាមួយម្តាយឪពុក នៅភូមិត្រពាំងក្រសាំង ឃុំស្រែណូយ ស្រុកវ៉ារិនទេ។ ប៉ុន្តែដោយសារយាយនាងគ្រប់គ្រងលែងបាន និងមិនស្តាប់បង្គាប់ការទូន្មានប្រៀនប្រដៅរបស់យាយទើបត្រូវយាយរបស់នាងយកមកប្រគល់ឱ្យម្តាយវិញនៅឃុំស្រែណូយ ស្រុកវ៉ារិន។ ក្រោយពីយុវតីរងគ្រោះរស់នៅជាមួយម្តាយឪពុកមិនបានទៀតក៏ម្តាយយកនាងទៅដាក់នៅក្នុងមណ្ឌលស្ត្រីមានវិបត្តិខេត្តសៀមរាបហើយក៏បែកការណ៍ទើបខាងមណ្ឌលនាំនារីរងគ្រោះ មកអធិការដ្ឋាននគរបាលស្រុកវ៉ារិន ដាក់ពាក្យបណ្តឹងនៅថ្ងៃទី ១៩ មីនា ឆ្នាំ ២០២២។ ពេលប្តឹងនោះនារីរងគ្រោះបានប្រាប់សមត្ថកិច្ចថា មនុស្សដែលចាប់នាងរំលោភ មិនមែន ២ នាក់ទេ គឺ ៤ នាក់ឯណោះ។ បន្ទាប់ពីសមត្ថកិច្ចទទួលបានព័ត៌មាននេះមក ក៏ចាត់កម្លាំងចុះស្រាវជ្រាវចាប់ខ្លួនយុវជនសង្ស័យបាន ២ នាក់ នៅថ្ងៃទី ១៩ មីនា រីឯ ២ នាក់ទៀតរត់គេចខ្លួនបាត់។ «ទាំងនារីរងគ្រោះទាំងក្មេង ៤ នាក់នោះ សុទ្ធតែមានអាយុស្របាលៗគ្នាពី ១៥ ឆ្នាំដល់អាយុ ១៧ ឆ្នាំ។ យើងចាប់បាន ២ នាក់ ឯ ២ នាក់គេចខ្លួន សមត្ថកិច្ចកំពុងតាមចាប់»៕
