.jpg)
សកម្មភាពមុជទឹករបស់មន្ត្រីជំនាញ និងគ្រាប់ដែលស្រង់បានពីថ្ងៃទី ១៦-១៧ មីនា។ រូបថត Heng Ratana Page
ព្រៃវែងៈ កម្លាំងជំនាញបោសសម្អាតគ្រាប់សំណល់សង្គ្រាមក្រោមទឹកក្នុងទន្លេមេគង្គរបស់អង្គភាពស៊ីម៉ាក់បានរុករកឃើញ និងស្រង់គ្រាប់មិនទាន់ផ្ទុះពីនាវាដែលដឹកនាំគ្រាប់ ហើយផ្ទុះលិចនៅក្នុងបាតទន្លេបានចំនួនជិត ២០០ គ្រាប់ ក្នុងរយៈពេល ២ ថ្ងៃកាលពីថ្ងៃទី ១៦-១៧ ខែមីនា ឆ្នាំ ២០២២ នៅក្នុងភូមិពាមរាំង ឃុំពាមរាំង ស្រុកពាមជរ ខេត្តព្រៃវែង។
លោក ហេង រតនា អគ្គនាយកនៃមជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) ប្រាប់ភ្នំពេញប៉ុស្តិ៍នៅថ្ងៃទី ២០ ខែមីនាថា គ្រាប់ជិត ២០០ គ្រាប់ដែលកម្លាំងជំនាញរកឃើញ និងស្រង់បានពីក្នុងទឹកក្នុងប្រតិបត្តិការរយៈពេល ២ ថ្ងៃគឺមានគ្រាប់មួយចំនួនធំ ក្នុងចំណោមនោះនៅមានប្រសិទ្ធភាពកម្រិតខ្ពស់ ដោយគ្រាប់ទាំងអស់នេះជាប្រភេទ 76M,29M និង 100M។
លោកបានឱ្យដឹងថា គ្រាប់ទាំងនេះត្រូវបានដឹកជញ្ជូនតាមនាវាឆ្លងកាត់ទន្លេមេគង្គពីប្រទេសវៀតណាមយកមកប្រើប្រាស់ក្នុងសង្គ្រាមនៅកម្ពុជាក្នុងចន្លោះពីឆ្នាំ ១៩៧០ ទៅ ១៩៧៥ ក៏ប៉ុន្តែនាវានោះត្រូវបានគេទម្លាក់គ្រាប់បែកបំផ្ទុះ ដើម្បីពន្លិចចោល ដោយសារតែកម្លាំងខ្មែរក្រហមបានវាយស្កាត់ដើម្បីយកគ្រាប់ទាំងនេះ។ ដូច្នេះកម្លាំងទ័ពរបស់ លន់ នល់ ដែលទទួលបានជំនួយ និងគាំទ្រពីសហរដ្ឋអាមេរិក ក៏បានពន្លិចនាវានេះចោលនៅទីតាំងខាងលើតែម្ដង។
លោកបានថ្លែងថា៖ «កម្លាំងជំនាញបានរកឃើញនូវចំណែកនៃនាវាធំៗ។ ដូច្នេះយើងសន្និដ្ឋានថា នាវានេះត្រូវបានបំផ្ទុះ មុនពេលវាលិចចូលទៅក្នុងទឹក»។
បើតាម លោក ហេង រតនា ប្រទេសកម្ពុជាបានជួបបញ្ហាប្រឈមជាច្រើនពាក់ព័ន្ធនឹងគ្រាប់មិនទាន់ផ្ទុះនៅក្នុងទឹកនិងនៅលើគោក ដោយសារសង្គ្រាមមានរយៈពេលជាង ៣០ ឆ្នាំ។ ដូច្នេះបានធ្វើឱ្យមានផលវិបាកក្នុងការរុករក និងសម្អាត ដែលត្រូវការពេលវេលាច្រើនបន្ថែមទៀត។ ក្នុងប្រតិបត្តិការរុករកគ្រាប់នេះកម្លាំងជំនាញបានប្រមូលគ្រាប់មិនទាន់ផ្ទុះនៅលើគោកបានចំនួនជាង ៤ លានគ្រាប់ និងនៅក្នុងទឹកក៏យកបានច្រើនដែរ។
លោកបញ្ជាក់ទៀតថា ការយកគ្រាប់ចេញពីក្នុងទឹក និងនៅលើគោកនេះត្រូវបានទទួលគោលការណ៍ពីលោកនាយករដ្ឋមន្ត្រី ហ៊ុន សែន និងលោក ស ខេង ក្នុងគោលបំណងដើម្បីអភិវឌ្ឍប្រទេសឱ្យមានសន្តិសុខកាន់តែប្រសើរមួយកម្រិតទៀត និងធានាសុខសុវត្ថិភាពជូនប្រជាពលរដ្ឋនៅទូទាំងប្រទេស។
លោកនាយករដ្ឋមន្ត្រី ហ៊ុន សែន កាលពីថ្ងៃទី ២៨ ខែសីហា ឆ្នាំ ២០២០ បានសម្រេចបង្កើតក្រុមការងារអន្តរក្រសួងដើម្បីចុះសិក្សា និងដោះស្រាយករណីរកឃើញគ្រាប់យុទ្ធភណ្ឌមិនទាន់ផ្ទុះក្នុងនាវាដែលលិចក្នុងទន្លេមេគង្គដើម្បីសន្តិសុខ និងសុវត្ថិភាពជូនប្រជាពលរដ្ឋនៅទូទាំងប្រទេសកម្ពុជា។
តាមរបាយការណ៍ចុះសិក្សាស្រាវជ្រាវជាបន្តបន្ទាប់របស់កម្លាំងជំនាញបានបង្ហាញថា វត្តមាននាវាចម្បាំង និងការគំរាមកំហែងដោយគ្រាប់យុទ្ធភណ្ឌមិនទាន់ផ្ទុះនៅក្រោមទឹកដែលត្រូវបានលិចនៅតាមដងទន្លេមេគង្គមានចំនួន ៥ ទីតាំង ក្នុងនោះការដ្ឋានទី ១ ស្ថិតស្រុកស្រីសន្ធរ ខេត្តកំពង់ចាមបានបិទបញ្ចប់ក្រោយកិច្ចការស្រង់នាវារួចរាល់។ ចំណែក ៤ ទីតាំងទៀតស្ថិតក្នុងភូមិសាស្ត្រស្រុកល្វាឯម និងស្រុកខ្សាច់កណ្ដាល ខេត្តកណ្ដាល និងស្រុកពាមជរ ស្រុកពាមរក៍ ខេត្តព្រៃវែង ដែលនាវាទាំងនោះបានលិចនៅក្នុងសម័យសង្គ្រាមស៊ីវិលចន្លោះឆ្នាំ ១៩៧០ ដល់ ១៩៧៥៕
