.jpg)
លោកស្រី ភឿង សកុណា (ឆ្វេង) កំពុងដាំកូនឈើពីថ្ងៃទី ២៧ មីនា។ រូប អាជ្ញាធរជាតិអប្សរា
សៀមរាបៈ លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានលើកឡើងថា ការដាំដើមឈើឡើងវិញ និងការថែរក្សាព្រៃឈើ ជាសកម្មភាពមួយក្នុងការចូលរួមថែរក្សាវប្បធម៌ឱ្យបានគង់វង្ស សម្រាប់កូនចៅជំនាន់ក្រោយ និងជាផ្នែកមួយដ៏សំខាន់ ក្នុងការថែរក្សា និងអភិរក្សប្រាសាទ។
លោកស្រី ភឿង សកុណា បានថ្លែងបែបនេះ កាលពីចុងសប្តាហ៍កន្លងទៅក្នុងពិធីដាំកូនឈើនៅក្នុងឧទ្យានអនុស្សាវរីយ៍អង្គរ តូតាល់អេនើជី (Total Energies) នារមណីយដ្ឋានអង្គរ ខេត្តសៀមរាប។
លោកស្រីមានប្រសាសន៍ថា៖ «ប្រាសាទតែងតែនៅជាមួយគ្នានឹងមនុស្ស ព្រៃព្រឹក្សា និងទឹក ដូចនេះការដាំកូនឈើឡើងវិញ ជាចំណែកមួយជួយថែរក្សាមរតកវប្បធម៌កេរដូនតារបស់យើង ហើយនៅតាមទីវត្តអារាមនានាក៏មានការដាំកូនឈើ ដែលវាផ្តល់នូវអត្ថប្រយោជន៍ជាច្រើន ទាំងការរក្សាលំនឹងបរិស្ថាន នាំទឹកភ្លៀងទៀងទាត់តាមរដូវ ជួយឱ្យដីមានសំណើម ផ្តល់ជាម្លប់ និងសម្ភារប្រើប្រាស់ជាផ្ទះសំបែង កុដិសាលា អគារផ្សេងៗយ៉ាងច្រើនឥតគណនាដល់យើងទៀតផង»។
ការដាំកូនឈើឡើងវិញនាពេលនេះ ពិតជាមានសារៈសំខាន់ណាស់ ដែលវានឹងជួយដល់ស្ថានភាពបរិស្ថាននាពេលបច្ចុប្បន្ន ក្នុងការជួយកាត់បន្ថយការប្រែប្រួលអាកាសធាតុ ទប់ស្កាត់ទឹកជំនន់ ខ្យល់ព្យុះបាក់ស្រុតដីជាដើម ស្របពេលដែលបច្ចុប្បន្នពិភពលោកកំពុងប្រឈមនឹងកម្ដៅ ដោយសារតែការប្រែប្រួលអាកាសធាតុ បណ្តាលមកពីឧស្ម័នកខ្វក់កើតឡើងពីកាកសំណល់ប្លាស្ទិកដែលមនុស្សប្រើប្រាស់ហើយបោះបង់ចោល។ នេះជាការបញ្ជាក់បន្ថែមរបស់លោកស្រី ភឿង សកុណា។
លោកស្រីមានប្រសាសន៍ថា៖ «ខ្ញុំចង់បញ្ជាក់ថា អ្វីក៏ដោយ ទោះបីជាមានគោលនយោបាយល្អយ៉ាងណាក៏ដោយ ប្រសិនបើមិនមានការចូលរួមទេ មិនមានការយល់ដឹងទេនោះ យើងមិនអាចសម្រេចបាននោះទេ។ ដូចជាករណីចាក់វ៉ាក់សាំងជាដើម គឺដោយសារតែកម្ពុជាមានគោលនយោបាយច្បាស់លាស់ មានចក្ខុវិស័យវែងឆ្ងាយ និងមានការចូលរួមទាំងអស់គ្នារបស់ប្រជាពលរដ្ឋ ទើបធ្វើឱ្យកម្ពុជាបានចាក់វ៉ាក់សាំងបានច្រើនជាង ៩០ ភាគរយ»។
លោកស្រី ភឿង សកុណា បានបន្ដថា ការដាំដើមឈើ ឬការធ្វើសកម្មភាពនានាទៅបាននេះ ក៏អាស្រ័យលើប្រទេសជាតិមានសន្ដិភាព បើគ្មានសន្ដិភាព ក៏គ្មានមនុស្សជួបជុំគ្នាដាំដើមឈើដូចពេលនេះដែរ ដែលជាក់ស្ដែង បច្ចុប្បន្នមានប្រទេសមួយចំនួនកំពុងមានសង្គ្រាម ដែលពួកគាត់មិនអាចជួបជុំគ្នាដាំដើមឈើបានឡើយ។
យោងតាមមន្ទីរព័ត៌មានខេត្តសៀមរាបបានឱ្យដឹងថា ក្រុមហ៊ុនតូតាល់អេនើជី បានបង្កើតឧទ្យានអនុស្សាវរីយ៍អង្គរ តូតាល់អេនើជី នៅតំបន់រមណីយដ្ឋានអង្គរ ហើយបានសហការជាមួយអាជ្ញាធរជាតិអប្សរា រៀបចំការដាំកូនឈើប្រណីតចំនួន ៤ ប្រភេទ ស្មើនឹង ២០០ ដើម។ ដើមឈើទាំងនោះ រួមមានប្រភេទឈើធ្នង់ ឈើបេង ឈើគ្រញូង និងឈើគគីរ។
ក្នុងឧទ្យាន អនុស្សាវរីយ៍អង្គរតូតាល់អេនើជីនេះ ធ្វើឡើងក្រោមកិច្ចសហការរវាងអាជ្ញាធរជាតិអប្សរា និងក្រុមហ៊ុន តូតាល់អេនើជី នាពេលកន្លងមក បានរួមគ្នាដាំកូនឈើបានចំនួនប្រមាណជាង ១ ម៉ឺនដើមរួចមកហើយ ដោយក្នុងផែនការរយៈពេល ៥ ឆ្នាំ នឹងដាំកូនឈើឱ្យបានជាង ២ ម៉ឺនដើម ក្នុងទំហំផ្ទៃដីចំនួន ៨ ហិកតា ក្នុងឧទ្យានមួយនេះ៕
