សៀមរាបៈ កាលពីថ្ងៃទី ២០ ខែមីនា ឆ្នាំ ២០២២ ថា តុលាការខេត្តសៀមរាប បានសម្រេចឃុំខ្លួនបុរសម្នាក់ពីបទ «ឃាតកម្ម» ករណីបើករថយន្តបុកហើយបត់ត្រឡប់មកកិនសម្លាប់ជនរងគ្រោះម្នាក់ នៅចំណុចខាងលិចស្ពានវត្តកុងម៉ុច ឬស្ពានប៊ីឡាញ ប្រហែល ២០០ ម៉ែត្រ ស្ថិតនៅភូមិកក្រាញ់ ក្នុងសង្កាត់-ក្រុងសៀមរាប។
លោក សុខ ម៉េងអ៊ាង ប្រធានការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តសៀមរាបបានប្រាប់ភ្នំពេញប៉ុស្តិ៍ថា ជនសង្ស័យឈ្មោះ អ៊ឹង គីមហុង អាយុ ២៥ ឆ្នាំមានលំនៅភូមិធ្លកអណ្តូង សង្កាត់ស្លក្រាម ក្រុងសៀមរាប ខេត្តសៀមរាប ត្រូវបានចាប់ខ្លួនកាលពីល្ងាចថ្ងៃទី ១៩ ខែមីនា ឆ្នាំ ២០២២ ពាក់ព័ន្ធករណីបង្កគ្រោះថ្នាក់ចរាចរណ៍បណ្ដាលឱ្យមានជនរងគ្រោះម្នាក់ស្លាប់។ ជនរងគ្រោះដែលនៅក្នុងគ្រោះថ្នាក់ចរាចរណ៍នេះឈ្មោះ ហឿន លន់ អាយុ ៣២ ឆ្នាំ មានលំនៅភូមិបុស្ស ឃុំត្រស់ ស្រុករមាសហែក ខេត្តស្វាយរៀង។
លោកបានបញ្ជាក់ថា យោងតាមសាក្សី និងភ័ស្តុតាងនានាដែលសមត្ថកិច្ចយើងប្រមូលបានពីកន្លែងកើតហេតុ ជនសង្ស័យជាមនុស្សមានចរិតឃោរឃៅ ដោយបានបើករថយន្តបុកជនរងគ្រោះយ៉ាងពេញទំហឹងបណ្ដាលឱ្យរងរបួសធ្ងន់។ បន្ទាប់មក ជនសង្ស័យបានបើករថយន្តត្រឡប់ក្រោយមកកិនលើជនរងគ្រោះថែមទៀត បណ្ដាលឱ្យស្លាប់ភ្លាមៗនៅលើទ្រូងផ្លូវ ហើយបានបើករថយន្តគេចខ្លួនពីកន្លែងកើតហេតុដើម្បីគេចវេះពីការទទួលខុសត្រូវ។
លោកបានបន្តថា ដោយមានកិច្ចសហការពីសមត្ថកិច្ចនៃអង្គភាពពាក់ព័ន្ធ ពិសេសពីប្រជាពលរដ្ឋក្នុងមូលដ្ឋាន កម្លាំងការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តសៀមរាបបានបើកការស្រាវជ្រាវភ្លាមៗលើករណីនេះ ដើម្បីស្វែងរកយុត្តិធម៌ជូនជនរងគ្រោះ។ ២ ថ្ងៃក្រោយមក ក្រុមសមត្ថកិច្ចបានចាប់ឃាត់ជនសង្ស័យបញ្ជូនទៅតុលាការ ខេត្តសៀមរាប ដើម្បីចំណាត់ការតាមនីតិវិធី។
កាលពីល្ងាចថ្ងៃទី ២០ ខែមីនា ឆ្នាំ ២០២២ លោក ស៊ិន សង្ហា ចៅក្រមស៊ើបសួរសាលាដំបូងខេត្តសៀមរាបបានបង្គាប់ឱ្យនគរបាលយុត្តិធម៌នាំជនសង្ស័យទៅឃុំខ្លួនជាបណ្ដោះអាសន្ននៅពន្ធនាគារខេត្តសៀមរាប ដោយចោទប្រកាន់ពីបទ «ឃាតកម្ម» តាមមាត្រា ១៩៩ នៃក្រមព្រហ្មទណ្ឌ បន្ទាប់ពីជនសង្ស័យបានសារភាព។
យោងតាមរបាយការណ៍សួរចម្លើយក្នុងដំណាក់កាលស៊ើបសួរដោយសមត្ថកិច្ចនគរបាលយុត្តិធម៌ ដែលភ្នំពេញប៉ុស្តិ៍ទទួលបាន ជនសង្ស័យបានសារភាពថា នៅថ្ងៃកើតហេតុ ខ្លួនបានជួបជុំផឹកស៊ីជាមួយមិត្តភក្តិ ២-៣ នាក់ បន្ទាប់មកពួកគេក៏បែកផ្លូវគ្នាទៅផ្ទះរៀងៗខ្លួន ជនសង្ស័យបានបើករថយន្តផ្ទាល់ខ្លួនត្រឡប់មកផ្ទះវិញ លុះមកដល់ចំណុចកើតហេតុ ក៏បានបុកទៅលើបុរសម្នាក់ដែលដើរលើទ្រូងផ្លូវដោយឆ្លងផ្លូវខ្វះការប្រុងប្រយ័ត្ន។ បន្ទាប់មកជនសង្ស័យមានចេតនាត្រឡប់មកយកជនរងគ្រោះទៅមន្ទីរពេទ្យ ប៉ុន្តែដោយសារយប់ងងឹត ក៏បានថយរថយន្តកិនលើជនរងគ្រោះស្លាប់៕