.jpg)
ទិដ្ឋភាពគ្រោះថ្នាក់ចរាចរណ៍នៅក្នុងរាជធានីភ្នំពេញកាលពីឆ្នាំមុន។ ហុង មិនា
ភ្នំពេញៈ លោកនាយករដ្ឋមន្ត្រី ហ៊ុន សែន បានបន្តអំពាវនាវដល់ប្រជាពលរដ្ឋឱ្យរួមគ្នាគោរពច្បាប់ចរាចរណ៍ ខណៈបច្ចុប្បន្ននេះ ករណីស្លាប់ដោយគ្រោះថ្នាក់ចរាចរណ៍ច្រើនជាងស្លាប់ដោយសារជំងឺកូវីដ ១៩ ហើយអ្នកកើតជំងឺកូវីដ ១៩ អាចព្យាបាលជាសះស្បើយ ប៉ុន្តែគ្រោះថ្នាក់ចរាចរណ៍អាចបង្កឱ្យមនុស្សពិការ ឬអាចបាត់បង់ជីវិតតែម្តង។
ការអំពាវនាវនេះបានធ្វើឡើងក្នុងពិធីសម្ពោធដាក់ឱ្យប្រើប្រាស់ជាផ្លូវការផ្លូវជាតិលេខ ២១ ប្រវែងជិត ៦៤ គីឡូម៉ែត្រតភ្ជាប់ពីរង្វង់មូលក្រុងតាខ្មៅរហូតដល់ច្រកទ្វារអន្តរជាតិកម្ពុជា-វៀតណាម (ជ្រៃធំ-ឡុងប៊ិញ) នៅព្រឹកថ្ងៃទី ២៣ ខែមីនា ឆ្នាំ ២០២២។
លោកបានថ្លែងថា៖ «ខ្ញុំសុំអំពាវនាវឱ្យមានការគោរពដល់ច្បាប់ចរាចរណ៍ កុំឱ្យមានផ្លូវល្អហើយបែរជានាំគ្នាស្រែកយំទៅវិញ ដោយសារគ្រោះថ្នាក់ចរាចរណ៍។ ម្សិលមិញនេះ គ្រោះថ្នាក់ចរាចរណ៍បណ្តាលឱ្យស្លាប់ចំនួន ៦ នាក់ និងរបួសចំនួន ៨ នាក់ក្នុង ៥ រាជធានី-ខេត្ត។ អ៊ីចឹងរៀងរាល់ថ្ងៃមានមនុស្ស ៥ ឬ ៨ នាក់បានស្លាប់ ដោយសារគ្រោះថ្នាក់ចរាចរណ៍ ខណៈកូវីដ ១៩ ម្សិលមិញអត់មានអ្នកស្លាប់នោះទេ»។
ប្រមុខរាជរដ្ឋាភិបាលកម្ពុជាបានបន្ថែមទៀតថា ប្រសិនបើចំនួនអ្នកស្លាប់ដោយគ្រោះថ្នាក់ចរាចរណ៍ជាមធ្យមចំនួន ៥ នាក់ នោះរយៈពេល ១០ ថ្ងៃមានមនុស្សរហូតដល់ ៥០ នាក់បានបាត់បង់ជីវិតដែលនេះ គឺជាការបង្កើតនូវបញ្ហាសង្គមធ្ងន់ធ្ងរណាស់សម្រាប់កម្ពុជា។
លោក ហ៊ុន សែន មានប្រសាសន៍ថា៖ «ប្រសិនបើអ្នកដែលស្លាប់នោះជាមេគ្រួសារ តើអ្នកណាចិញ្ចឹមកូន ចិញ្ចឹមប្រពន្ធ។ នេះជាបញ្ហាដែលយើងសូមអំពាវនាវឱ្យមានការគោរពនូវច្បាប់ចរាចរណ៍ដែលតម្រូវឱ្យអ្នកធ្វើដំណើរត្រូវពាក់មួក ពាក់ខ្សែក្រវាត់ឱ្យបានត្រឹមត្រូវ»។
គួរបញ្ជាក់ផងដែថា ក្នុងឆ្នាំ ២០២១ កន្លងទៅនេះ មនុស្សជិត ១ ៥០០ នាក់ បានស្លាប់ដោយសារគ្រោះថ្នាក់ចរាចរណ៍ និងមានអ្នករងរបួសចំនួន ៣ ៦១៥ នាក់ផងដែរ។
ដោយឡែកទាក់ទងនឹងស្ថានភាពនៃការចម្លង និងការស្លាប់ដោយសារវីរុសកូវីដ ១៩ វិញ បើយោងតាមរបាយការណ៍ប្រចាំថ្ងៃរបស់ក្រសួងសុខាភិបាលគឺមានការថយចុះនូវចំនួនអ្នកឆ្លង និងអ្នកបាត់បង់ជីវិត ហើយមានថ្ងៃខ្លះមិនមានអ្នកស្លាប់ដោយសារជំងឺកូវីដ ១៩ នេះឡើយ។
ពាក់ព័ន្ធនឹងការថយចុះនៃចំនួនឆ្លងនេះដែរ មន្ត្រីជាន់ខ្ពស់ក្រសួងសុខាភិបាលបានព្រមានថា ទោះបីការឆ្លងវីរុសកូវីដ ១៩ មានការថយចុះក៏ដោយ ប៉ុន្តែមិនត្រូវមានការភ្លេចខ្លួនពីការការពារ កុំមើលងាយ កុំមើលស្រាលចំពោះមេរោគនេះឱ្យសោះ ដោយត្រូវបន្តរួមគ្នាទប់ស្កាត់ការចម្លងមេរោគនេះ។
លោកស្រី ឱ វណ្ណឌីន រដ្ឋលេខាធិការក្រសួងសុខាភិបាលបានលើកឡើងដូចនេះ កាលពីថ្ងៃទី ២២ ខែមីនា ក្នុងយុទ្ធនាការអប់រំសុខភាពរួមគ្នាទប់ស្កាត់ការចម្លងវីរុសកូវីដ ១៩ ក្រោមប្រធានបទ «រួមគ្នាប្រយុទ្ធនឹងវីរុសកូវីដ ១៩ បំប្លែងថ្មីអូមីក្រុង ដែលឆ្លងលឿនខ្លាំងជាងមុន អាចបង្កឱ្យមានហានិភ័យធ្ងន់ធ្ងរដល់អ្នក និងគ្រួសារ»។
លោកស្រីមានប្រសាសន៍ថា៖ «ស្ថានភាពបច្ចុប្បន្ននេះការឆ្លងរាលដាលនូវកូវីដ ១៩ វានៅតែជាការព្រួយបារម្ភរបស់យើងដដែលទេ ថ្វីដ្បិតតែតួលេខបង្ហាញថា មានការធ្លាក់ចុះជាបណ្តើរៗ ជាការល្អប្រសើរមែនទែនហើយ ប៉ុន្តែសុំប្រជាពលរដ្ឋ កុំភ្លេចខ្លួនឱ្យសោះពីការការពារពីមេរោគនេះ»។
ប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេសរូបនេះបានបន្តអំពាវនាវឱ្យពលរដ្ឋបន្តអនុវត្តនូវវិធានការ ដើម្បីទប់នូវហានិភ័យនៃការចម្លងកាន់តែតិចទៅៗ ហើយអ្វីដែលធ្វើឱ្យការចម្លងនេះកាន់តែទាបទៅៗគឺមានតែការអនុវត្តវិធានការ ៣ ការពារ ៣ កុំ និងការចាក់វ៉ាក់សាំងបង្ការជំងឺកូវីដ ១៩។
គិតត្រឹមថ្ងៃទី ២៣ ខែមីនា ឆ្នាំ ២០២២ កម្ពុជាមានអ្នកឆ្លងវីរុសកូវីដ ១៩ សរុបទូទាំងប្រទេសចំនួន ១៣៥ ២២២ នាក់ មានអ្នកជាសះស្បើយសរុប ចំនួន ១៣១ ១៦១ នាក់ និងអ្នកស្លាប់មានចំនួន ៣ ០៥២ នាក់ ដែលក្នុងនោះអ្នកឆ្លងមេរោគកូវីដ-១៩ ប្រភេទអូមីក្រុងមានចំនួនប្រមាណជា ១៤ ០០០ នាក់ និងមានអ្នកស្លាប់ជាង ៥០ នាក់ផងដែរ៕
