.jpg)
លោកនាយករដ្ឋមន្ត្រី ហ៊ុន សែន ថ្លែងសារនាពេលកន្លងមក។ រូបថត SPM
ភ្នំពេញៈ រាជរដ្ឋាភិបាលបានត្រៀមថវិកាប្រមាណ ៨ លានដុល្លារឧបត្ថម្ភដល់មន្ដ្រីរាជការ និងកម្លាំងប្រដាប់អាវុធប្រមាណ ៥០ ម៉ឺននាក់ សម្រាប់ពិធីចូលឆ្នាំថ្មីប្រពៃណីជាតិខ្មែរ និងពិធីបុណ្យភ្ជុំបិណ្ឌឆ្នាំនេះដោយមន្ដ្រីរាជការម្នាក់ៗ និងគ្រួសារជនពលី និងជនមរណៈជាអតីតយុទ្ធជន ១ គ្រួសារនឹងទទួលបាន ១០ ម៉ឺនរៀល។ យោងតាមអនុក្រឹត្យចុះហត្ថលេខាដោយលោកនាយករដ្ឋមន្ដ្រី ហ៊ុន សែន កាលពីថ្ងៃទី ២៥ ខែមីនា ឆ្នាំ ២០២២។
អនុក្រឹត្យនេះបានឱ្យដឹងថា រាជរដ្ឋាភិបាលបានសម្រេចផ្ដល់ប្រាក់ឧបត្ថមុ្ភចំនួន ១០ ម៉ឺនរៀលជូនដល់មន្ត្រីរាជការស៊ីវិលនៃក្រុមនីតិប្បញ្ញត្តិ នីតិប្រតិបត្តិ តុលាការ មន្ត្រីនគរបាលជាតិកម្ពុជា មន្ត្រីពន្ធនាគារក្រសួងមហាផ្ទៃ យោធិននៃកងយោធពលខេមរភូមិន្ទ មន្ត្រីរាជការនៃអាជ្ញាធរសវនកម្មជាតិ មន្ត្រីរាជការនៃគណៈកម្មាធិការជាតិរៀបចំការបោះឆ្នោត មន្ត្រីខុទ្ទកាល័យ ដូចមានកំណត់ក្នុងអនុក្រឹត្យលេខ ១១ ចុះថ្ងៃទី ៣១ ខែ មករា ឆ្នាំ ២០១៧ ស្តីពីការរៀបចំ និងការប្រព្រឹត្តទៅរបស់ខុទ្ទកាល័យនាយករដ្ឋមន្ត្រី។
ដូចជា មន្ត្រីដែលមានឋានៈស្មើសមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ ឃុំ សង្កាត់ មន្ត្រីនៃការិយាល័យប្រជាពលរដ្ឋនៅរដ្ឋបាលថ្នាក់ក្រោមជាតិ ប្រធានភូមិ អនុប្រធានភូមិ សមាជិកភូមិ មន្ត្រីជាប់កិច្ចសន្យា និងបុគ្គលិកអណ្ដែត ដែលកំពុងបម្រើការងារនៅថ្នាក់ជាតិ និងថ្នាក់ក្រោមជាតិ ព្រមទាំងនិវត្តជន ជនបាត់បង់សម្បទាវិជ្ជាជីវៈ ជនបាត់បង់សមត្ថភាពការងារ និងជនពិការ ដែលជាអតីតមន្ត្រីរាជការស៊ីវិល អតីតយោធិននៃកងយោធពលខេមរភូមិន្ទ និងអតីតមន្ត្រីនគរបាលជាតិកម្ពុជា។
លោកនាយករដ្ឋមន្ត្រីថ្លែងថា៖ «ក្រសួង ស្ថាប័នថ្នាក់ជាតិ និងរដ្ឋបាលថ្នាក់ក្រោមជាតិ ត្រូវលើកសំណើជាក់ស្ដែងអំពីចំនួនមន្ដ្រីដែលត្រូវទទួលប្រាក់ឧបត្ថម្ភមកក្រសួងសេដ្ឋកិច្ច និងហិរញ្ញវត្ថុជាការប្រញាប់ ដើម្បីក្រសួងសេដ្ឋកិច្ច និងហិរញ្ញវត្ថុរៀបចំប្រកាសបន្ថែមឥណទានថវិកាជូនទាន់ពេលវេលា និងធានាឱ្យការបើកផ្ដល់ប្រាក់ឧបត្ថម្ភនេះអនុវត្ដបានទាន់ពេលវេលា»។
បើតាមអនុក្រឹត្យ ក្រសួងសេដ្ឋកិច្ច និងហិរញ្ញវត្ថុ និងក្រសួង ស្ថាប័នសាមី ត្រូវសហការ និងចាត់ចែងរៀបចំការបើកផ្ដល់ជាបុរេប្រទានសម្រាប់ប្រាក់ឧបត្ថម្ភ ក្នុងឱកាសពិធីចូលឆ្នាំថ្មីឱ្យដល់សាមីជនម្នាក់ៗយ៉ាងយូរបំផុតត្រឹមថ្ងៃទី ១៣ ខែមេសា ឆ្នាំ ២០២២ និងប្រាក់ឧបត្ថម្ភក្នុងឱកាសបុណ្យភ្ជុំបិណ្ឌនៅក្នុងពេលបើកបៀវត្សរ៍នៃខែកញ្ញា ឆ្នាំ ២០២២។
លោកនាយករដ្ឋមន្ដ្រីបញ្ជាក់ថា ក្នុងមន្ដ្រីរាជការម្នាក់ៗនឹងទទួលបានប្រាក់ឧបត្ថម្ភ ៥ ម៉ឺនរៀល សម្រាប់ពិធីចូលឆ្នាំថ្មីហើយ ៥ ម៉ឺនរៀលទៀត សម្រាប់ពិធីបុណ្យភ្ជុំបិណ្ឌ។ ចំពោះគ្រួសារជនពលី និងគ្រួសារជនមរណៈជាអតីតយុទ្ធជនក៏ត្រូវបានផ្តល់ជូនប្រាក់ឧបត្ថម្ភនេះដែរ។ ប្រាក់ឧបត្ថម្ភនេះត្រូវបានផ្តល់សម្រាប់ម្នាក់ៗ ឬ ១ គ្រួសារតែ ១ កន្លែង និង ១ លើកប៉ុណ្ណោះ។
បើតាមអនុក្រឹត្យ ការបើកផ្តល់ប្រាក់ឧបត្ថម្ភត្រូវអនុវត្តតាមគណនីបៀវត្សរ៍របស់សាមីជន ឬគ្រួសារជនពលី និងគ្រួសារជនមរណៈជាអតីតយុទ្ធជន។ ក្រសួង ស្ថាប័ន និងអង្គភាពដែលមិនទាន់បានបើកគណនីបៀវត្សរ៍សម្រាប់មន្ត្រីរាជការ បុគ្គលិក និងភ្នាក់ងារសាធារណៈរបស់ខ្លួនត្រូវចាត់ចែងការបើកផ្តល់ប្រាក់ឧបត្ថម្ភឱ្យបានដល់សាមីជនម្នាក់ៗគ្រប់ចំនួន និងទាន់ពេលវេលា។
អ្នកនាំពាក្យក្រសួងមុខងារសាធារណៈ លោក យក់ ប៊ុនណា ប្រាប់ ភ្នំពេញ ប៉ុស្តិ៍ បន្ថែមថា ទោះបីជាកម្ពុជាកំពុងប្រយុទ្ធប្រឆាំងទៅនឹងជំងឺកូវីដ ១៩ ក្តី ប៉ុន្តែរាជរដ្ឋាភិបាលតែងតែយកចិត្តទុកដាក់ចំពោះមន្ត្រីរាជការ និងបានត្រៀមថវិកាចំនួន ៨ លានដុល្លារ សម្រាប់ឧបត្ថម្ភដល់មន្ត្រីរាជការជាង ៥០ ម៉ឺននាក់។
លោកថា៖ « យើងដឹងទាំងអស់គ្នាហើយថា យើងកំពុងជួបស្ថានភាពកូវីដ ទោះយ៉ាងណាក្តីរាជរដ្ឋាភិបាលព្យាយាមរកវិធីដោះស្រាយ និងលើកទឹកចិត្តមន្ត្រីរាជការ កងកម្លាំងប្រដាប់អាវុធ និងមន្ត្រីទាំងអស់ក្នុងស្ថានភាពលំបាកនេះ ជាពិសេសដើម្បីចូលរួមក្នុងកម្មវិធីបុណ្យចូលឆ្នាំថ្មី និងបុណ្យភ្ជុំបិណ្ឌដែរ»។
នាយកប្រតិបត្តិនៃអង្គការតម្លាភាពកម្ពុជា លោក ប៉ិច ពិសី ធ្លាប់ថ្លែងថា ការផ្ដល់ប្រាក់ឧបត្ថម្ភដល់មន្ដ្រីរាជការនេះ រាជរដ្ឋាភិបាលបានធ្វើជាទៀងទាត់ក្នុងរយៈពេលប៉ុន្មានឆ្នាំ ចុងក្រោយនេះ។
លោកថ្លែងថា៖ «ខ្ញុំគិតថាបើសិនជាថវិកាជាតិយើងអត់មានបញ្ហា ការផ្ដល់ប្រាក់ឧបត្ថម្ភដល់មន្ដ្រីរាជការនេះ គឺជារឿងល្អ ព្រោះមន្ដ្រីរាជការរបស់យើងមានប្រាក់បៀវត្សរ៍តិច ដូច្នេះប្រាក់ឧបត្ថម្ភនេះគឺជាឱកាសមួយសម្រាប់មន្ដ្រីរាជការទទួលបានប្រាក់សម្រាប់ប្រើប្រាស់ក្នុងឱកាសពិធីបុណ្យទាន»។
លោក ណន ដារី ជាគ្រូបង្រៀននៅស្រុកកំពង់សៀម ខេត្តកំពង់ចាមបានបញ្ជាក់ឱ្យឃើញថា រាជរដ្ឋាភិបាលបានគិតគូរពីសុខទុក្ខរបស់មន្ត្រីរាជការសម្រាប់ការចំណាយនៅកម្មវិធីបុណ្យផ្សេងៗដែលជាការលើកទឹកចិត្តឱ្យខិតខំបំពេញការងារបន្តទៀត។ លោកថា៖ «ចំពោះថវិកានេះមិនតិចមិនច្រើន តែសមរម្យសម្រាប់ ជួយដល់ការចំណាយទៅលើការចាក់សាំង និងទិញ»៕
វីដេអូ៖
