.jpg)
សមត្ថកិច្ចចុះបង្ក្រាបទីតាំងជល់មាន់កាលពីថ្ងៃទី៩មីនា។ រូបថត នគរបាល
កំពតៈ អភិបាលខេត្តកំពត លោក ម៉ៅ ធនិន បើកឱកាសឱ្យក្រុមគ្រួសារម៉ូតូឌុប និងអ្នកបើកបររថយន្តតាក់ស៊ីនៅស្រុកបន្ទាយមាស រាយការណ៍ទៅលោក ដោយផ្ទាល់ពីកន្លែងជល់មាន់ និងទីតាំងលេងល្បែងស៊ីសង ដើម្បីធានាការអនុវត្តគោលនយោបាយភូមិ-ឃុំ មានសុវត្ថិភាព។
ការបើកដៃឱ្យពលរដ្ឋរាយការណ៍នេះ បន្ទាប់ពីលោកដឹងថា ប្រជាពលរដ្ឋនៅមូលដ្ឋានបានដឹងពីទីតាំងកន្លែងជល់មាន់ ប៉ុន្តែមិនដឹងរាយការណ៍ទៅខាងណា ក្រោយពីលោកអភិបាលទទួលបានរបាយការណ៍ពីអធិការនគរបាលស្រុកថា ពុំមានទីតាំងល្បែងឡើយ ដែលធ្វើឱ្យលោកមានមន្ទិលសង្ស័យ។
ថ្លែងក្នុងពិធីសំណេះសំណាលជាមួយគ្រូបង្រៀន គ្រូពេទ្យ ក្រុមគ្រួសារម៉ូតូឌុប និងតាក់ស៊ី នៅស្រុកបន្ទាយមាសនាថ្ងៃទី ២៤ មីនា អភិបាលខេត្តកំពតលោក ម៉ៅ ធនិន បានផ្តាំផ្ញើដល់គ្រួសារអ្នករត់តាក់ស៊ី ម៉ូតូឌុប ឱ្យមានការសាមគ្គីគ្នាឱ្យបានល្អនៅក្នុងមូលដ្ឋាន និងកុំលាបពណ៌គ្នា ដើម្បីសុខសន្តិភាព។ បន្ថែមពីនេះលោកស្នើអ្នករត់តាក់ស៊ី ម៉ូតូឌុប រាយការណ៍ទៅលោកផ្ទាល់ពីកន្លែងជល់មាន់ និងទីតាំងល្បែងផ្សេងៗផងដែរ។
លោកថ្លែងថា៖ «ជាពិសេសទៅទៀត ខ្ញុំសូមឱ្យក្រុមគ្រួសារតាក់ស៊ីចូលរួមចំណែកជាមួយភូមិឃុំមានសុវត្ថិភាពជួយពិនិត្យឱ្យខ្ញុំផង ថា តើកន្លែងណាមានកន្លែងជល់មាន់ កន្លែងណាចាក់ល្បែងយូគី។ ព្រោះខ្ញុំសួរមកអធិការថ្ងៃណាក៏អត់មានដែរ របាយការណ៍ព្រឹកឡើងអត់មានទាំងអស់។ ប៉ុន្តែបងប្អូនយើងហាក់បីដូចជាដឹងខ្លះហើយ ហាក់បីដូចជាលាក់លៀមខ្ញុំ អត់ទាន់ប្រាប់ខ្ញុំ»។
លោកបន្តថា៖ «អ៊ីចឹងចាប់ពីពេលនេះទៅលេខទូរស័ព្ទខ្ញុំដែលផ្តល់ឱ្យសូមគ្រួសារម៉ូតូឌុប តាក់ស៊ីយើងទាក់ទងមកបង ឬប្រើតាមប្រព័ន្ធតេឡេក្រាម ដោយជួយថតរូបភាព ហើយកំណត់ទីតាំង និងផ្ញើរូបមកខ្ញុំ»។
លោកអភិបាលខេត្តបញ្ជាក់ថា នៅមូលដ្ឋានដែលមានការលេងល្បែងស៊ីសង នឹងបង្កឱ្យមានចោរកម្ម និងបទល្មើសផ្សេងៗដែលធ្វើឱ្យប៉ះពាល់ដល់ការអនុវត្តគោលនយោបាយភូមិឃុំមានសុវត្ថិភាព។
មន្ត្រីសម្របសម្រួលនៃអង្គការសិទ្ធិមនុស្ស (អាដហុក) ប្រចាំខេត្តកំពត លោកយន់ ផល្លី ថ្លែងថា ការផ្តល់ឱកាសឱ្យពលរដ្ឋរាយការណ៍ពីកន្លែងជល់មាន់ជារឿងល្អមួយ ដើម្បីចុះបង្ក្រាប និងទប់ស្កាត់ទាន់ពេលវេលា។
លោកបញ្ជាក់ថា៖ «ខ្ញុំឃើញថា ការអនុវត្តបច្ចុប្បន្ន មិនទាន់បានទប់ស្កាត់ ១០០% នៅឡើយទេ។ អ៊ីចឹងបើសិនជាមានល្បែងស៊ីសង សូមឱ្យអាជ្ញាធរលោកមានវិធានការក្នុងការទប់ស្កាត់ ឬបង្ក្រាប។ ព្រោះបើសិនជាមានល្បែងស៊ីសង នៅតាមភូមិ-ឃុំ គឺវាអាចបង្កលក្ខណៈក្លាយទៅជាអំពើហិង្សាក្នុងគ្រួសារ ចោរកម្ម។ អ៊ីចឹងបើបង្ក្រាបបានជារឿងល្អក្នុងការរស់នៅភូមិឃុំមានសុវត្ថិភាព»។
ស្នងការនគរបាលខេត្តកំពត លោក ម៉ៅ ច័ន្ទមធុរិទ្ធ ប្រាប់ភ្នំពេញ- ប៉ុស្តិ៍ថា មិនថា ពីមុន និងបច្ចុប្បន្នទេ សមត្ថកិច្ចបានយកចិត្តទុកដាក់លើការងារនេះ ដោយបានដាក់ចេញវិធានការ និងចុះអប់រំប្រជាពលរដ្ឋថែមទៀតផង។
លោកថ្លែងថា៖ «ព្រោះយើងកំពុងអនុវត្តគោលនយោបាយភូមិ-ឃុំមានសុវត្ថិភាព។ អ៊ីចឹង បើយើងដឹង គឺចុះបង្ក្រាបហើយ មិនបណ្តែតបណ្តោយឱ្យគាត់ប្រមូលផ្តុំគ្នាលេង ភ្នាល់គ្នាបានទេ ហើយយើងដាក់វិធានការជាហូរហែកន្លងមក។ ប៉ុន្តែប្រជាពលរដ្ឋគាត់រួចដៃពីការធ្វើចម្ការ ច្រូតស្រូវ គឺគាត់ លេងគ្នាគាត់ ហើយពេលឃើញប៉ូលិសមក គាត់ឈប់ ប៉ុន្តែយើងក៏បានអប់រំណែនាំគាត់ដែរ»៕
វីដេអូ៖
