ការបើកសវនាការជំនុំជម្រះសំណុំរឿងបក្សភ្លើងទៀនពីថ្ងៃទី ២៤ មីនា។ រូបថត គ.ជ.ប.
ភ្នំពេញៈ អង្គជំនុំជម្រះនៃគណៈកម្មាធិការជាតិរៀបចំការបោះឆ្នោត (គជប) បានសម្រេចយល់ព្រមតាមពាក្យបណ្តឹងរបស់គណបក្សភ្លើងទៀនឱ្យគណបក្សដាក់បេក្ខជនថ្មីជំនួសនៅក្នុងឃុំ សង្កាត់ចំនួន ៣ នៃខេត្តកំពង់ចាម និងបានបដិសេធនៅក្នុងសង្កាត់ចំនួន ២ នៃក្រុងកំពង់ចាម ដោយសារបេក្ខជនឈរឈ្មោះបោះឆ្នោតមិនគ្រប់លក្ខខណ្ឌតម្រូវ។
លោក សោម សូរីដា អ្នកនាំពាក្យ គ.ជ.ប ប្រាប់ ភ្នំពេញ ប៉ុស្តិ៍ នៅថ្ងៃទី ២៤ ខែមីនា នេះថា គ.ជ.ប បានសម្រេចយល់ព្រមសំណុំរឿងលេខ ០៧១ របស់គណបក្សភ្លើងទៀនឱ្យគណបក្សបានដាក់បេក្ខជនថ្មីមកជំនួសបេក្ខជន នៅក្នុងឃុំចំការអណ្តូង ដែលមិនគ្រប់លក្ខខណ្ឌ។
លោកបានបន្តថា មួយវិញទៀតសម្រាប់សំណុំរឿងលេខ ០៧២ នៅក្នុងសង្កាត់វាលវង់ និងសំណុំរឿងលេខ ០៧៥ សង្កាត់សំបូរមាស ក៏ គ.ជ.ប យល់ព្រមតាមពាក្យបណ្តឹងរបស់គណបក្សភ្លើងទៀនដែរ។ ជារួមក្នុងបណ្តឹងចំនួន ៥ ដែលបានដាក់ នៅក្នុងសវនាការរបស់ គ.ជ.ប នៅថ្ងៃទី ២៤ ខែមីនា ឆ្នាំ ២០២២ នេះ គ.ជ.ប សម្រេចយល់ព្រមលើ ៣ បណ្តឹង និងបដិសេធ ២ បណ្តឹងចំពោះបេក្ខជនឈរឈ្មោះបញ្ជីបោះឆ្នោតជ្រើសរើសក្រុមប្រឹក្សាឃុំ-សង្កាត់ខាងមុខ។
លោកបានថ្លែងថា៖ «មានន័យថា គ.ជ.ប បដិសេធបញ្ជីបេក្ខជនរបស់គណបក្សភ្លើងទៀនដែលឈរឈ្មោះបោះឆ្នោត នៅសង្កាត់កំពង់ចាម នៅក្នុងសំណុំរឿងលេខ ០៧៣ និង សង្កាត់បឹងកុកនៅក្នុងសំណុំរឿងលេខ ០៧៤។ អ៊ីចឹង បញ្ជីបេក្ខជនគណបក្សភ្លើងទៀននៅក្នុងសង្កាត់ទាំង ២ នេះត្រូវបានបដិសេធចំពោះការមិនគ្រប់លក្ខខណ្ឌ ចំពោះការស្នើសុំចុះបញ្ជីបេក្ខជនឈរឈ្មោះបោះឆ្នោត»។
លោក ថាច់ សេដ្ឋា អនុប្រធានគណបក្សភ្លើងទៀន ប្រាប់ភ្នំពេញប៉ុស្តិ៍នៅថ្ងៃទី ២៤ ខែមីនាថា លោកមិនអាចទទួលយកសេចក្តីសម្រេចរបស់ គ.ជ.ប ដែលបានបដិសេធមិនទទួលយកបេក្ខជននៅក្នុងសង្កាត់កំពង់ចាម និងសង្កាត់បឹងកុកនោះទេ។
ទោះជាយ៉ាងណា លោកបានថ្លែងថា ប្រសិនបើ គ.ជ.ប រកឃើញមានបញ្ហាចំពោះបេក្ខជន ១ រូបក៏មិនគួរធ្វើឱ្យប៉ះពាល់ដល់បេក្ខជនផ្សេងទៀត ដែលនេះបង្ហាញពីភាពអយុត្តិធម៌ និងពិបាកទទួលយកជាទីបំផុត។
លោកបានបញ្ជាក់ថា៖ «យើងគិតមើលគ្រួសារយើងមានម្នាក់ខុសច្បាប់ ប៉ុន្តែជាប់គុកទាំងអស់ ។ ការសម្រេចនេះ វាអយុត្តិធម៌មែនទែន សម្រាប់អ្នកដែលមិនដឹងខ្លួន ។ មិនត្រឹមតែប៉ុណ្ណោះ វាប៉ះពាល់ដល់ប្រជាពលរដ្ឋដែលជាម្ចាស់ឆ្នោតដែលគេរង់ចាំបោះឆ្នោតឱ្យគណបក្សភ្លើងទៀន»។
បើតាម លោក ថាច់ សេដ្ឋា បេក្ខជនឈរឈ្មោះរបស់លោកនៅក្នុងសង្កាត់កំពង់ចាម និងសង្កាត់បឹងកុកនៃក្រុងកំពង់ចាមនេះបានទទួលរងនូវការគំរាមកំហែង និងសម្លុតគ្រប់បែបយ៉ាងដែលពិបាកក្នុងការស្វែងរកបេក្ខជនសម្រាប់ឈរឈ្មោះបោះឆ្នោត។ ទោះជាយ៉ាងណា នៅពេលដែលរកបានហើយ ក៏ទទួលបាននូវការគំរាមកំហែងក៏បេក្ខជននោះលាលែងទៅវិញ៕
.jpg)
