លោកស្រី Pauline Tamesis ក្នុងជំនួបជាមួយលោក លី ធុជ។ រូប អាជ្ញាធរមីន
ភ្នំពេញៈ អ្នកសម្របសម្រួលអង្គការសហប្រជាជាតិប្រចាំនៅកម្ពុជាលោកស្រី Pauline Tamesis បានវាយតម្លៃខ្ពស់ចំពោះសមិទ្ធផលសម្រេចបានសម្រាប់វិស័យមីនក្នុងអាណតិ្តបេសកកម្មរយៈពេល ៤ ឆ្នាំរបស់លោកស្រីនៅកម្ពុជា ខណៈក្នុងអាណត្ដិនេះ UN ក៏បានគាំទ្រដល់ការរៀបចំសន្និបាតជាតិ សកម្មភាពមីន និងចូលរួមដល់ការរៀបចំ និងកសាងនូវផែនការយុទ្ធសាស្ត្រជាតិសកម្មភាពមីន ២០១៨-២០២៥ ផងដែរ។
លោកស្រីបានលើកឡើងបែបនេះ ក្នុងជំនួបជាមួយ លោកទេសរដ្ឋមន្ត្រី លី ធុជ អនុប្រធានទី ១ អាជ្ញាធរមីន កាលពីថ្ងៃទី ២៨ ខែមីនា ឆ្នាំ ២០២២ នៅទីស្នាក់ការអាជ្ញាធរមីន ក្នុងឱកាសដែលលោកស្រីចូលជួបសម្តែងការគួរសម និងជម្រាបលាការងារ។
លោកស្រី Pauline Tamesis បានអបអរសាទរ និងវាយតម្លៃខ្ពស់ ចំពោះការដឹកនាំរបស់រាជរដ្ឋាភិបាលកម្ពុជា ដែលមានលោកនាយករដ្ឋមន្ដ្រី ហ៊ុន សែន ជាប្រមុខ បានធ្វើឱ្យប្រទេសជាតិមានការអភិវឌ្ឍលើគ្រប់វិស័យ និងធ្វើឱ្យកម្ពុជាមានការប្រែប្រួលមុខមាត់ខ្លាំង ដែលលោកស្រីបានមើលឃើញយ៉ាងច្បាស់ក្នុងអាណត្តិបេសកកម្មរបស់លោកស្រីនៅកម្ពុជា។
លោកស្រី Pauline Tamesis ក៏បានកោតសរសើរ ចំពោះសមិទ្ធផលសម្រេចបាន សម្រាប់វិស័យមីនកម្ពុជា ក្រោមការងារសម្របសម្រួល និងដឹកនាំរបស់អាជ្ញាធរមីន។ លោកស្រីថ្លែងថា៖ «UN នឹងបន្តចូលរួមជាមួយរាជរដ្ឋាភិបាលក្នុងវិស័យសកម្មភាពមីននៅកម្ពុជា និងបន្តកៀរគរធនធានគាំទ្រដល់គោលដៅរបស់កម្ពុជារហូតដល់ឆ្នាំ ២០២៥»។
លោកស្រីបានវាយតម្លៃខ្ពស់ចំពោះការយកចិត្តទុកដាក់របស់រាជរដ្ឋាភិបាលកម្ពុជា ដែលបានដាក់ចេញនូវចក្ខុវិស័យដឹកនាំយ៉ាងច្បាស់លាស់ ដោយបានដាក់បញ្ចូលការងារសកម្មភាពមីនក្នុងគោលដៅទី ១៨ នៃការអភិវឌ្ឍប្រកបដោយចីរភាព និងគោលនយោបាយសំខាន់ៗសម្រាប់អភិវឌ្ឍជាតិ។
លោក លី ធុជ បានថ្លែងអំណរគុណដល់លោកស្រី Pauline Tamesis ដែលបានផ្តល់នូវភាពជាមិត្ត ជាដៃគូ និងកិច្ចសហប្រតិបត្តិការយ៉ាងល្អជាមួយរាជរដ្ឋាភិបាល និងប្រជាជនកម្ពុជា ព្រមទាំងបានគាំទ្រដល់កិច្ចដំណើរការថែរក្សាសន្តិភាពក៏ដូចជាការងារបោសសម្អាតមីន ក្នុងអាណត្តិបេសកកម្មរបស់លោកស្រី។
លោកបានបន្តថា៖ «តាំងពីចាប់ផ្តើមដំណើរបេសកកម្មរបស់លោកស្រីអ្នកសម្របសម្រួល UN ប្រចាំនៅកម្ពុជា ឆ្នាំ ២០១៨ លោកស្រីបានចូលរួមគាំទ្រដល់ការរៀបចំសន្និបាតជាតិ សកម្មភាពមីន និងចូលរួមដល់ការរៀបចំ និងកសាងនូវផែនការយុទ្ធសាស្ត្រជាតិ សកម្មភាពមីន ២០១៨-២០២៥ ផងដែរ»។
ក្នុងនាមរាជរដ្ឋាភិបាលកម្ពុជា លោកទេសរដ្ឋមន្ត្រីបញ្ជាក់ថា ដើម្បីគាំទ្រដល់ផែនការអាទិភាពរបស់រាជរដ្ឋាភិបាល និងឈានទៅសម្រេចបាននូវចក្ខុវិស័យ “កម្ពុជាមួយគ្មានមីនឆ្នាំ ២០២៥” អាជ្ញាធរមីន បានរៀបចំនូវគោលការណ៍ណែនាំស្តីពីការអនុវត្តយន្តការភូមិអស់មីន ដែលនឹងធានាថា រាល់ចម្ការមីនទាំងអស់ ដែលមាននៅក្នុងភូមិត្រូវបានបោសសម្អាតក្នុងគោលដៅជួយពន្លឿនដល់ការបោសសម្អាតមីន និងទាក់ទាញនូវការចូលរួមគាំទ្រពីម្ចាស់ជំនួយថ្មីៗ និងវិស័យឯកជនបន្ថែមទៀត។
លោក លី ធុជ បានឱ្យដឹងថា អាជ្ញាធរមីនបាននិងកំពុងធ្វើចលនាកៀរគរធនធានហិរញ្ញវត្ថុពីដៃគូអភិវឌ្ឍន៍ ប្រទេសជាមិត្តប្រតិបត្តិករបោសសម្អាតមីនជាតិ-អន្តរជាតិ វិនិយោគិន និងសប្បុរសជននានា ដើម្បីទទួលការគាំទ្រ និងធ្វើការបោសសម្អាត ដោយចាប់ផ្តើមពីភូមិមួយទៅភូមិមួយ និងពីខេត្តមួយទៅខេត្តមួយ ក្រោមការដឹកនាំ និងសម្របសម្រួលរបស់អាជ្ញាធរមីនហើយការប្រកាសភូមិអស់មីន ឬខេត្តអស់មីន ដែលត្រូវរៀបចំ និងទទួលស្គាល់ពីអាជ្ញាធរមីន ក្នុងនាមជាស្ថាប័នសាធារណៈរបស់រដ្ឋ និងជាសេនាធិការតែ ១ គត់ឱ្យរាជរដ្ឋាភិបាលក្នុងការគ្រប់គ្រង ដឹកនាំ សម្របសម្រួល និងត្រួតពិនិត្យវិស័យមីនទូទាំងប្រទេស។
លោកថ្លែងថា កម្ពុជា បានកំណត់នូវវិសាលភាព និងទំហំផលប៉ះពាល់យ៉ាងច្បាស់ ដោយសារគ្រាប់មីន និងយុទ្ធភណ្ឌមិនទាន់ផ្ទុះទូទាំងប្រទេស ដែលគិតត្រឹមឆ្នាំ ២០២១ កម្ពុជា នៅសល់ផ្ទៃដីមានមីន និងយុទ្ធភណ្ឌមិនទាន់ផ្ទុះសរុបចំនួន ២០១៧ គីឡូម៉ែត្រក្រឡា ក្នុងនោះផ្ទៃដីមានមីន ៧៨៨ គីឡូម៉ែត្រក្រឡា ដែលកម្ពុជាត្រូវបោសសម្អាតឱ្យអស់ត្រឹមឆ្នាំ ២០២៥ ដែលនៅសល់ក្នុងរាជធានីខេត្តចំនួន ២៣ ទៀត។
រាជរដ្ឋាភិបាលបានដាក់ចេញនូវផែនការប្រកាសរាជធានី/ខេត្ត ដែលមានផលប៉ះពាល់ដោយសារមីនតិចតួចចំនួន ៧ ជារាជធានី/ខេត្តអស់មីន រួមមាន ខេត្តព្រៃវែង (៣,៦ ហិកតា) ខេត្តកណ្តាល (៦,៥ ហិកតា) ភ្នំពេញ (១២៥ ហិកតា) ខេត្តកំពង់ចាម (១២៨ ហិកតា) ខេត្តព្រះសីហនុ (១៧៤ ហិកតា) ខេត្តរតនគិរី (៣៤០ ហិកតា) និងខេត្តតាកែវចំនួន (៣៦៣ ហិកតា)៕
.jpg)
