ភ្នំពេញៈ ក្នុងទិវាព្រៃឈើពិភពលោក ២១ មីនា ឆ្នាំ ២០២២ ក្រោម ប្រធានបទ «ព្រៃឈើ និងនិរន្តរភាពនៃការផលិត និងការប្រើប្រាស់» នេះ ប្រទេសកម្ពុជាបានតាំងចិត្តខ្ពស់ប្រកបដោយមហិច្ឆតាក្នុងការកាត់បន្ថយការបាត់បង់ព្រៃឈើស្របនឹងយុទ្ធសាស្ត្ររេដបូក ហើយរួមបញ្ចូលទាំងការអភិវឌ្ឍវិស័យព្រៃឈើប្រកបដោយនិរន្តរភាព។ នេះបើតាមមន្ត្រីនាំពាក្យក្រសួងបរិស្ថាន។
លោក នេត្រ ភក្ត្រា អ្នកនាំពាក្យក្រសួងបរិស្ថានប្រាប់ភ្នំពេញប៉ុស្តិ៍នៅថ្ងៃទី ២២ មីនាថា ក្រសួងបរិស្ថានសាទរចំពោះទិវាព្រៃឈើពិភពលោក ២១ មីនា ដែលបានធ្វើឡើងជារៀងរាល់ឆ្នាំ។ សម្រាប់ឆ្នាំនេះ កម្ពុជាបានប្តេជ្ញាដាក់ឱ្យដំណើរការនូវប្រព័ន្ធត្រួតពិនិត្យព្រៃឈើជាតិ និងប្រព័ន្ធព័ត៌មានសុវត្ថិភាពបរិស្ថាន និងសង្គម។
ការដាក់ដំណើរការនេះ គឺសម្រាប់ ការអនុវត្តគម្រោងកាត់បន្ថយការបញ្ចេញឧស្ម័នផ្ទះកញ្ចក់ពីការបាត់បង់ និងរេចរឹលព្រៃឈើ (REDD+) និងកំណត់គោលដៅកាត់បន្ថយអត្រានៃការបាត់បង់ព្រៃឈើមកត្រឹមពាក់កណ្តាល នៅត្រឹមឆ្នាំ ២០៣០ ក្នុងវិស័យព្រៃឈើ និងការប្រើប្រាស់ដី (FOLU) ស្របតាមយុទ្ធសាស្ត្ររេដបូកជាតិកម្ពុជា។
លោក នេត្រ ភក្ត្រា ប្រាប់ថា៖ «រាជរដ្ឋាភិបាលកម្ពុជា និងដៃគូបាននិងកំពុងស្វះស្វែងរកទីផ្សារថ្មីៗបន្ថែមទៀត ដើម្បីលក់ឥណទានកាបូនដែលកម្ពុជាមាន យកថវិកាមកបង្កើន និងពង្រឹងការងារការពារ និងអភិរក្សធនធានធម្មជាតិដែលមាន។ នេះគឺជាមោទនភាពមួយសម្រាប់ព្រះរាជាណាចក្រកម្ពុជាដែលជោគជ័យក្នុងការលក់ឥណទានកាបូនក្នុងទីផ្សារស្ម័គ្រចិត្តនៅលើពិភពលោក»។
បើតាមក្រសួងបរិស្ថាន កម្ពុជាបច្ចុប្បន្នមានផ្ទៃដីអភិរក្សទំហំ ៧,៣ លានហិកតា ឬស្មើប្រមាណ ៤១% នៃប្រទេសកម្ពុជា។ ដោយសារកត្តាសុខសន្តិភាព និងការការពារ និងអភិរក្សមានភាពប្រសើរឡើងចំពោះតំបន់ការពារធម្មជាតិ កម្ពុជាបានលក់ឥណទានកាបូនទៅឱ្យក្រុមហ៊ុនអន្តរជាតិធំៗ ចាប់ពីឆ្នាំ ២០១៦ ដល់ឆ្នាំ ២០២០ បានទឹកប្រាក់ចំនួន ១១,៦ លានដុល្លារអាមេរិក។
រាជរដ្ឋាភិបាលកម្ពុជា តាមរយៈក្រសួងបរិស្ថានបានយកចិត្តទុកដាក់ខ្ពស់លើការការពារ និងអភិរក្ស ធនធានធម្មជាតិដោយថែរក្សាព្រៃឈើ ដែលដើរតួនាទីសំខាន់ក្នុងការការពារប្រព័ន្ធអេកូឡូស៊ីនៃភពផែនដី តាមរយៈការលក់ឥណទានកាបូនក្នុងទីផ្សារកាបូនស្ម័គ្រចិត្ត។ ថវិកាដែលបានមកពីការលក់ឥណទានកាបូន ត្រូវបានយកទៅប្រើប្រាស់គាំពារលើការងារ អភិរក្ស និងការបង្កើតសេដ្ឋកិច្ចសម្រាប់ប្រជាសហគមន៍ តំបន់ការពារធម្មជាតិនៅតំបន់នោះ។
លោក នេត្រ ភក្ត្រា បញ្ជាក់ថា៖ «យើងនៅតែបន្តកិច្ចខិតខំប្រឹងប្រែង នៅក្នុងការការពារ អភិរក្សធនធានធម្មជាតិដែលកម្ពុជានៅមាន ហើយយើងនឹងនៅតែបង្កើននូវការលើកទឹកចិត្តឱ្យមានការដាំស្តារឡើងវិញនូវព្រៃឈើដែលរេចរឹល និងការចូលរួមក្នុងការស្វែងរកដំណោះស្រាយ ដោយបង្កើនសេដ្ឋកិច្ចមូលដ្ឋាន បង្កើតចំណូលដល់ប្រជាសហគមន៍ដែលរស់នៅជុំវិញតំបន់ការពារធម្មជាតិ»។
មន្ត្រីនាំពាក្យរូបនេះ បន្ថែមថា បទល្មើសធនធានធម្មជាតិ នៅតែកើតមាន តែជាបទល្មើសខ្នាតតូច ឯបទល្មើសខ្នាតធំ លែងមានហើយ។
បទល្មើសទាំងនេះពាក់ព័ន្ធសំខាន់លើបញ្ហាជីវភាពពលរដ្ឋដែលនៅជុំវិញតំបន់ការពារធម្មជាតិនោះ។
ដោយឡែក ពិភពលោករួមនឹងប្រទេសកម្ពុជាក៏បានប្រារព្ធទិវាទឹកស្អាតពិភពលោកផងដែរ នាថ្ងៃទី ២២ មីនា ឆ្នាំ ២០២២ ក្រោមប្រធានបទ «ទឹកក្រោមដីធ្វើឱ្យការមើលមិនឃើញទៅជាមើលឃើញ» និងបានលើកកម្ពស់ការយល់ដឹងអំពីប្រជាជនចំនួន ២ ពាន់លាននាក់ដែលកំពុងរស់នៅដោយគ្មានទឹកស្អាតប្រើប្រាស់។
ក្រសួងបញ្ជាក់ថា៖ «ទឹកក្រោមដី គឺមើលមិនឃើញ ប៉ុន្តែឥទ្ធិពលរបស់ វាអាចមើលឃើញនៅគ្រប់ទីកន្លែង។ ទឹកក្រោមដី គឺជាកំណប់ទ្រព្យលាក់កំបាំងដែលធ្វើឱ្យជីវិតរបស់យើងកាន់តែសម្បូរបែប។ ស្ទើរតែទាំងអស់នៃទឹកសាបនៅក្នុងពិភពលោកគឺជាទឹកក្រោមដី។ នៅពេលដែលការប្រែប្រួលអាកាសធាតុកាន់តែអាក្រក់ ទឹកក្រោមដីនឹងកាន់តែធ្ងន់ធ្ងរឡើង។ យើងត្រូវធ្វើការរួមគ្នា ដើម្បីគ្រប់គ្រងធនធានដ៏មានតម្លៃនេះប្រកបដោយនិរន្តរភាព»។
ដើម្បីរក្សាបាននូវប្រភពទឹកសាបសម្រាប់ប្រើប្រាស់ និងទប់ស្កាត់វិបត្តិខ្វះទឹក ទាំងអស់គ្នាត្រូវចូលរួមអភិរក្សធនធានធម្មជាតិ ព្រៃឈើដែលជាប្រភពទាក់ទាញទឹកយ៉ាងសំខាន់។
លោក ហេង គឹមហុង ប្រធានផ្នែកកម្មវិធីស្រាវជ្រាវ និងតស៊ូមតិនៃសមាគមបណ្តាញយុវជនកម្ពុជា សរសេរលើហ្វេសប៊ុក នាថ្ងៃទី ២១ មីនាថា ព្រៃឈើដើរតួនាទីយ៉ាងសំខាន់ក្នុងការកាត់បន្ថយភាពក្រីក្រ និងក្នុងការសម្រេចបាននូវគោលដៅអភិវឌ្ឍន៍ប្រកបដោយចីរភាព។ លោកថា៖ «ប្រទេសកម្ពុជាបានចូលរួមបង្កើតគោលនយោបាយជាច្រើន ដើម្បីចូលរួមការពារព្រៃឈើ និងធនធានធម្មជាតិ។ ប្រទេសកម្ពុជាបានរៀបចំឱ្យមានកម្មវិធីព្រៃឈើជាតិ ដើម្បីបង្ហាញពីការប្តេជ្ញាចិត្តក្នុងការចូលរួមការពារព្រៃ និងការចូលរួមពីគ្រប់មជ្ឈដ្ឋានសម្រាប់ការរួមចំណែកក្នុងកិច្ចការពារព្រៃឈើ ដូចជា ការចូលរួមពីសហគមន៍ សង្គមស៊ីវិល និងដៃគូអន្តរជាតិនានា»៕