ភ្នំពេញៈ ក្រសួងសុខាភិបាលបានប្រកាសរកឃើញអ្នកឆ្លងវីរុសកូវីដ ១៩ បន្ថែមទៀតជិត ៦០ នាក់ ដែលសុទ្ធតែជាប្រភេទវីរុសបំប្លែងថ្មីអូមីក្រុងទាំងអស់ និងមានអ្នកជាសះស្បើយបន្ថែមរហូតជាង ៦០ នាក់ផងដែរ និងមិនមានអ្នកស្លាប់ដោយសារមេរោគកូវីដ ១៩ អូមីក្រុងនេះទេ នាថ្ងៃនេះ។
សេចក្តីប្រកាសរបស់ក្រសួងសុខាភិបាលនៅថ្ងៃទី២៧ ខែមីនា ឆ្នាំ២០២២ បញ្ជាក់ថា មនុស្សចំនួន៥៩នាក់ទៀត បានឆ្លងវីរុសកូវីដ១៩ និងមានអ្នកជាសះស្បើយចំនួន៦២នាក់។ ការរកឃើញនេះមានករណីឆ្លងសហគមន៍ ចំនួន ៥៩នាក់ និងមិនមានអ្នកដំណើរមកពីបរទេសឆ្លងឡើយ។
គិតត្រឹមព្រឹកថ្ងៃទី២៧ មីនា ឆ្នាំ២០២២ កម្ពុជាមានអ្នកឆ្លងវីរុសកូវីដ១៩សរុបទូទាំងប្រទេសចំនួន១៣៥ ៤៦១នាក់ អ្នកជាសះស្បើយ សរុបចំនួន១៣១ ៤១៣នាក់ និងអ្នកស្លាប់មានចំនួន៣ ០៥៤នាក់៕