.jpg)
អាជ្ញាធរជាតិព្រះវិហារ បើកកិច្ចប្រជុំពេញអង្គនៅខេត្តសៀមរាប កាលពីថ្ងៃទីទី ២២ ខែមីនា។ រូបថត ក្រសួងវប្បធម៌
សៀមរាបៈ អាជ្ញាធរជាតិព្រះវិហារទទួលបានការអនុវត្តសកម្មភាពការងារអភិរក្ស និងថែទាំបន្តរយៈពេល ៦ ខែខាងមុខទៀត ក្រោយអាជ្ញាធរមួយនេះ បានបើកកិច្ចប្រជុំពេញអង្គលើកទី ៧ នៃគណៈកម្មាធិការសម្របសម្រួលអន្តរជាតិសម្រាប់ការអភិរក្ស និងការលើកតម្លៃព្រះវិហារ (ICC-Preah Vihear)ដើម្បីពិភាក្សាផ្តោតលើការងារអភិរក្សមួយចំនួន។
នៅថ្ងៃទីទី ២២ ខែមីនា អាជ្ញាធរជាតិព្រះវិហារបានបើកកិច្ចប្រជុំពេញអង្គនៅខេត្តសៀមរាបក្រោមការចូលរួមពីលោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ លោកស្រី Devyani Uttam Khobragade អគ្គរដ្ឋទូតឥណ្ឌាប្រចាំនៅកម្ពុជា និងលោកស្រី Guo Wei អនុប្រធានផ្នែកវិទ្យាសាស្ត្រ និងវប្បធម៌នៃគណៈកម្មការជាតិយូណេស្កូចិន។ កិច្ចប្រជុំនេះ ក៏មានការចូលរួមពីតំណាងប្រទេសជាសមាជិកចំនួន ៤ ទៀតរួមមាន បែលហ្ស៊ិក ជប៉ុន ថៃឡង់ដ៍ និងសហរដ្ឋអាមេរិក អ្នកជំនាញការជាតិ និងអន្តរជាតិសរុបចំនួន ៧០ នាក់ ចូលរួមផ្ទាល់ និង ៤០ នាក់តាមអនឡាញ។
តាមទំព័រហ្វេសប៊ុករបស់អាជ្ញាធរជាតិព្រះវិហារបានឱ្យដឹងថា កិច្ចប្រជុំនេះបានផ្តោតជាសំខាន់លើការងារមួយចំនួន ដូចជាផែនការការងារអភិរក្សគោបុរៈទី ៥ នៃប្រាសាទព្រះវិហារ ដោយអ្នកជំនាញការឥណ្ឌា ការងារជួសជុលស្ពានហាលនៅចន្លោះគោបុរៈទី ៤ និងទី ៥ នៃប្រាសាទព្រះវិហារ និងការងារជួសជុលជណ្តើរបុរាណខាងជើងក្រោមជំនួយឧបត្ថម្ភហិរញ្ញវត្ថុពីមូលនិធិទូតសម្រាប់ការអភិរក្សវប្បធម៌របស់សហរដ្ឋអាមេរិក។
បន្ថែមពីនេះ ចំពោះការងារអភិរក្សប្រាសាទដងទង់ ប្រាសាទតាមែន ប្រាសាទធំ ប្រាសាទចិន ប្រាសាទក្រចាប់ និងប្រាសាទអណ្ដូងគុក ក្នុងតំបន់បេតិកភណ្ឌប្រាសាទកោះកេរការងារកំណាយបុរាណនៅប្រាសាទថ្មបាយក្រៀម ប្រាសាទក្រចាប់ និងប្រាសាទចិន ក្នុងតំបន់បេតិកភណ្ឌប្រាសាទកោះកេរ និងការងារអភិវឌ្ឍន៍ធនធានទឹកនៅតំបន់បេតិកភណ្ឌប្រាសាទព្រះវិហារ និងប្រាសាទកោះកេរ ព្រមទាំងផែនការគ្រប់គ្រងទេសចរណ៍ក្នុងតំបន់បេតិកភណ្ឌប្រាសាទព្រះវិហារ និងប្រាសាទកោះកេរ ក៏ត្រូវបានយកមកពិភាក្សាដែរ។
អាជ្ញាធរមួយនេះបានបញ្ជាក់ថា៖ «កិច្ចប្រជុំពេញអង្គលើកទី ៧ នៃ ICC-Preah Vihear បានប្រព្រឹត្តទៅរយៈពេលពេញ ១ ថ្ងៃប្រកបដោយជោគជ័យ និងទទួលបានអនុសាសន៍ល្អៗពីអ្នកជំនាញការអន្តរជាតិ សម្រាប់ផ្តល់ជូនអាជ្ញាធរជាតិព្រះវិហារ យកទៅអនុវត្តបន្តរយៈពេល ៦ ខែ ខាងមុខទៀត ហើយបានកំណត់យកកិច្ចប្រជុំ ICC-Preah Vihear លើកក្រោយនៅខែកញ្ញា ឆ្នាំ ២០២២»។
លោក គង់ ពុទ្ធិការ អគ្គនាយកអាជ្ញាធរជាតិព្រះវិហារបានប្រាប់ភ្នំពេញប៉ុស្តិ៍ថា ការជួបគ្នានេះគឺជាកិច្ចប្រជុំផ្ទាល់មុខដែលមានការចូលរួមពីភាគីពាក់ព័ន្ធដើម្បីពិនិត្យ និងពិភាក្សាជុំវិញអ្វីដែលសម្រេចបានក្នុងកិច្ចការអភិរក្ស និងជួសជុលប្រាសាទនានាក្នុងតំបន់ការពារ និងដើម្បីឈានទៅរកការអនុវត្តបន្តនូវការដែលសេសសល់ និងការងារថ្មីៗដើម្បីធ្វើយ៉ាងណារក្សាការពារប្រាសាទ និងតំបន់ទាំងនេះឱ្យមាននិរន្តរភាព។
លោកថា៖ «កិច្ចការងារនេះយើងនឹងបន្តឱ្យអស់លទ្ធភាព ដើម្បីធ្វើការអភិរក្សរមណីយដ្ឋានទាំង ២ នេះឱ្យបានថិតថេរគង់ង្ស»។ គណៈកម្មាធិការនេះក៏បានចុះត្រួតពិនិត្យការងារអភិរក្ស ជួសជុលនៅតាមរមណីយដ្ឋានមួយចំនួនផងដែរ៕
