ភ្នំពេញៈ មន្ត្រីយោធាម្នាក់ត្រូវបាននាំខ្លួនយកទៅសាកសួរនៅអធិការដ្ឋាននគរបាលខណ្ឌដង្កោភ្លាមៗ បន្ទាប់ពីបាញ់ជនសង្ស័យស្លាប់ម្នាក់ក្នុងចំណោម ៦ នាក់ ឯ ៥ នាក់ទៀតរត់គេចខ្លួន ក្នុងហេតុការណ៍ដេញធាក់ប្លន់យកម៉ូតូ ១ គ្រឿងនៅព្រឹកព្រលឹមថ្ងៃទី ២៤ មីនា ក្នុងភូមិសាស្ត្រសង្កាត់ព្រៃស ខណ្ឌដង្កោ រាជធានីភ្នំពេញ។
លោក ជាង ហុកសែ អធិការរងទទួលផែននគរបាលព្រហ្មទណ្ឌនៃអធិការដ្ឋាននគរបាលខណ្ឌដង្កោឱ្យដឹងនៅថ្ងៃទី ២៤ មីនា ថា ជនសង្ស័យម្នាក់ក្នុងចំណោមបក្ខពួកប្រហែលជា ៦ នាក់ត្រូវបានអ្នកដំណើរម្នាក់ជាមន្ត្រីយោធា បាញ់ស្លាប់នៅកន្លែងកើតហេតុស្ថិតក្នុងភូមិសាស្ត្រសង្កាត់ព្រៃស ក្នុងខណ្ឌដង្កោ រាជធានីភ្នំពេញ។ បន្ទាប់ពីកើតហេតុភ្លាមៗសមត្ថកិច្ចរបស់លោកបានចុះអន្តរាគមន៍នៅទីតាំងកើតហេតុ និងនាំមន្ត្រីយោធារូបនោះមកអធិការដ្ឋាននគរបាលខណ្ឌដង្កោ។
លោកថ្លែងថា៖ «ករណីនេះសមត្ថកិច្ចយើងកំពុងធ្វើការ មិនទាន់មានចំណាត់ការយ៉ាងណានៅឡើយទេ»។
ដោយឡែក លោក សាន សុខសីហា អ្នកនាំពាក្យនៃស្នងការដ្ឋាននគរបាលរាជធានីភ្នំពេញប្រាប់ភ្នំពេញប៉ុស្តិ៍ យ៉ាងខ្លីថា ករណីនេះមន្ត្រីជំនាញកំពុងសហការស្រាវជ្រាវហើយ។
ទោះយ៉ាងណា មន្ត្រីនគរបាលប៉ុស្តិ៍ព្រៃសម្នាក់ ដែលស្នើសុំមិនឱ្យបញ្ចេញឈ្មោះឱ្យដឹងនៅវេលាម៉ោងជាង ៥ ព្រឹកថ្ងៃទី ២៤ មីនា តាមសម្តីសាក្សីថា មុនកើតហេតុ គេបានឃើញបុរសម្នាក់ជិះម៉ូតូម៉ាកសេ ១២៥ ស៊េរីឆ្នាំ ២០២២ មួយគ្រឿងតាមបណ្តោយផ្លូវ ៣០ ម៉ែត្រ ម្តុំភ្លើងស្តុបបារគូ ក្នុងសង្កាត់ព្រៃស ខណ្ឌដង្កោ។ ពេលមន្ត្រីយោធាកំពុងជិះម៉ូតូម្នាក់ឯងនោះស្រាប់តែគេឃើញមនុស្ស ១ ក្រុមមានគ្នា ៦ នាក់ ជិះម៉ូតូប្រហែល ៣-៤ គ្រឿងឌុបគ្នា ទៅអែបនឹងម៉ូតូមន្ត្រីយោធានោះហើយធាក់ផ្តួលប្លន់ម៉ូតូតែម្តង។
មន្ត្រីនគរបាលរូបនោះបន្តថា ក្រោយពីជនសង្ស័យម្នាក់ដណ្តើមម៉ូតូពីម្ចាស់ម៉ូតូបានហើយ ក៏ជិះចេញពីចំណុចបង្កហេតុបានបន្តិច ស្រាប់តែម្ចាស់ម៉ូតូដកកាំភ្លើងខ្លីបាញ់ពីក្រោយសំដៅទៅក្រុមចោរប្រហែលជាជិត ១០ គ្រាប់ បណ្តាលឱ្យត្រូវចោរម្នាក់ដែលជិះម៉ូតូប្លន់បាននោះដួលស្លាប់នៅនឹងកន្លែងតែម្តង។ ចំណែកក្រុមចោរប្រមាណជា ៥ នាក់ទៀត បានជិះម៉ូតូគេចខ្លួនបាត់អស់។
ពាក់ព័ន្ធបញ្ហានេះ នៅថ្ងៃទី ២៤ មីនា លោកមេធាវី យុង ផានិត បានពន្យល់ពីផ្លូវច្បាប់ថា បើភាគីម្ខាងធ្វើមកលើភាគីម្ខាងទៀតត្រូវតែមានតុល្យភាពគ្នានៃកម្លាំងតបត។ កម្លាំងដែលភាគីម្ខាងប្រើទៅតទល់នឹងក្រុមជនខុសច្បាប់នោះត្រូវតែជាកម្លាំងសមាមាត្រនឹងគ្នា។ ក្រុមចោរគឺខុសច្បាប់ហើយ ព្រោះគេបានមកដណ្តើមយកម៉ូតូពីភាគីម្ចាស់ម៉ូតូ ហើយម្ចាស់ម៉ូតូមានការការពារទ្រព្យសម្បត្តិ គឺត្រឹមត្រូវហើយ ក៏ប៉ុន្តែគេឱ្យមើលកម្លាំងតបតត្រូវមានតុល្យភាពគ្នា។
លោកបញ្ជាក់ថា៖ «បើភាគីម្ខាងមានគ្នាច្រើន ហើយភាគីម្ខាងទៀត មានតែម្នាក់ឯង អ្នកម្នាក់ឯងនោះមានកាំបិត គឺគាត់អាចកាប់ឱ្យរបួស ឬឧបមាថា បើភាគីម្នាក់ឯងនោះមានកាំភ្លើង គឺគាត់គ្រាន់តែបាញ់ត្រឹមតែជើងអ៊ីចឹងទៅ»៕