.jpg)
រដ្ឋបាលរាជធានីភ្នំពេញនឹងធ្វើការបញ្ចៀសចរាចរណ៍យានយន្តគ្រប់ប្រភេទជាបណ្តោះអាសន្នក្នុងពិធីសម្ពោធដាក់ឱ្យប្រើប្រាស់អគារនៃមន្ទីរពេទ្យព្រះអង្គឌួង នៅថ្ងៃទី ២៨ ខែមីនា ឆ្នាំ ២០២២ ចាប់ពីម៉ោង ០៥:០០ នាទីរហូតដល់ចប់កម្មវិធី ដែលមានការអញ្ជើញបើកសម្ពោធដោយលោកនាយករដ្ឋមន្ត្រី ហ៊ុន សែន។
លោក ឃួង ស្រេង អភិបាលរាជធានីភ្នំពេញបានចេញនូវសេចក្តីជូនដំណឹង កាលពីថ្ងៃទី ២៤ ខែមីនាថា នៅថ្ងៃទី ២៨ ខែមីនា ចាប់ពីម៉ោង ០៥:០០ នាទី ក្រសួងសុខាភិបាល និងមន្ទីរពេទ្យព្រះអង្គឌួងនឹងរៀបចំពិធីសម្ពោធដាក់ឱ្យប្រើប្រាស់អគារនៃមន្ទីរពេទ្យព្រះអង្គឌួង ដែលស្ថិតនៅភូមិ ៩ សង្កាត់ផ្សារថ្មីទី ១ ខណ្ឌដូនពេញ។
លោកបានលើកឡើងថា ដើម្បីឱ្យកម្មវិធីខាងលើប្រព្រឹត្តទៅដោយរលូន រក្សាបាននូវសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈ រដ្ឋបាលរាជធានីភ្នំពេញធ្វើការបញ្ចៀសចរាចរ និងផ្អាកចរាចរជាបណ្តោះអាសន្នជុំវិញទីតាំងប្រារព្ធពិធីរហូតដល់បញ្ចប់កម្មវិធី។
ការផ្អាកចរាចរដោយមិនអនុញ្ញាតឱ្យយានជំនិះគ្រប់ប្រភេទឆ្លងកាត់កំណាត់មហាវិថីព្រះនរោត្តម ចាប់ពីវិថីឧកញ៉ាអ៊ុងប៊ុនហ៊ូវ (ផ្លូវលេខ ១០៨) ដល់វិថីខេមរភូមិន្ទ (ផ្លូវលេខ ១៣០) កំណាត់វិថីព្រះអង្គឌួង (ផ្លូវលេខ ១១០) ចាប់ពីវិថីប៉ាស្ទ័រ (ផ្លូវលេខ ៥១) ដល់វិថីព្រះអង្គយុគន្ធរ (ផ្លូវលេខ ១៩) កំណាត់វិថីក្រមួនស (ផ្លូវលេខ ១១០) ចាប់ពីវិថីប៉ាស្ទ័រ (ផ្លូវលេខ ៥១) ដល់មហាវិថីព្រះនរោត្តម កំណាត់វិថីព្រះជ័យជេដ្ឋា (ផ្លូវលេខ ១១៨) ចាប់ពីវិថីប៉ាស្ទ័រ (ផ្លូវលេខ ៥១) ដល់វិថីព្រះអង្គយុគន្ធរ (ផ្លូវលេខ ១៩) និងកំណាត់វិថីព្រៃនគរ (ផ្លូវលេខ ១២៦) ចាប់ពីវិថីប៉ាស្ទ័រ (ផ្លូវលេខ ៥១) ដល់មហាវិថីព្រះនរោត្តម។
លោក ឃួង ស្រេង បានសុំការយោគយល់អធ្យាស្រ័យ និងបញ្ចៀសការធ្វើដំណើរឆ្លងកាត់ទីតាំងប្រារព្ធពិធីតាមកាលបរិច្ឆេទខាងលើដោយអនុគ្រោះផងដែរ ហើយរដ្ឋបាលសាលាក្រុងនឹងបើកដំណើរការចរាចរជាធម្មតាវិញពេលផុតរយៈពេលហាមឃាត់បណ្តោះអាសន្ននេះ៕
វីដេអូ៖
