.jpg)
ព្រះរាជាគណៈថ្នាក់កិត្តិយស និងជាព្រះសុមង្គលសិលាចារ្យព្រះមេគណខេត្តសៀមរាប ព្រះធម្មសេរី អាភាការោ ជុំ គឹមឡេង បានក្រើនរំឭកដល់ព្រះចៅអធិការតាមបណ្តាវត្តនានាក្នុងទូទាំងខេត្ត ត្រូវណែនាំដល់ភិក្ខុ-សាមណេរក្រោមឱវាទត្រូវមានក្រឹត្យក្រមសីលធម៌ គុណធម៌ ដោយព្រះអង្គព្រមានដាក់នៅដោយឡែកពីគេ ចំពោះព្រះសង្ឃណាដែលមិនស្តាប់ការប្រៀនប្រដៅ មានអស្មឹមានៈ តេះដៀល និងប្រមាថកាតទានដល់ថ្នាក់ដឹកនាំសង្ឃ។
ព្រះអង្គមានសង្ឃដីកាដូចនេះកាលពីរសៀលថ្ងៃទី ២៣ ខែ មីនា ឆ្នាំ ២០២២ ក្នុងពេលបិទពិធីផ្សព្វផ្សាយខ្លឹមសារអនុសំវច្ឆរមហាសន្និបាតមន្ត្រីសង្ឃទូទាំងប្រទេសលើកទី ២៩ ប្រគេនដល់មន្ត្រីសង្ឃស្រុកប្រាសាទបាគង។
ព្រះធម្មសេរី អាភាការោ ជុំ គឹមឡេង មានសង្ឃដីកាថា៖ «ព្រះចៅអធិការទាំងអស់ ត្រូវណែនាំដល់ភិក្ខុ-សាមណេរក្រោមឱវាទ ត្រូវមានក្រឹត្យក្រមសីលធម៌ គុណធម៌ និងគោរពប្រតិបត្តិគ្រូឧប្ឈា និងប្រមុខថ្នាក់ដឹកនាំសង្ឃគ្រប់លំដាប់ថ្នាក់ ហើយករណីភិក្ខុ-សាមណេរអង្គណាមិនស្តាប់ការប្រៀនប្រដៅ មានអស្មឹមានៈ តេះដៀល និងប្រមាថដល់ថ្នាក់ដឹកនាំសង្ឃ ភិក្ខុឬសាមណេររូបនោះ ត្រូវដាក់ឱ្យនៅក្រៅសង្វាសនិងសហគមន៍សង្ឃ ពោលគឺទុកឱ្យនៅដាច់ដោយឡែកពីគេ»។
ពិធីផ្សព្វផ្សាយខ្លឹមសារអនុសំវច្ឆរមហាសន្និបាតមន្ត្រីសង្ឃទូទាំងប្រទេសលើកទី២៩នេះ នឹងរួមចំណែកពង្រឹងការបដិបត្តិធម៌វិន័យ ពង្រឹងប្រសិទ្ឋភាពនៃការគ្រប់គ្រងវត្តអារាម ពង្រឹងការងារពុទ្ធិកសិក្សានិងកិច្ចការមួយចំនួនទៀតដែលមានចែងក្នុងខ្លឹមសារនៃសង្ឃប្រកាស អនុសំវច្ឆរមហាសន្និបាតមន្ត្រីសង្ឃទូទាំងប្រទេសលើកទី២៩ដើម្បីរួមចំណែកបន្តការអនុវត្តកម្មវិធីគោលនយោបាយយុទ្ធសាស្ត្រចតុកោណរបស់រាជរដ្ឋាភិបាល ដើម្បីកំណើនការងារ សមធម៌និងប្រសិទ្ធភាពនៅកម្ពុជាសំដៅធ្វើឱ្យសង្គមជាតិទាំងមូលរក្សាបាននូវសុខសន្តិភាព និងការអភិវឌ្ឍ។
ព្រះតេជគុណ ឆន ឆាន ព្រះលេខាគណស្រុកប្រាសាទបាគង បានបញ្ជាក់ថា ដើម្បីឱ្យការងារគ្រប់គ្រងព្រះសង្ឃនិងទីអារាមឱ្យកាន់តែមានប្រសិទ្ធភាព និងឆ្លើយតបបានទៅតាមអនុសំវច្ឆរលើកទី២៩នេះ សាលាអនុគណស្រុកប្រាសាទបាគង បានដាក់ចេញនូវផែនការចម្បងមួយចំនួនផងដែរ។
ព្រះអង្គលើកឡើងថា ផែនការទាំងនោះរួមមាន៖ ពង្រឹងការប្រជុំប្រចាំខែជាមួយព្រះចៅអធិការនិងគណៈកម្មការគ្រប់វត្តក្នុងស្រុក, បន្តការរៀបចំរចនាសម្ព័ន្ធតែងតាំងចៅអធិការវត្តពេញសិទ្ធិឱ្យបានគ្រប់ស្រុក និងរៀបចំបោះឆ្នោតជ្រើសរើសអាចារ្យ គណៈកម្មការតាមបណ្តាវត្តនៃអាណត្តិបន្ត។
ព្រះតេជគុណ បានបន្តថា ពង្រឹងវិស័យអប់រំសាលាពុទ្ធិកសិក្សានិងធម្មវិន័យក្នុងស្រុកឱ្យប្រសើរឡើង, បន្តទំនាក់ទំនងជាមួយរដ្ឋបាលស្រុកនិងអាជ្ញាធរពាក់ព័ន្ធ , បន្តរក្សាការឧបត្ថម្ភថវិកាសមាគមទ្រទ្រង់សាលាអនុគណស្រុកជារៀងរាល់ឆ្នាំ និងបន្តកិច្ចសហការល្អជាមួយគ្រប់សមាសភាពទាំងអស់ដើម្បីរួមចំណែកក្នុងការងារសង្គមនិងការងារសាសនា៕
វីដេអូ៖
