.jpg)
គ្រួសារពេទ្យ និងភរិយាក្នុងពេលសមត្ថកិច្ចឃាត់ខ្លួនកាលពីថ្ងៃទី ២៣ មីនា។ រូបថត ប៉ូលិស
កំពង់ឆ្នាំងៈ សមត្ថកិច្ចខេត្តកំពង់ឆ្នាំងបានឃាត់ខ្លួនប្តី-ប្រពន្ធ ២ នាក់ បញ្ជូនទៅស្នងការដ្ឋានខេត្ត បន្ទាប់ពីប្តីដែលជាពេទ្យយោធាបានបណ្តោយឱ្យប្រពន្ធរបស់ខ្លួនដែលគ្មានវិជ្ជាជីវៈព្យាបាលកុមារីម្នាក់បណ្តាលឱ្យស្វិតជើងឆ្វេង ខណៈមន្ត្រីជំនាញផ្នែកសុខាភិបាលកំពុងបន្តការស្រាវជ្រាវលើករណីនេះ។
ជនសង្ស័យដែលត្រូវជាគ្រូពេទ្យយោធា មានឈ្មោះ សូ សារឿន និងភរិយា មិនទាន់ត្រូវបានបង្ហើបឈ្មោះនោះទេ ចំណែកកុមារីរងគ្រោះមានអាយុ ៩ ឆ្នាំរស់នៅជាមួយជីដូននៅក្នុងឃុំខ្លុងពពក ស្រុកទឹកផុស ខេត្តកំពង់ឆ្នាំង ដែលមានឪពុកឈ្មោះ ហែម ប៊ុនហុង បច្ចុប្បន្នកំពុងធ្វើការ និងរស់នៅប្រទេសកូរ៉េខាងត្បូង។
លោក ខូវ លី ស្នងការនៃស្នងការដ្ឋាននគរបាលខេត្តកំពង់ឆ្នាំងប្រាប់ភ្នំពេញប៉ុស្តិ៍នៅថ្ងៃទី ២៣ មីនាថា ការឃាត់ខ្លួនប្តីប្រពន្ធទាំង ២ នាក់នេះបានធ្វើឡើងកាលពីថ្ងៃទី ២២ មីនា ក្រោយអាណាព្យាបាលកុមារីរងគ្រោះប្តឹងសមត្ថកិច្ច ហើយជនសង្ស័យទាំង ២ ត្រូវបានបញ្ជូនទៅស្នងការដ្ឋាន ដើម្បីបន្តសាកសួរ។
លោកបានបញ្ជាក់ថា៖ «ជនរងគ្រោះបានប្តឹង ព្រោះគាត់ជាពេទ្យដែលក្មេងហ្នឹងទៅព្យាបាល គាត់មិនព្យាបាលបែរជាឱ្យប្រពន្ធគាត់ចាក់ថ្នាំឱ្យទាំងដែលប្រពន្ធគាត់មិនចេះពេទ្យផង។ ដល់ពេលចាក់រួចហើយទៅ យើងមិនដឹងប្រតិកម្មយ៉ាងម៉េចបានធ្វើឱ្យជើងកុមារីរងគ្រោះស្វិត»។
ទោះបីយ៉ាងណា លោក ខូវ លី បានអះអាងថា ជនសង្ស័យទាំង ២ នាក់នេះត្រូវបានសមត្ថកិច្ចបន្តឃុំខ្លួន ដើម្បីសាកសួរបន្តតាមនីតិវិធីច្បាប់ ខណៈករណីនេះលោកអះអាងថា សមត្ថកិច្ច និងជំនាញសុខាភិបាលក៏កំពុងសហការគ្នាបន្តទៀត ដើម្បីស្រាវជ្រាវរកមូលហេតុដែលបណ្តាលឱ្យកុមារីរងគ្រោះជួបគ្រោះថ្នាក់ស្វិតជើងបែបនេះ។
លោក ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំងបានប្រាប់ភ្នំពេញប៉ុស្តិ៍នៅថ្ងៃទី ២៣ មីនាថា ការឈានដល់ការឃាត់ខ្លួននេះ ក៏ព្រោះគ្រូពេទ្យម្នាក់នេះបានធ្វេសប្រហែស និងបណ្តែតបណ្តោយឱ្យប្រពន្ធខ្លួនដែលគ្មានវិជ្ជាជីវៈ ព្យាបាលកុមារីរងគ្រោះ។ លោកបន្តថាករណីបែបនេះគឺខុសទៅច្បាប់ និងផ្នែកក្រមសីលធម៌វិជ្ជាជីវៈពេទ្យដែលត្រូវតែមានវិធានការ ខណៈករណីដែលថា ការព្យាបាលកុមារីរងគ្រោះបណ្តាលឱ្យស្វិតជើងនោះជំនាញត្រូវការពេល ដើម្បីស្រាវជ្រាវឱ្យបានច្បាស់មុននឹងសន្និដ្ឋាន។
បើតាម លោក ប្រាក់ វ៉ុន ហេតុការណ៍បណ្តែតបណ្តោយឱ្យអ្នកគ្មានវិជ្ជាជីវៈព្យាបាលអ្នកជំងឺនេះបានកើតឡើងតាំងពីចុងឆ្នាំ ២០២១ មកម្ល៉េះ ហើយក្រោយមកកុមារីរងគ្រោះបានបន្តទៅស្វែងរកសេវាព្យាបាលជាច្រើនកន្លែងផ្សេងទៀតផងដែរ រហូតទទួលរងបញ្ហាស្វិតជើងមកទល់បច្ចុប្បន្ន។
លោកបានបញ្ជាក់ថា៖ «យើងមិនទាន់ដឹងច្បាស់លម្អិតទេយើងកំពុងធ្វើការលើករណីនេះបន្តទៀត ព្រោះការព្យាបាលប៉ះពាល់ដល់កុមារីយើងមិនអាចឆ្លើយភ្លាមថាមកពីអីៗបានទេ។
យើងឆ្លើយប្រញាប់ពេកក៏មិនកើតដែរ ត្រូវការធ្វើការសិក្សាជាមុនថា ពិតជាការចាក់ថ្នាំដោយជនសង្ស័យមែន ឬមិនមែនហើយអ្វីដែលយើងឃាត់ខ្លួនគាត់គឺមកពីគាត់មើលអ្នកជំងឺដោយគ្មានវិជ្ជាជីវៈជាពេទ្យ»។
លោក ប្រាក់ វ៉ុន បានឱ្យដឹងថា លោក សូ សារឿន ដែលជាពេទ្យយោធាគឺទទួលបានអាជ្ញាប័ណ្ណត្រឹមត្រូវក្នុងការបើកកន្លែងពិនិត្យព្យាបាលនៅទីតាំងខាងលើ ក៏ប៉ុន្តែទោះជាយ៉ាងណា ក្រោយពេលមានការកើតហេតុនេះឡើង ខាងផ្នែកជំនាញបានផ្អាកសកម្មភាពកន្លែងពិនិត្យព្យាបាលនោះជាបណ្តោះអាសន្ន៕
