ភ្នំពេញៈ ព្រះករុណា ជាអម្ចាស់ជីវិតតម្កល់លើត្បូង ព្រះករុណាព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ព្រះអង្គសព្វព្រះរាជហឫទ័យ ប្រោសព្រះរាជទានព្រះរាជសារ រំលែកទុក្ខយ៉ាងក្រៀមក្រំចំពោះឧបទ្ទវហេតុធ្លាក់យន្តហោះនៅប្រទេសចិន ដែលបណ្តាលឱ្យមនុស្សស្លាប់ជាង ១០០ នាក់។
តាមរយៈព្រះរាជសាររបស់ព្រះករុណា ព្រះមហាក្សត្រ ដែលបានផ្ញើជូនប្រធានាធិបតីនៃសាធារណរដ្ឋប្រជាមានិតចិន លោក Xi Jinping ចុះថ្ងៃទី ២២ ខែមីនា ឆ្នាំ ២០២២ មានព្រះរាជបន្ទូលថា៖ «ខ្ញុំព្រះករុណា មានការសោកស្តាយ ពេលដឹងថា យន្តហោះដឹកមនុស្ស ១៣២ នាក់របស់ក្រុមហ៊ុន China Eastern Airlines បានធ្លាក់នៅលើភ្នំក្នុងតំបន់ Guangxi ភាគខាងត្បូងប្រទេសចិនកាលពីរសៀលថ្ងៃចន្ទ»។
ព្រះករុណាព្រះមហាក្សត្រ បានបន្តថា ក្នុងឱកាសដ៏ក្រៀមក្រំនេះ សម្តេចព្រះមហាក្សត្រី នរោត្តម មុនីនាថ សីហនុ និងប្រជាជនកម្ពុជា សូមចូលរួមរំលែក មរណទុក្ខដ៏ក្រៀមក្រំ ជាមួយ ឯកឧត្តម Xi Jinping និងគ្រួសារនៃជនរងគ្រោះ។
ព្រះករុណាព្រះមហាក្សត្របញ្ជាក់ថា៖ «យើងខ្ញុំទាំងអស់គ្នា គឺនៅជាមួយសមាជិកគ្រួសារនៃជនរងគ្រោះ ហើយយើងជឿជាក់ថា ពួកគេនឹងអាចយកឈ្នះលើការកាន់ទុក្ខដ៏ជ្រាលជ្រៅនេះ»។
សូមជម្រាបថា យន្តហោះ Boeing 737-800 មួយគ្រឿងរបស់ក្រុមហ៊ុន China Eastern Airlines ធ្លាក់ដាំក្បាលចុះនៅពេលកំពុងធ្វើដំណើរក្នុងល្បឿន ៨៤២ គីឡូម៉ែត្រក្នុង ១ ម៉ោង និងនៅកម្ពស់ជិត ៩ គីឡូម៉ែត្រ បណ្ដាលឱ្យអ្នកដំណើរលើយន្តហោះ និងបុគ្គលិកសរុបចំនួន ១៣២ នាក់ ស្លាប់កាលពីថ្ងៃចន្ទទី ២១ ខែមីនា ឆ្នាំ ២០២២។
ក្រុមហ៊ុនអាកាសចរណ៍ដដែលបាននិយាយថា ខ្លួនចូលរួមរំលែកទុក្ខយ៉ាងក្រៀមក្រំដល់អ្នកដំណើរ និងបុគ្គលិកនៅលើយន្តហោះទាំងអស់។ ពួកគេបញ្ជាក់ថា មូលហេតុនៃការធ្លាក់យន្តហោះនេះកំពុងស្ថិតក្រោមការស៊ើបអង្កេតនៅឡើយ។
អ្នកនាំពាក្យក្រុមហ៊ុន Boeing បាននិយាយក្នុងសេចក្ដីថ្លែងការណ៍មួយថា៖ «យើងកំពុងធ្វើការជាមួយអតិថិជនក្រុមហ៊ុនអាកាសចរណ៍របស់យើង ហើយត្រៀមខ្លួនជាស្រេច ដើម្បីខិតខំប្រឹងប្រែងបំពេញការងារនេះ»។
គ្រោះថ្នាក់បែបនេះជាធម្មតាពាក់ព័ន្ធនឹងកត្តាជាច្រើន ហើយអ្នកជំនាញបានព្រមានថា យន្តហោះនេះ ហោះលឿនពេក។ ប៉ុន្តែមិនមានការសន្និដ្ឋានណាមួយអំពីមូលហេតុដែលអាចកើតមាន ជាពិសេសចំពេលដែលព័ត៌មាននៅមិនទាន់បានផ្ដល់ពេញលេញនៅឡើយ។
ជាការឆ្លើយតបនឹងការធ្លាក់នេះ ក្រុមហ៊ុនអាកាសចរណ៍ China Eastern Airlines ក៏បានផ្អាកដំណើរការយន្តហោះBoeing 737-800 របស់ខ្លួនទាំងអស់៕