ពោធិ៍សាត់ៈ នៅពេលខាងមុខ អ្នកចិញ្ចឹមសត្វពាហនៈដែលខ្វះការទទួលខុសត្រូវបណ្ដោយឱ្យសត្វដើរពាសវាលពាសកាលតាមទីសាធារណៈអាចនឹងប្រឈមការផ្ដន្ទាទោសផាកពិន័យអន្តរការណ៍ ឬទោសជាប់ពន្ធនាគារផងដែរ ប្រសិនបើបង្កឱ្យមានគ្រោះថ្នាក់ដល់អាយុជីវិតអ្នកដទៃ។ នេះបើតាមលោកស្រី មីន មាណវី រដ្ឋលេខាធិការក្រសួងសាធារណការ និងដឹកជញ្ជូន។
លោកស្រីបានថ្លែងបែបនេះ ក្នុងយុទ្ធនាការអប់រំផ្សព្វផ្សាយច្បាប់ស្ដីពីចរាចរណ៍ផ្លូវគោក នៅឯខេត្តពោធិ៍សាត់កាលពីថ្ងៃទី ២២ ខែមីនា ឆ្នាំ ២០២២។
លោកស្រីថ្លែងថា ក្រសួងសាធារណការ និងដឹកជញ្ជូនគ្រោងដាក់បញ្ចូលការពិន័យអន្តរការណ៍ទៅក្នុងអនុក្រឹត្យស្ដីពីច្បាប់ចរាចរណ៍ផ្លូវគោកលើអ្នកចិញ្ចឹមសត្វពាហនៈ ដែលលែងឱ្យដើរពាសវាលពាសកាលតាមទីសាធារណៈ ហើយបង្កគ្រោះថ្នាក់ចរាចរណ៍ដល់អ្នកធ្វើដំណើរ។ លោកស្រី មាណវី ដែលជាអគ្គលេខាធិការនៃអគ្គលេខាធិការដ្ឋានគណៈកម្មាធិការជាតិសុវត្ថិភាពចរាចរណ៍ផ្លូវគោកផងដែរនោះ បានបញ្ជាក់ថា៖ «នៅពេលនេះ វិសោធនកម្មច្បាប់ស្តីពីចរាចរណ៍ផ្លូវគោកបានធ្វើរួចហើយនៅតែសម្អាត ដើម្បីដាក់ជូនទៅគណៈរដ្ឋមន្ត្រីអនុម័តរួចហើយនឹងផ្ញើជូនទៅរដ្ឋសភាអនុម័តបន្ត»។
បើតាមលោកស្រី មាណវី ចំណុចសំខាន់ដែលត្រូវធ្វើក្នុងវិសោធនកម្មច្បាប់នេះ មានដូចជាកត្តាកែច្នៃយានយន្តដែលត្រូវបើកផ្លូវឱ្យក្រសួងចេញបទដ្ឋានមួយថា តើការកែច្នៃនោះ ត្រូវគោរពបទដ្ឋានយ៉ាងដូចម្ដេចខ្លះ? ខណៈនៅក្នុងច្បាប់នេះមិនទាន់បាននិយាយពីទោសប្បញ្ញត្តិនៅឡើយ។ ចំណែកឯការផាកពិន័យដូចជា ការប្រើប្រាស់ល្បឿនមិនពាក់មួកសុវត្ថិភាពជាដើមគឺមិនស្ថិតក្នុងច្បាប់នោះទេប៉ុន្តែមានអនុក្រឹត្យមួយចេញដោយរាជរដ្ឋាភិបាលដែលរៀបចំដោយក្រសួងមហាផ្ទៃ និងក្រសួងសាធារណការដើម្បីកំណត់ឱ្យធ្វើការផាកពិន័យ៕
វីដេអូ៖