.jpg)
ផ្ទះប្រជាពលរដ្ឋខូចខាតដោយសារខ្យល់កន្ត្រាក់ នៅខេត្តបន្ទាយមានជ័យ កាលពីថ្ងៃទី ២៧ មីនា។ រូបថត 5th Military Region
បន្ទាយមានជ័យៈ កម្លាំងបញ្ជាការឯកភាពស្រុកភ្នំស្រុក និងស្រុកស្វាយចេកខេត្តបន្ទាយមានជ័យបាននិងកំពុងបន្តចុះជួយអន្តរាគមន៍ជួសជុលផ្ទះជូនពលរដ្ឋជាង ១០០ គ្រួសារដែលរងគ្រោះដោយសារភ្លៀងលាយឡំខ្យល់កន្ត្រាក់កាលពីល្ងាចថ្ងៃទី ២៧ ខែមីនា ឆ្នាំ ២០២២ ដែលបង្កឱ្យមនុស្សយ៉ាងហោចណាស់ ៦ នាក់ បានរងបួស និងខូចខាតផ្ទះសរុប ១១៦ ខ្នង។
លោក ប៉ិះ គឹមហ៊ាក់ អធិការនគរបាលស្រុកភ្នំស្រុកបានប្រាប់ភ្នំពេញប៉ុស្តិ៍នៅថ្ងៃទី ២៨ មីនាថា កាលពីល្ងាចថ្ងៃអាទិត្យមានភ្លៀងលាយឡំខ្យល់កន្ត្រាក់ ១ មេធំបានបក់បោកយ៉ាងខ្លាំងមកលើភូមិតេជោសន្តិភាពនៃឃុំប៉ោយចារ។ ហេតុការណ៍នេះបណ្ដាលឱ្យមនុស្សក្មេងចាស់ប្រុសស្រី ៦ នាក់ បានរងរបួសធ្ងន់ និងស្រាលដោយសារផ្ទះដួលរលំលើ ហើយផ្ទះចំនួន ១០៥ ខ្នងបានរងការខូចខាត ក្នុងនោះមាន ៣៩ ខ្នងបានខូចខាតទាំងស្រុង។
លោកបានបញ្ជាក់ថា៖ «កាលពីព្រលប់ថ្ងៃអាទិត្យ ក្រោយពីមានភ្លៀងខ្យល់រួច ខាងកម្លាំងសមត្ថកិច្ចយើងបានចុះទៅជួយអន្តរាគមន៍នាំជនរងគ្រោះទៅមន្ទីរពេទ្យ ដើម្បីព្យាបាលរបួស និងជួយរៀបចំរុះរើ និងប្រមូលឈើ និងស័ង្កសីនៃផ្ទះដែលបាក់បែកដើម្បីរៀបចំជួសជុលឡើងវិញ។ នៅព្រឹកថ្ងៃចន្ទ ក្រុមការងារបានចុះជួសជុលផ្ទះឡើងវិញជូនពលរដ្ឋបានជាង ២០ ខ្នង»។
បើតាម លោក គឹមហ៊ាក់ ក្រុមការងារនឹងបន្តចុះជួយជួសជុលផ្ទះជូនពលរដ្ឋដែលរងគ្រោះទាំងនោះជាបន្តទៀតនៅព្រឹកថ្ងៃទី ២៩ មីនា នេះនិងថ្ងៃបន្តបន្ទាប់ទៀតដើម្បីឱ្យគ្រប់គ្រួសាររងគ្រោះទាំងនោះមានជម្រកសមរម្យ និងប្រកបដោយសុវត្ថិភាព។
ចំណែកលោក លឿង សុភ័ក្ដិ អភិបាលស្រុកស្វាយចេកបានប្រាប់ភ្នំពេញប៉ុស្តិ៍នៅថ្ងៃទី ២៨ មីនាដែរថា ភ្លៀងលាយឡំខ្យល់កន្ត្រាក់ និងផ្គររន្ទះកាលពីល្ងាចថ្ងៃទី ២៧ ខែមីនា នោះ បានបង្កឱ្យមានការខូចខាតផ្ទះពលរដ្ឋនៅឃុំផ្គាំ ចំនួន ១១ ខ្នងដែលក្នុងនោះ មានផ្ទះ ២ ខ្នងបានដួលរលំខូចខាតទាំងស្រុង និង ៩ ខ្នងទៀត បានប៉ើងរបើកដំបូល និងជញ្ជាំងបន្តិចបន្តួច។ ប៉ុន្តែគ្មានពលរដ្ឋណាម្នាក់រងគ្រោះក្នុងហេតុការណ៍នោះទេ។
លោកបានថ្លែងថា៖ «កាលពីព្រឹកថ្ងៃចន្ទ ខ្ញុំបានដឹកនាំកម្លាំងបញ្ជាការឯកភាពស្រុកស្វាយចេកចុះទៅសួរសុខទុក្ខ និងជួសជុលផ្ទះឡើងវិញជូនប្រជាពលរដ្ឋរងគ្រោះទាំងនោះរួចរាល់ហើយ »។
ដោយឡែកអាជ្ញាធរឃុំជលសា ស្រុកជលគិរី ខេត្តកំពង់ឆ្នាំងវិញ ក៏បានរាយការណ៍ថា កាលពីថ្ងៃទី ២៧ ខែមីនា ឆ្នាំ ២០២២ ភ្លៀង និងខ្យល់កន្ត្រាក់បណ្ដាលឱ្យរបើកដំបូលផ្ទះរបស់ប្រជាពលរដ្ឋសរុបចំនួន ៩ ខ្នងផងដែរ៕
