.jpg)
រដ្ឋមន្ត្រី និងមន្ត្រីសុខាភិបាល ព្រមទាំងតំណាង WHO ក្នុងពិធីនៅថ្ងៃទី ២២ មីនា។ រូបថត ក្រសួងសុខាភិបាល
ភ្នំពេញៈ កម្ពុជាបានចាប់ផ្ដើមបើកយុទ្ធនាការជាតិប្រយុទ្ធប្រឆាំងនឹងជំងឺកូវីដ ១៩ លើកទី ២ នៅទូទាំងប្រទេស នាថ្ងៃទី ២២ ខែមីនាឆ្នាំ ២០២២ក្រោមប្រធានបទ «វីរុសកូវីដ ១៩ បំប្លែងថ្មីអូមីក្រុង ឆ្លងលឿនខ្លាំងជាងមុនអាចបង្កឱ្យមានហានិភ័យធ្ងន់ធ្ងរដល់អ្នក និងគ្រួសារ» ខណៈដែលចំនួនអ្នកស្លាប់ដោយសារមេរោគកូវីដ ១៩ បំប្លែងថ្មីនេះមានរហូតដល់ជាង ៥០ នាក់។
យោងតាមសេចក្តីប្រកាសព័ត៌មានរបស់ក្រសួងសុខាភិបាលបានលើកឡើងថា វីរុសកូវីដ ១៩ ប្រភេទអូមីក្រុងបានចូលមកក្នុងប្រទេសកម្ពុជានៅពាក់កណ្តាលខែធ្នូ ឆ្នាំ ២០២១ ដែលរហូតមកដល់ពេលនេះ ករណីឈឺ និងស្លាប់នៅតែរកឃើញមានជាបន្តបន្ទាប់ជារៀងរាល់ថ្ងៃ។ គិតចាប់ពីថ្ងៃទី ១៤ ខែធ្នូ ឆ្នាំ ២០២១ ដល់ថ្ងៃទី ១២ ខែមីនា ឆ្នាំ ២០២២ កម្ពុជាបានរកឃើញអ្នកមានវិជ្ជមានវីរុសកូវីដ ១៩ ប្រភេទអូមីក្រុង សរុបទាំងអស់ចំនួន ១៣ ៥៦១ នាក់ និងមានអ្នកស្លាប់ចំនួន ៥១ នាក់។
ក្រសួងសុខាភិបាលសង្កត់ធ្ងន់ថា៖ «យោងតាមលទ្ធផលនេះ បង្ហាញឱ្យយើងឃើញថា ប្រសិនបើបុគ្គលនៅតែបន្តមានការធ្វេសប្រហែស វីរុសអូមីក្រុង និងបន្តរាតត្បាតវាយលុកចូលក្នុងសហគមន៍របស់យើង ដែលទាមទារឱ្យមានវិធានការរួមផ្សំគ្នាជាច្រើន និងទាមទារឱ្យមានការរួបរួមគ្នា ដើម្បីអាចទប់ស្កាត់ការចម្លងនេះបាន»។
រដ្ឋមន្ត្រីក្រសួងសុខាភិបាល លោក ម៉ម ប៊ុនហេង បានអំពាវនាវទៅដល់ប្រជាពលរដ្ឋទាំងអស់សូមបន្តអនុវត្តវិធានការបង្ការជំងឺកូវីដ ១៩ «៣ ការពារ និង ៣ កុំ» បូករួមនឹងការចាក់វ៉ាក់សាំងទាំងដូសមូលដ្ឋានដូសទី ៣ ឬដូសជំរុញ និងដូសទី ៤ នៅពេលដែលដល់វេនត្រូវចាក់។
លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស បានថ្លែងនៅក្នុងពិធីបើកយុទ្ធនាការជាតិប្រយុទ្ធនឹងជំងឺកូវីដ ១៩ ថា ការធ្វើយុទ្ធនាការនេះ ដើម្បីក្រើនរំឭក ពញ្ញាក់ស្មារតីប្រជាពលរដ្ឋ ជាពិសេសគឺការទទួលខុសត្រូវរបស់បុគ្គល គ្រួសារ និងអ្នកពាក់ព័ន្ធផ្សេងទៀត ចូលរួមសហការគ្នាដើម្បីទប់ស្កាត់ការឆ្លងវីរុសកូវីដ ១៩។
លោកស្រីមានប្រសាសន៍ថា៖ «យើងចង់ឱ្យប្រជាពលរដ្ឋផ្លាស់ប្តូរទស្សនៈ និងការយល់ច្រឡំមួយចំនួនដែលយល់ថា វីរុសកូវីដ ១៩ ប្រភេទអូមីក្រុង គឺជាជំងឺស្រាលៗដូចទៅនឹងជំងឺផ្តាសាយធម្មតាៗ ប៉ុន្តែតាមលក្ខណពិសេសរបស់ជំងឺកូវីដ ១៩ ប្រភេទអូមីក្រុងនេះ គឺមិនមែនជាជំងឺសាមញ្ញពេកនោះឡើយ»។
នាឱកាសនោះដែរ លោកស្រី លី អៃឡែន តំណាងអង្គការសុខភាពពិភពលោកប្រចាំកម្ពុជាក៏បានថ្លែងដែរថា ជំងឺកូវីដ ១៩ នេះ មិនទាន់ចប់នៅឡើយទេ ប៉ុន្តែប្រសិនបើប្រជាពលរដ្ឋនៅតាមបណ្តាប្រទេសទាំងអស់នៅលើពិភពលោកចូលរួមអនុវត្តតាមវិធានការរបស់អង្គការសុខភាពពិភពលោក និងក្រសួងសុខាភិបាលនៅតាមប្រទេសនីមួយៗដែលដាក់ចេញ នោះជំងឺរាតត្បាតនេះនឹងអាចចប់ទៅក្នុងពេលណាមួយជាមិនខាន។
លោកស្រីបន្ថែមទៀតថា សកម្មភាពរួមគ្នានៅថ្ងៃនេះនឹងជួយទប់ស្កាត់មិនឱ្យមានការឆ្លងរាលដាលក្នុងទ្រង់ទ្រាយធំនៅថ្ងៃស្អែក និងក្នុងពេលអនាគត។
លោកស្រីមានប្រសាសន៍ថា៖ «ខ្ញុំមានមោទនភាពយ៉ាងខ្លាំង ចំពោះប្រទេសកម្ពុជាដែលកំពុងតែឆ្លើយតបបានយ៉ាងល្អ ចំពោះការកើនឡើងនូវករណីនៃកូវីដ ១៩ ដោយគ្រប់គ្នារាប់តាំងពីមន្ត្រីជាន់ខ្ពស់នៃក្រសួងសុខាភិបាលរហូតដល់បុគ្គលិកថែទាំសុខភាព និងបុគ្គលម្នាក់ៗ ចំពោះការខិតខំប្រឹងប្រែងនៅទូទាំងប្រទេសដែលធ្វើឱ្យមានលទ្ធផលដល់ការការពារខ្លួនយើង សហគមន៍ និងជនងាយរងគ្រោះពីជំងឺកូវីដ ១៩ នេះ»។
នាឱកាសនោះដែរ តំណាងអង្គការយូនីសេហ្វប្រចាំប្រទេសកម្ពុជា លោកស្រី ហ្វ័ររូ ហ្វ័រយូហ្សាត ក៏បានលើកឡើងផងដែរថា ភាពជោគជ័យរបស់រាជរដ្ឋាភិបាលកម្ពុជាក្នុងការប្រយុទ្ធនឹងជំងឺកូវីដ ១៩ គឺយុទ្ធនាការសុខភាពសាធារណៈប្រកបដោយការប្តេជ្ញាចិត្ត និងលក្ខណៈទូលំទូលាយ រាប់ទាំងវីដេអូ និងផ្ទាំងផ្សព្វផ្សាយនៅគ្រប់សហគមន៍ផងដែរ។
លោកស្រីបានថ្លែងថា៖ «ដើម្បីការពារគ្រួសាររបស់យើង សហគមន៍របស់យើង និងប្រជាពលរដ្ឋ ដែលងាយរងគ្រោះបំផុត យើងមិនត្រូវបោះបង់ចោលការអនុវត្តល្អៗដែលនាំឱ្យយើងទទួលបាននូវស្ថានភាពល្អប្រសើរនៅពេលនេះទេ។ គ្រប់ៗគ្នាមានតួនាទីសំខាន់ក្នុងការការពារការឆ្លងរីករាលដាលជំងឺកូវីដ-១៩នេះ»។
លោកស្រី ហ្វ័ររូ ហ្វ័រយូហ្សាត បានបន្ថែមថា គ្រប់គ្នាត្រូវបន្តចូលរួមដោយឧស្សាហ៍ព្យាយាម ទប់ស្កាត់នូវការរាតត្បាតនេះដើម្បីចៀសផុតពីការឆក់យកជីវិតមនុស្សបន្ថែមទៀត ដោយត្រូវបន្តអនុវត្តនូវវិធានការ ៣ ការពារ និង ៣ កុំនៅគ្រប់ពេលវេលា និងគ្រប់ទីកន្លែងដែលបានទៅ៕
វីដេអូ៖
