.jpg)
ព្រឹត្តិការណ៍ «អំណានឮៗ» លើកកម្ពស់វប្បធម៌អាន និងកៀរគរថវិកាសាងសង់បណ្ណាល័យ នឹងត្រូវប្រារព្ធធ្វើនៅថ្ងៃ ២៦ ខែមីនា ឆ្នាំ ២០២២ ខាងមុខនេះ ដែលរៀបចំឡើង ដោយអង្គការទស្សនៈពិភពលោក។ World Vision
ព្រឹត្តិការណ៍ «អំណានឮៗ» លើកកម្ពស់វប្បធម៌អាន និងកៀរគរថវិកាសាងសង់បណ្ណាល័យ នឹងត្រូវប្រារព្ធធ្វើនៅថ្ងៃ ២៦ ខែមីនា ឆ្នាំ ២០២២ ខាងមុខនេះ ដែលរៀបចំឡើង ដោយអង្គការទស្សនៈពិភពលោក ដើម្បីគាំទ្រការប្រារព្ធទិវាអំណានជាតិ លើកកម្ពស់វប្បធម៌អានរបស់កុមារ កៀរគរថវិកាសម្រាប់ទិញសៀវភៅអាន និងកសាងបណ្ណាល័យនៅតាមសាលារៀនគោលដៅមួយចំនួនក្នុងស្រុកជាំក្សាន្ត ស្រុករវៀង និងស្រុកឆែប ខេត្តព្រះវិហារ។
លោក វ៉ា សុរិន ប្រធានក្រុមបច្ចេកទេសកម្មវិធីអប់រំនៃអង្គការទស្សនៈពិភពលោកបានលើកឡើងថា ការវិនិយោគលើការអានជាពិសេសសម្រាប់កុមារពិតជាមានសារៈសំខាន់ណាស់។
លោក វ៉ា សុរិន្ទ មានប្រសាសន៍ថា៖ «សៀវភៅគឺជាឃ្លាំងផ្ទេរចំណេះដ៏សំខាន់បំផុតមួយសម្រាប់សិស្សានុសិស្សសិក្សាស្រាវជ្រាវ និងស្វែងយល់អំពីមុខវិជ្ជាផ្សេងៗ តាំងពីវប្បធម៌ និងមុខវិជ្ជាវិទ្យាសាស្ត្រផ្សេងទៀត។ សមត្ថភាពរបស់សិស្សានុសិស្សនៅតែពឹងផ្អែកយ៉ាងខ្លាំងក្លាលើការអាន និងមើលសៀវភៅដោយខ្លួនឯងនៅពេលទំនេរពីម៉ោងសិក្សា»។
លោកបានបន្តថា ការស្រាវជ្រាវបានរកឃើញថា ការអានសៀវភៅជាប្រចាំធ្វើឱ្យមានការចងចាំល្អ មានអារម្មណ៍តានតឹងតិច និងមានការផ្ចង់អារម្មណ៍ក្នុងការងារបានល្អ ជាងអ្នកដែលមិនអានសៀវភៅជាប្រចាំ។
ប្រធានគ្រប់គ្រងថវិកាក្នុងស្រុកនៃអង្គការទស្សនៈពិភពលោក កញ្ញា ហៀម ចិត្រា បានឱ្យដឹងដែរថា តាមរយៈព្រឹត្តិការណ៍អំណានឮៗ សាធារណជនអាចចូលរួមលើកកម្ពស់វប្បធម៌អាននៅកម្ពុជា។ កញ្ញាចង់ឃើញឪពុកម្តាយគ្រប់រូប ចាប់ផ្ដើមបណ្តុះបណ្តាលកុមារតូចៗឱ្យមានសមត្ថភាពអានប្រសើរឡើង និងបណ្តុះចំណេះពួកគេឱ្យក្លាយជាធនធានមនុស្សពោរពេញដោយសក្ដានុពល ដែលអាចជួយដល់ការអភិវឌ្ឍរបស់ប្រទេសជាតិ។
កញ្ញា ហៀម ចិត្រា លើកឡើងថា៖ «ប្រជាពលរដ្ឋទាំងអស់គ្នាសុទ្ធតែអាចរួមចំណែកលើកស្ទួយបំណិនអំណានរបស់កុមារ។ លោកអ្នកអាចចាប់ផ្ដើមបណ្ដុះបំណិនអំណានដល់កុមារតូចៗជុំវិញខ្លួន ឬចូលរួមជាមួយអង្គការទស្សនៈពិភពលោក និងកម្មវិធីអំណានឮៗតាមរយៈការបរិច្ចាគជាថវិកា ឬសៀវភៅដើម្បីជាផ្នែកមួយជួយទៅដល់កុមារដែលកំពុងជួបភាពខ្វះខាតនៅតំបន់ ដែលអង្គការទស្សនៈពិភពលោកធ្វើការជាមួយ»។
កញ្ញា ចិត្រា សង្ឃឹមថាថវិកា និងសម្ភារដែលកៀរគរបានពីកម្មវិធីនេះនឹងជួយដល់កុមារនៅតាមជនបទឱ្យមានឱកាសទទួលបានសៀវភៅអាន និងអភិវឌ្ឍបំណិនអានរបស់ខ្លួនផងដែរ៕
