.jpg)
មន្ត្រីនគរបាលប៉ុស្តិ៍ដែលត្រូវជាប់ឃុំករណីឃាតកម្ម។ រូបថត នគរបាល
ព្រៃវែងៈ តុលាការខេត្តព្រៃវែងសម្រេចឃុំខ្លួននាយប៉ុស្តិ៍នគរបាលម្នាក់ពីបទឃាតកម្ម និងប្រើប្រាស់អាវុធខុសច្បាប់កាលពីថ្ងៃទី ២៦ មីនា បន្ទាប់ពីបង្កហេតុ និងឃាត់ខ្លួនបាន ២ ថ្ងៃប្រព្រឹត្តនៅភូមិផាត់សណ្តោង ឃុំព្នៅទី ១ ស្រុកស៊ីធរកណ្តាល ខេត្តព្រៃវែង។
លោកស្រី អាត សុខន អ្នកនាំពាក្យតុលាការខេត្តព្រៃវែងឱ្យដឹងនៅថ្ងៃទី ២៧ មីនាថា ជនត្រូវចោទឈ្មោះ ម៉ៅ សុវណ្ណហុង ជានាយនគរបាលប៉ុស្តិ៍ឃុំព្នៅទី ១ ក្នុងស្រុកស៊ីធរកណ្តាលត្រូវបានចៅក្រមស៊ើបសួរសម្រេចចេញដីកាឃុំក្នុងពន្ធនាគារខេត្តព្រៃវែងកាលពីថ្ងៃទី ២៦ មីនា។ ជនត្រូវចោទត្រូវបានតំណាងអយ្យការចោទប្រកាន់ក្នុង ២ បទល្មើស។
លោកស្រីថ្លែងថា៖ «គាត់ត្រូវបានចៅក្រមស៊ើបសួរចោទបទឃាតកម្ម និងកាន់កាប់អាវុធខុសច្បាប់ និងបញ្ជូនទៅឃុំខ្លួនបណ្តោះអាសន្ននៅក្នុងពន្ធនាគារខេត្ត។ តំណាងអយ្យការបានចោទបទឃាតកម្មតាមមាត្រា ១៩៩ និងកាន់កាប់អាវុធខុសច្បាប់តាមមាត្រា ៤៩០ នៃក្រមព្រហ្មទណ្ឌ»។
យោងមាត្រា ១៩៩ បទឃាតកម្មត្រូវផ្តន្តាទោសដាក់ពន្ធនាគារពី ១០ ដល់ ១៥ ឆ្នាំ រីឯបទកាន់កាប់អាវុធខុសច្បាប់តាមមាត្រា ៤៩០ នៃក្រមព្រហ្មទណ្ឌដែរនោះត្រូវផ្តន្ទាទោសពី ៦ ខែទៅ ៣ ឆ្នាំ និងពិន័យជាប្រាក់ចូលថវិការដ្ឋពី ១ លានទៅ ៦ លានរៀល។ នេះប្រសិនបើតុលាការរកឃើញថា ជនត្រូវចោទពិតជាបានប្រព្រឹត្តមែន។
លោក សេង សាវ៉ន អធិការនគរបាលស្រុកស៊ីធរកណ្តាលនៅថ្ងៃទី ២៧ មីនាបានរៀបរាប់ពីហេតុការណ៍ថា ជនត្រូវចោទឈ្មោះ ម៉ៅ សុវណ្ណហុង អាយុ ៥៣ ឆ្នាំ មានប្រពន្ធ និងមានកូនហើយ ប៉ុន្តែលោកនាយប៉ុស្តិ៍រូបនោះបានលួចមានទំនាក់ទំនងស្នេហាជាមួយស្ត្រីមេម៉ាយម្នាក់ឈ្មោះ សុខ មួយ អាយុ ៥១ ឆ្នាំ រស់នៅភូមិព្នៅ ឃុំព្នៅទី ១ ស្រុកស៊ីធរកណ្តាល។ ការលួចមានទំនាក់ទំនងស្នេហាជាមួយគ្នានេះមានរយៈពេលជាយូរមកហើយ។ ក្រោយមកស្ត្រីឈ្មោះ សុខ មួយ បានមកប្តឹងនៅអធិការដ្ឋាននគរបាលស្រុកស៊ីធរកណ្តាល និងផ្តិតមេដៃសន្យានៅចំពោះមុខអាជ្ញាធរមានសមត្ថកិច្ចថា គាត់ផ្តាច់ទំនាក់ទំនងស្នេហាជាមួយលោក ម៉ៅ សុវណ្ណហុង នាយនគរបាលប៉ុស្តិ៍ឃុំព្នៅទី ១ នោះហើយ។ បន្ទាប់មកសមត្ថកិច្ចនគរបាលស្រុកស៊ីធរកណ្តាលបានកោះហៅ លោកនាយនគរបាលប៉ុស្តិ៍រូបនោះមកណែនាំហើយឱ្យឈប់ទំនាក់ទំនងជាមួយស្ត្រីឈ្មោះ សុខ មួយ ទៀតដោយសមត្ថកិច្ចប្រាប់ទៅលោកមេប៉ុស្តិ៍ថា ស្ត្រីរូបនោះបានមកប្តឹងដើម្បីឱ្យសមត្ថកិច្ចជួយធ្វើអន្តរាគមន៍ឱ្យគាត់។
លោកអធិការ សាវ៉ន បន្តទៀតថា ថ្ងៃក្រោយមកទៀតស្រាប់តែលោកមេប៉ុស្តិ៍រូបនោះបានទៅគោះទ្វារផ្ទះរបស់ស្ត្រីឈ្មោះ សុខ មួយ ទាំងយប់ក្នុងបំណងសុំត្រូវរ៉ូវគ្នាឡើងវិញ តែត្រូវបាននាងបដិសេធហើយក៏មិនព្រមបើកទ្វារឱ្យចូលក្នុងផ្ទះដែរ។ ចៃដន្យនៅយប់ថ្ងៃទី ២៤ មីនា គឺមានរយៈពេលប្រមាណ ២ ខែមកហើយគិតដល់ថ្ងៃកើតហេតុ។ ស្ត្រី សុខ មួយ បានទៅស៊ីការជាមួយនឹងបុរសម្នាក់រស់នៅក្នុងភូមិផាត់សណ្តោងជាមួយគ្នា ហើយភូមិដែលមានពិធីរៀបការ ដោយលោកមេប៉ុស្តិ៍ក៏ទៅចូលរួមស៊ីការនៅក្នុងពិធីនោះដែរ ក្រោយចេញពីរោងការ មេប៉ុស្តិ៍គំរាមសម្លាប់ស្ត្រីរូបនោះដែលជិះជាមួយបុរសម្នាក់។ ក្រោយពីបុរសម្នាក់នោះជិះម៉ូតូចេញបានបន្តិច ស្រាប់តែជនត្រូវចោទដកកាំភ្លើងខ្លីបាញ់ចំក្បាលស្ត្រីរងគ្រោះ ១ គ្រាប់ និងចំត្រង់ក ១ គ្រាប់ទៀត ដួលស្លាប់ភ្លាមៗនៅកន្លែងកើតហេតុ។ ចំណែកជនត្រូវចោទបានបាញ់ក្បាលខ្លួនឯង ២ គ្រាប់ដែរតែមិនផ្ទុះហើយបានដឹងដល់សមត្ថកិច្ចចុះឃាត់ខ្លួនក្រោយកើតហេតុនោះដែរ៕
