.jpg)
បុរសដែលបានស្លាប់ដោយសារជីកគាស់គល់ឈើប៉ះចំគ្រាប់មីនបណ្តាលឱ្យផ្ទុះ កាលពីថ្ងៃទី២៦មីនា។ រូបថត ស៊ីម៉ាក់
បាត់ដំបងៈ បុរសម្នាក់បានស្លាប់នៅនឹងកន្លែងកើតហេតុ និងម្នាក់ទៀតរងរបួសធ្ងន់ ដោយសារករណីផ្ទុះគ្រាប់មីន ខណៈពួកគេកំពុងជីកគាស់គល់ឈើ ដើម្បីយកទៅកែច្នៃធ្វើជាគ្រឿងសង្ហារឹម កាលពីវេលាម៉ោង ៦:៣០ នាទីព្រឹក ថ្ងៃទី ២៦ ខែ មីនា ឆ្នាំ ២០២២ នៅចំណុចភ្នំស ក្នុងភូមិសាស្ត្រឃុំរស្មីសង្ហារ ស្រុករតនមណ្ឌល។
លោក ហ៊ី រ៉ូស្មាស់ នាយនគរបាលប៉ុស្តិ៍ឃុំរស្មីសង្ហា បានប្រាប់ភ្នំបេញប៉ុស្តិ៍ថា ជនរងគ្រោះឈ្មោះ ផាង ភ័ណ្ឌ អាយុ២៧ឆ្នាំ រស់នៅភូមិដង្កោទាប សង្កាត់ទួលតាឯក ក្រុងបាត់ដំបង បានដាច់ជើងឆ្វេងម្ខាង ហើយបានស្លាប់ភ្លាមៗនៅកន្លែងកើតហេតុ ដោយសារតែមុខរបួសហូរឈាមខ្លាំងពេក។ ចំណែកអ្នករួមការងាររបស់គាត់ម្នាក់ទៀតឈ្មោះ ឆាយ កុសល អាយុ ៣៥ឆ្នាំ មានទីលំនៅភូមិអន្លង់វិល ឃុំអន្លង់វិល ស្រុកសង្កែ បានរងរបួសចំភ្នែកទាំងសងខាងត្រូវបានកម្លាំងសមត្ថកិច្ចមូលដ្ឋាន ជួយអន្តរាគមន៍នាំយកទៅមន្ទីរពេទ្យខេត្តបាត់ដំបង។
លោកថ្លែងថា៖«បើតាមសម្ដីជនរងគ្រោះ ឈ្មោះ ឆាយ កុសល មុនពេលកើតហេតុ ពួកគេបាននាំគា្ន ទៅជីកគាស់គល់ឈើប្រភេទធ្នង់ និង បេង ដើម្បីយកមកកែច្នៃជាគ្រឿងសង្ហារឹម។ កាលពីល្ងាចមុនថ្ងៃកើតហេតុ ពួកគេបានគាស់គល់បេងបានមួយ។ លុះដល់ព្រឹកថ្ងៃកើតហេតុ ពួកគេបន្តគាស់គល់ធ្នង់ តែក៏ប៉ះត្រូវក្បាលគ្រាប់ មិនស្គាល់ប្រភេទចំនួន១ ដែលត្រូវបានគេកប់ទុកកាលពីសម័យសង្គ្រាមបណ្ដាលផ្ទុះ បង្កគ្រោះថ្នាក់ដល់ពួកគេតែម្ដង»។
បើតាម លោក សន និល អធិការស្រុករតនៈមណ្ឌល ទីតាំងដែលជនរងគ្រោះទៅជីកគាស់គល់ឈើនោះ ជាអតីតទីតាំងសមរភូមិប្រយុទ្ធ ដ៏ស្វិតស្វាញមួយ កាលពីអំឡុងទសវត្សរិ៍ឆ្នាំ១៩៨០-១៩៩៩។ បច្ចុប្បន្ន តំបន់នោះនៅមិនទាន់មានការបោសសំអាតគ្រាប់មីន និងគ្រាប់យុទ្ធភណ្ឌមិនទាន់ផ្ទុះនៅឡើយទេ។
ជុំវិញករណីនេះ លោក ទ្រី បញ្ញាឫទ្ធិ ប្រធានអង្គភាពកំចាត់មីន ប្រចាំតំបន់២ ខេត្តបាត់ដំបង បានប្រាប់ភ្នំពេញប៉ុស្តិ៍ថា ភ្នំទាំងអស់ លើកលែងតែភ្នំក្នុងតំបន់រម្យណីយ៍ដ្ឋានវប្បធម៌ ទេសចរណ៍ គឺនៅមិនទាន់មានការបោសសំអាតមីន និង គ្រាប់យុទ្ធភណ្ឌមិនទាន់ផ្ទុះនោះទេ។
លោកបានថ្លែងថា៖«ក្រុមការងារយើង ទទួលផែនការបោសសំអាតមីន និង គ្រាប់យុទ្ធភ័ណ្ឌមិនទាន់ផ្ទុះ តែភ្នំណា ដែលត្រូវបានប្រមុខរដ្ឋាភិបាល កំណត់ថា ជាតំបន់រម្យណីយដ្ឋានទេសចរណ៍ ឬ វប្បធម៌ ដែលមានការសាងសង់ វត្តអារាម និង ហេដ្ឋារចនាសម្ព័ន្ធផ្សេងៗទៀតប៉ុណ្ណោះ។ ចំណែកភ្នំដែលមិនស្ថិតក្នុងគម្រោងទាំងនេះ ក្រុមការងារយើងនៅមិនទាន់មានការបោសសំអាតនោះទេ»។
បើតាមលោក បញ្ញាឫទ្ធិ គ្រាប់មីន និង គ្រាប់យុទ្ធភណ្ឌមិនទាន់ផ្ទុះ ដែលជាកាកសំណល់នៃសង្គ្រាម នៅតែបន្តធ្វើឱ្យមានគ្រោះថ្នាក់ដល់អាយុជីវតប្រជាជន ស្ទើរគ្រប់ទីកន្លែង ជាពិសេស តំបន់អតីតសមរភូមិវាយប្រយុទ្ធគ្នា។
ពាក់ព័ន្ធករណីគ្រោះថ្នាក់ដោយសារផ្ទុះក្បាលគ្រាប់ ដែលជាកាកសំណល់នៃសង្គ្រាមនេះ អ្នកស្រី ឡេង ស្រីពៅ ដែលជាម្ដាយមីង ជនរងគ្រោះ ឈ្មោះ ផាង ភណ្ឌ បានប្រាប់ភ្នំពេញប៉ុស្តិ៍ថា គាត់ពិតជានឹកស្រណោះ ក្មួយប្រុសរបស់គាត់ បើទោះជាគេ មានការងារមិនសមប្រកប ប៉ុន្តែគេនៅតែគិតគូដល់ក្រុមគ្រួសារ។
អ្នកស្រីបានបន្តថា៖«ទោះប្រាក់ខែតិចក្ដីក៏គេនៅតែចាយវាយដោយសន្សំសំចៃ ដើម្បីផ្ដល់មកជួយក្រុមគ្រួសារ។ ប៉ុន្តែឥឡូវនេះ គេបានស្លាប់ដោយសារទៅគាស់គល់ឈើ ប៉ះចំក្បាលគ្រាប់បណ្ដាលឱ្យផ្ទុះស្លាប់ ដោយមិនបានផ្ដាំផ្ញើ ឬលាបងប្អូន មាមីង និង ឪពុកម្ដាយសូម្បីតែមួយម៉ាត់»។
ដោយឡែកអ្នកស្រី ឆាយ គឹមឡាង បងស្រី ជនរងគ្រោះឈ្មោះឆាយ កុសល បាននិយាយថា នៅពេលនេះ កុសល កំពុងស្ថិតក្នុងស្ថានភាព សង្គ្រោះបន្ទាន់នៅឡើយ៕
