.jpg)
នគរបាលបង្ហាញជនសង្ស័យកំហែងប្រាក់ពីពលរដ្ឋ។ រូបថត នគរបាល
កណ្ដាលៈ អនុប្រធាន និង បុគ្គលិកអង្គការវឌ្ឈនភាពកសិកម្ម និងធម្មជាតិសរុបចំនួន ៣ នាក់ ត្រូវបានតុលាការខេត្តកណ្ដាលសម្រេចឱ្យឃុំខ្លួនជាបណ្ដោះអាសន្ន ដោយចោទប្រកាន់ពីបទ «កំហែងយក»។ នេះបើតាមសម្ដី មន្ត្រីនគរបាលជាន់ខ្ពស់ម្នាក់នៃស្នងការដ្ឋាននគរបាលខេត្តកណ្ដាល។
លោក ឡាក់ ម៉េងធី ស្នងការរងនគរបាលខេត្តកណ្ដាលទទួលបន្ទុកផ្នែកព្រហ្មទណ្ឌបានប្រាប់ភ្នំពេញប៉ុស្តិ៍ នៅថ្ងៃទី ២៤ ខែមីនា ឆ្នាំ ២០២២ ថា ជនសង្ស័យឈ្មោះ ឃិន ធី អាយុ ៤៧ ឆ្នាំ មានតួនាទីជា អនុប្រធានអង្គការវឌ្ឈនភាពកសិកម្ម និងធម្មជាតិ និងបុគ្គលិកក្រោមឱវាទរបស់គាត់ ២ នាក់ទៀត រួមមានឈ្មោះ នួន សុផានី អាយុ ៤៩ ឆ្នាំ និងម្នាក់ទៀតឈ្មោះ ឃិន ប៊ុនទី អាយុ ២៧ ឆ្នាំ ត្រូវបានកម្លាំងអធិការដ្ឋាននគរបាលស្រុកកៀនស្វាយ ចាប់ឃាត់ខ្លួនកាលពីថ្ងៃទី ២០ ខែមីនា ឆ្នាំ ២០២២ ពាក់ព័ន្ធករណី ជំរិតទារប្រាក់ពីប្រជានេសាទចំនួន ១៨ គ្រួសារ នៅក្នុងភូមិអង្គរជ័យ ឃុំបន្ទាយដែក ស្រុកកៀនស្វាយក្នុងម្នាក់ៗពី ១០-១២ ម៉ឺនរៀល ជាថ្នូរមិនបង្ក្រាបចាប់យកឧបករណ៍ឆក់ត្រីខុសច្បាប់ពីប្រជានេសាទទាំងនោះ។ បន្ទាប់ពីចាប់ខ្លួន និងសាកសួរយកចម្លើយចប់សព្វគ្រប់ហើយនោះនៅព្រឹកថ្ងៃទី ២២ ខែមីនា ឆ្នាំ ២០២២ កម្លាំងអធិការដ្ឋាននគរបាលស្រុកកៀនស្វាយ បានបញ្ជូនជនសង្ស័យទាំង ៣ នាក់ មកកាន់ការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តកណ្ដាល។ នៅរសៀលថ្ងៃដដែលនោះ ជនសង្ស័យទាំង៣ត្រូវបានកម្លាំងស្នងការដ្ឋាននគរបាលខេត្តកណ្ដាលបញ្ជូនទៅកាន់តុលាការខេត្តកណ្ដាល ដើម្បីអនុវត្តនីតិវិធីបន្ត។
លោកបញ្ជាក់ថា៖ «ក្រោយបញ្ចប់នីតិវិធីស៊ើបសួរ នៅល្ងាចថ្ងៃទី ២២ ខែមីនា ឆ្នាំ ២០២២ លោក អ៊ុក សុវណ្ណារិទ្ធ ចៅក្រមស៊ើបសួរសាលាដំបូងខេត្តកណ្ដាលបានបង្គាប់ឱ្យមន្ត្រីនគរបាលយុត្តិធម៌ នាំយកជនសង្ស័យទាំង ៣ ទៅឃុំខ្លួននៅពន្ធនាគារខេត្តកណ្ដាលជាបណ្ដោះអាសន្ន ដោយចោទប្រកាន់ពីបទកំហែងយក តាមមាត្រា ៣៦៣ និងមាត្រា ៣៦៤ នៃក្រមព្រហ្មទណ្ឌ»។
យោងតាមមាត្រា ៣៦៣ និង ៣៦៤ នៃក្រមព្រហ្មទណ្ឌ ជនសង្ស័យទាំង ៣ នាក់ នឹងត្រូវប្រឈមការផ្ដន្ទាទោសដាក់ពន្ធនាគារពី ២ ឆ្នាំ ទៅ ៥ ឆ្នាំ និងពិន័យជាប្រាក់ពី ៤ លានរៀលទៅ ១០ លានរៀល។
បើតាមលោក ម៉េងធី នៅពេលនេះ ជនសង្ស័យទាំង ៣ នាក់ កំពុងត្រូវបានឃុំខ្លួននៅពន្ធនាគារខេត្តកណ្ដាល។
យោងតាមរបាយការណ៍ស៊ើបសួររបស់សមត្ថកិច្ចនគរបាលស្រុកកៀនស្វាយ កាលពីថ្ងៃទី ២១ ខែកុម្ភៈ ឆ្នាំ ២០២២ ក្រុមជនសង្ស័យបានធ្វើសកម្មភាពជំរិតទារប្រាក់ចំនួន ២០០ ដុល្លារពីជនប្រព្រឹត្តបទល្មើសនេសាទម្នាក់ឈ្មោះ ថឺ ហុង អាយុ ៣៧ ឆ្នាំ មានទីលំនៅភូមិអង្គរជ័យ ឃុំបន្ទាយដែក ស្រុកកៀនស្វាយ ខេត្តកណ្ដាលជាថ្នូរមិនរាយការណ៍ដល់មន្ត្រីរដ្ឋបាលជលផល ឱ្យចុះបង្ក្រាបចាប់ទាំងមនុស្ស និងឧបករណ៍នេសាទខុសច្បាប់។ ១ ថ្ងៃបន្ទាប់មកក្រុមជនសង្ស័យបានជំរិតទារប្រាក់ចំនួន ១២ ម៉ឺនរៀលពីជនប្រព្រឹត្តបទល្មើសនេសាទម្នាក់ទៀតឈ្មោះ ទឹក ដំ។ ដោយបានតាំងខ្លួនឯងជាមន្ត្រីរដ្ឋបាលជលផល ក្រុមជនសង្ស័យបានបន្តសកម្មភាពចុះជំរិតទារប្រាក់ពីប្រជាពលរដ្ឋនៅក្នុងភូមិអង្គរជ័យ ឃុំបន្ទាយដែក ស្រុកកៀនស្វាយ ដែលពួកគេស៊ើបដឹងថា មានលួចប្រើឧបករណ៍ឆក់ត្រីខុសច្បាប់។ ជាពិសេសនៅថ្ងៃទី ២៦ ខែកុម្ភៈ ឆ្នាំ ២០២២ ក្រុមជនសង្ស័យបានជំរិតទារប្រាក់ពីប្រជានេសាទ ១៩ នាក់ ដែលបានធ្វើសកម្មភាពនេសាទត្រីនៅចំណុចចុងខ្សាច់ភូមិអង្គរជ័យ ក្នុងម្នាក់ៗពី ១២-១៥ ម៉ឺនរៀល។
បន្ថែមពីលើនេះ លោក ព្រំ សំណាង អធិការស្រុកកៀនស្វាយបានប្រាប់ភ្នំពេញប៉ុស្តិ៍ថា នៅថ្ងៃទី ២០ ខែមីនា ឆ្នាំ ២០២២ ក្រុមប្រជានេសាទដែលរងការជំរិតទារប្រាក់ពីក្រុមជនសង្ស័យបាននាំគ្នាធ្វើពាក្យបណ្ដឹង ប្ដឹងមកសមត្ថកិច្ចឱ្យជួយអន្តរាគមន៍ បន្ទាប់ពីដឹងថាបានចាញ់បោកឧបាយកលរបស់ក្រុមជនសង្ស័យទាំង ៣ នាក់ បំផ្លាញធនធានមច្ឆជាតិ ក្នុងតំបន់រស់នៅរបស់ខ្លួន។
លោកបានបញ្ជាក់ថា៖ «ក្នុងពាក្យបណ្ដឹងនោះ ក្រុមប្រជានេសាទចំនួន ១៨ នាក់ ដែលរងការជំរិតទារប្រាក់ពីក្រុមជនសង្ស័យបានរៀបរាប់ថា កន្លងមកពួកគាត់បានប្រព្រឹត្តបទល្មើសនេសាទឆក់ត្រី ដោយបានបង់ប្រាក់ក្នុងម្នាក់ៗពី ១២-១៥ ម៉ឺនរៀល ឱ្យទៅក្រុមជនសង្ស័យ ១ ក្រុម ដឹកនាំដោយឈ្មោះ ឃិន ធី ដែលបានអះអាងថា ជាមន្ត្រីរដ្ឋបាលជលផល។ ប៉ុន្តែការពិតក្រុមនេះជាក្រុមដើរបោកប្រាស់ ញុះញង់ពលរដ្ឋឱ្យប្រព្រឹត្តបទល្មើសនេសាទ ដើម្បីពួកគេមានឱកាសជំរិតទារប្រាក់ពីប្រជាពលរដ្ឋតែប៉ុណ្ណោះ»។
លោកបានបន្តថា ក្រៅពីបានមកដាក់ពាក្យបណ្ដឹង ក្រុមប្រជានេសាទទាំង ១៨ នាក់នោះបាននាំគ្នាប្រគល់ឧបករណ៍ឆក់ មកដល់សមត្ថកិច្ច ហើយបានស្នើសុំស្រាវជ្រាវចាប់ក្រុមជនសង្ស័យទាំងនោះ ដើម្បីឱ្យតុលាការកាត់ទោសតាមនីតិវិធីច្បាប់។ បន្ទាប់មកលោកបានដឹកនាំក្រុមការងារ ធ្វើការស្រាវជ្រាវ និងបានចាប់ខ្លួនក្រុមជនសង្ស័យ ៣ នាក់ខាងលើនៅថ្ងៃទី ២០ ខែមីនា ឆ្នាំ ២០២២ ខណៈកំពុងចុះជំរិតទារប្រាក់ពីជនរងគ្រោះ ឈ្មោះ សាត់ ស៊ីណា យឺន សេរី និងឈ្មោះ យឺន ឈួនឡោ នៅភូមិអង្គរជ័យ ឃុំបន្ទាយដែក ស្រុកកៀនស្វាយ ខេត្តកណ្ដាល ដោយយកក្នុងម្នាក់ ១០ ម៉ឺនរៀល ជាថ្នូរក្នុងការឆក់ត្រី។ លោកបានបញ្ជាក់ទៀតថា ក្រោយចាប់ខ្លួន ជនសង្ស័យទាំង ៣ បានសារភាពថា ពួកគេបានជំរិតទារប្រាក់ពីជនរងគ្រោះទាំងនោះមែន ដោយសារប្រជានេសាទទាំងនោះ ប្រើប្រាស់ឧបករណ៍ឆក់ត្រី។ ប៉ុន្តែបានបដិសេធថាមិនបានញុះញង់ឱ្យពលរដ្ឋ នេសាទត្រីដោយប្រើឧបករណ៍ឆក់នោះទេ៕
