.jpg)
លោក ឆែម សាវុធ ពិនិត្យពន្ធនាគារនៅខេត្តបន្ទាយមានជ័យពីខែកុម្ភៈ។ រូបChhem Savu'sfb
ភ្នំពេញៈ មន្ត្រីជាន់ខ្ពស់ពន្ធនាគារលើកឡើងថា ផ្ទៃក្រឡាបន្ទប់សម្រាប់ជនជាប់ឃុំសម្រាកមានភាពប្រសើរជាងមុន ហើយការងារ គ្រប់គ្រងជនជាប់ឃុំតាមពន្ធនាគារ ធានាការពារបានសន្ដិសុខ សុវត្ថិភាព សណ្ដាប់ធ្នាប់ល្អប្រសើរផងដែរ ប៉ុន្ដែមន្ដ្រីសង្គមស៊ីវិលមើលឃើញថា ភាពចង្អៀតណែនក្នុងពន្ធនាគារនៅមិនទាន់ដោះស្រាយបាននៅឡើយទេ។
លោក ឆែម សាវុធ អគ្គនាយកពន្ធនាគារថ្លែងក្នុងពិធីបិទសន្និបាត លទ្ធផលការងារឆ្នាំ ២០២១ និងលើកទិសដៅការងារ និងផែនការ សកម្មភាពឆ្នាំ ២០២២ របស់អគ្គនាយកដ្ឋានពន្ធនាគារ នាថ្ងៃទី ២៥ មីនាថា ដើម្បីឆ្លើយតបតាមបទដ្ឋាន ជនជាប់ឃុំឃាំង ដែលធានាសន្តិសុខ សុវត្ថិភាព សុខភាព និងមនុស្សធម៌ រាជរដ្ឋាភិបាល និងក្រសួងមហាផ្ទៃបានយកចិត្តទុកដាក់ដោះស្រាយបញ្ហាប្រឈមនានាជាបន្តបន្ទាប់ ខណៈជនជាប់ឃុំបច្ចុប្បន្នមានប្រមាណជាង ៣ ម៉ឺននាក់។
លោកថ្លែងថា៖ «ជារួម បច្ចុប្បន្ននៅតាមមណ្ឌលអប់រំកែប្រែ និងពន្ធនាគាររាជធានី ខេត្ត មានអគារឃុំឃាំងចំនួន ១៧៣ អគារស្មើនឹង ១ ០១៤ បន្ទប់ មានផ្ទៃក្រឡា សរុប ៥៤ ០៨១ ម៉ែត្រក្រឡា ដែលធ្វើឱ្យផ្ទៃក្រឡាសម្រាប់ជនជាប់ឃុំសម្រាកប្រសើរជាងមុន»។
បើតាមលោក ឆែម សាវុធ ឆ្នាំ ២០២១ ការងារគ្រប់គ្រងជនជាប់ឃុំតាមពន្ធនាគារ ធានាការពារបានសន្ដិសុខ សុវត្ថិភាព សណ្ដាប់ធ្នាប់ល្អប្រសើរ ដោយបានអនុវត្តត្រឹមត្រូវតាមច្បាប់ នីតិវិធី និងបទបញ្ជាផ្ទៃក្នុងពន្ធនាគារ។ ជាមួយគ្នានេះពង្រឹងការងារ គណៈកម្មការធ្វើចំណាត់ថ្នាក់សន្ដិសុខជនជាប់ឃុំតាមពន្ធនាគារ រៀបចំអគារឃុំឃាំង និងដោះស្រាយភាពចង្អៀតណែន ការផ្ទេរសម្រួលការងារឃុំឃាំង រួមទាំងការបញ្ជូនទណ្ឌិតទៅកាន់មណ្ឌលអប់រំកែប្រែ។
លោក ប៉ាវ ហមផាន រដ្ឋលេខាធិការក្រសួងមហាផ្ទៃទទួលបន្ទុក អគ្គនាយកដ្ឋានពន្ធនាគារ កោតសរសើរដល់កិច្ចខិតខំប្រឹងប្រែងប្រកបដោយស្មារតីទទួលខុសត្រូវរបស់អគ្គនាយកដ្ឋានពន្ធនាគារ និងមន្ត្រីរាជការគ្រប់លំដាប់ថ្នាក់ដែលបានយកចិត្តទុកដាក់ជំរុញអនុវត្តផែនការការងារឆ្នាំ ២០២១ កន្លងទៅ។ លោកថា កិច្ចប្រឹងប្រែងនេះធ្វើឱ្យអគ្គនាយកដ្ឋានសម្រេចបាននូវបេសកកម្មសំខាន់ៗរបស់ខ្លួនក្នុងការអនុវត្តសម្រេចជោគជ័យស្របតាមកម្មវិធីនយោបាយរបស់រាជរដ្ឋាភិបាល ផែនការយុទ្ធសាស្ត្រអភិវឌ្ឍន៍ពន្ធនាគារស្របតាមគោលនយោបាយកំណែទម្រង់ពន្ធនាគាររបស់ក្រសួងមហាផ្ទៃ។
លោកក៏បានថ្លែងអំណរគុណចំពោះអង្គភាពពាក់ព័ន្ធ និងដៃគូអភិវឌ្ឍន៍នានា ដែលមានកិច្ចសហប្រតិបត្តិការល្អក្នុងភាពជាដៃគូដើម្បីជួយជ្រោមជ្រែងអភិវឌ្ឍមណ្ឌលអប់រំកែប្រែ និងពន្ធនាគារ រាជធានី-ខេត្ត លើការងារសន្តិសុខ សុខភាព អនាម័យ ការកសាងហេដ្ឋារចនាសម្ព័ន្ធ ការងារអប់រំកែប្រែ ការងារបណ្តុះបណ្តាលវិជ្ជាជីវៈ និងការងារសមារហណកម្មជនជាប់ឃុំចូលទៅក្នុងសហគមន៍។
លោកថ្លែងថា ការប្រយុទ្ធប្រឆាំងនឹងជំងឺកូវីដ ១៩ ក្នុងពន្ធនាគារក៏ជាបញ្ហាប្រឈមដ៏គ្រោះថ្នាក់មួយផងដែរ ប៉ុន្ដែទទួលបានការយកចិត្តទុកដាក់ខ្ពស់ និងទាន់ពេលវេលាពីសំណាក់ប្រមុខរាជរដ្ឋាភិបាលកម្ពុជា។
លោកបញ្ជាក់ថា៖ «ស្របពេលជាមួយនឹងការឆ្លងរីករាលដាលជំងឺកូវីដ ១៩ ក្នុងសហគមន៍ ការប្រយុទ្ធប្រឆាំងនឹងជំងឺកូវីដ ១៩ ក្នុងពន្ធនាគារ យើងអាចគ្រប់គ្រង និងព្យាបាលបានជំងឺនេះនៅក្នុងពន្ធនាគារ ហើយមន្ដ្រីអនុរក្សពន្ធនាគារ និងជនជាប់ឃុំត្រូវបានទទួលការចាក់វ៉ាក់សាំងដូសទី ១ ដូសទី ២ និងដូសទី ៣»។
លោក អំ សំអាត នាយករងនៃអង្គការការពារសិទ្ធិមនុស្ស (លីកាដូ) ទទួលស្គាល់ថា អគ្គនាយកដ្ឋានពន្ធនាគារដ៏ដូចជា ក្រសួងមហាផ្ទៃ បានខិតខំកែលម្អទៅលើពន្ធនាគារ។ ប៉ុន្ដែទោះជាយ៉ាងណា ការសាងសង់ហេដ្ឋារចនាសម្ព័ន្ធ អគារផ្សេងៗនៅក្នុងពន្ធនាគារ មិនទាន់ឆ្លើយតបទៅនឹងភាពចង្អៀតណែនរបស់ជនជាប់ឃុំក្នុងពន្ធនាគារនៅឡើយទេ។
លោកថ្លែងថា៖ «យើងឃើញថា កំណើនជនជាប់ឃុំនៅក្នុងពន្ធនាគារ នៅតែមានច្រើន ហើយភាគច្រើនពាក់ព័ន្ធនឹងបទល្មើសគ្រឿងញៀន។ អ៊ីចឹង យើងមើលទៅ ទោះបីជាយ៉ាងណា ក៏ស្ថានភាពនៅក្នុងពន្ធនាគារស្ថិតនៅក្នុងភាពចង្អៀតណែននៅឡើយ»។
លោកបន្ថែមថា ស្ថានភាពចង្អៀតណែនក្នុងពន្ធនាគារនេះបានបង្កផលប៉ះពាល់ច្រើន ដូចជា ការគ្រប់គ្រងរបស់ពន្ធនាគារក្នុងនោះចំនួនមន្ដ្រីគ្រប់គ្រងតាមពន្ធនាគារមានចំនួនមិនឆ្លើយតបទៅនឹងចំនួនជនជាប់ឃុំ។ ធ្វើឱ្យមន្ដ្រីពន្ធនាគារធ្វើការងារច្រើន ហើយភាពចង្អៀតណែនក៏បង្កផលប៉ះពាល់ដល់ការរស់នៅរបស់ជនជាប់ឃុំផងដែរ។ លោកថា កាលណាមានភាពចង្អៀតណែនក្នុងពន្ធនាគារ ប៉ះពាល់ដល់ស្ថានភាពសុខភាពរបស់ជនជាប់ឃុំ អាចបង្កជាជំងឺថប់អារម្មណ៍ និងបណ្ដាលឱ្យសម្ពាធឈាមឡើង ឬបង្កជាជំងឺលើសឈាមជាដើម។
លោកបញ្ជាក់ថា៖ «ខ្ញុំនៅតែយល់ថា ភាពចង្អៀតណែននៅក្នុងពន្ធនាគារនេះ គឺនៅមិនទាន់មានការកាត់បន្ថយបានទេ។ អ្វីដែលអង្គការសង្គមស៊ីវិលដែលយើងផ្ដល់អនុសាសន៍កន្លងមក គឺវាពាក់ព័ន្ធជាមួយនឹងបញ្ហាតុលាការ។ ដូច្នេះតុលាការ ត្រូវជ្រើសរើសយកសេរីភាពមូលដ្ឋានរបស់ជនជាប់ឃុំលើការអនុញ្ញាតឱ្យ ជនជាប់ឃុំនៅក្រៅឃុំបណ្ដោះអាសន្នជាជាងការឃុំខ្លួន បើសិនជាករណីបទល្មើសមជ្ឈិមកម្រិតស្រាលជាដើម»៕
