.jpg)
លោកនាយករដ្ឋមន្ត្រី ហ៊ុន សែន។ រូបថត SPM
លោកនាយករដ្ឋមន្ត្រី ហ៊ុន សែន បានប្រកាសថានឹងសម្រាករយៈពេល ៣ ថ្ងៃក្នុងពិធីបុណ្យចូលឆ្នាំថ្មីប្រពៃណីខ្មែរក្នុងខែមេសាខាងមុខនេះ ដោយលោកនឹងចំណាយពេលជាមួយនឹងក្រុមគ្រួសារ កូនៗ និងចៅៗផងដែរ។
លោក ហ៊ុន សែន បានថ្លែងដូចនេះនាព្រឹកថ្ងៃទី ២៥ ខែ មីនា ឆ្នាំ ២០២២ នេះ ក្នុងពិធីបើកឱ្យប្រើប្រាស់ជាផ្លូវការ ផ្លូវជាតិលេខ ៥១ ប្រវែង ៣៧,៩៥ គីឡូម៉ែត្រ ចាប់ពីឧដុង្គ (ចំណុចប្រសព្វផ្លូវជាតិលេខ ៥) ដល់ថ្នល់ទទឹង (ចំណុចប្រសព្វផ្លូវជាតិលេខ ៤) ក្រោមហិរញ្ញប្បទានសម្បទាន ពីរដ្ឋាភិបាលនៃសាធារណរដ្ឋប្រជាមានិតចិន។
លោកមានប្រសាសន៍ថា៖ «សូមចូលរួមរីករាយក្នុងពិធីបុណ្យចូលឆ្នាំ បង្កលក្ខណៈសប្បាយរីករាយ ហើយនៅតាមមូលដ្ឋាននានាត្រូវការពារសន្តិសុខ សុវត្ថិភាពដល់ប្រជាពលរដ្ឋ និងត្រូវរៀបចំចាត់ចែងត្រៀមលក្ខណៈចាប់ពីពេលនេះទៅឱ្យហើយ»។
ជាមួយគ្នានោះដែរ លោកនាយករដ្ឋមន្ត្រីបានមានប្រសាសន៍ថា ភាពស៊ាំសហគមន៍ធ្វើឱ្យកម្ពុជានឹងធ្វើពិធីបុណ្យចូលឆ្នាំប្រពៃណីខ្មែរឆ្នាំនេះ ប៉ុន្តែគ្រប់គ្នាត្រូវធ្វើការប្រុងប្រយ័ត្នដោយការបន្តការពាក់ម៉ាស់ រក្សាគម្លាតសុវត្ថិភាព លាងដៃជាដើម។
លោកថា ៖ «ឆ្នាំនេះ ខ្ញុំមិនទៅណាទេ គឺខ្ញុំនឹងសម្រាកនៅកំពង់សោម មុជទឹកសមុទ្រ៣ថៃ្ងតែម្តង ហើយសម្រាប់កូនៗនិងចៅ អ្នកណាចង់ទៅក៏បាន មិនចង់ទៅក៏បាន»៕
