ភ្នំពេញៈ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង ទទួលជួបលោក Takanobu Teramoto ប្រធានប្រតិភូបេសកកម្មដោយផ្ទាល់របស់អង្គការពលកម្ម-អន្តរជាតិ (ILO) ដើម្បីពិភាក្សាលើការវិវឌ្ឍវិស័យការងារ និងការគោរពសិទ្ធិសេរីភាពអង្គការវិជ្ជាជីវៈនៅកម្ពុជា។
ក្នុងជំនួបពិភាក្សា នាថ្ងៃទី ២៨ មីនា លោក អ៊ិត សំហេង បានជម្រាបជូនគណៈប្រតិភូ Takanobu Teramoto ថា ការគោរពសិទ្ធិ និងសេរីភាពអង្គការវិជ្ជាជីវៈត្រូវបានធានា និងលើកកម្ពស់ស្របពេលកម្ពុជាផ្សារភ្ជាប់ការគោរពលក្ខខណ្ឌការងារជាមួយពាណិជ្ជកម្មអន្តរជាតិ។
លោកបន្តថា ដោយអនុលោមតាមអនុសញ្ញាអន្តរជាតិខាងការងារលេខ ៨៧ ច្បាប់ស្តីពីសហជីព កម្ពុជាបានផ្តល់សិទ្ធិសេរីភាពយ៉ាងពេញលេញទៅកម្មករនិយោជិត និងនិយោជកក្នុងការបង្កើត និងអនុវត្តសិទ្ធិសេរីភាពអង្គការវិជ្ជាជីវៈដោយសេរី គ្មានការបង្ខិតបង្ខំ និងគំរាមកំហែង។ លោក អ៊ិត សំហេង ថ្លែងថា៖ «នៅក្នុងកម្ពុជា មិនទាន់ដែលមាន ហើយក៏នឹងមិនអនុញ្ញាតឱ្យមានករណីដែលកម្មករនិយោជិត ឬថ្នាក់ដឹកនាំសហជីពត្រូវបានចាប់ខ្លួន ឬធ្វើទុក្ខបុកម្នេញដោយសារសកម្មភាពស្របច្បាប់របស់ខ្លួនក្នុងការអនុវត្តសិទ្ធិសេរីភាព អង្គការវិជ្ជាជីវៈឡើយ»។
លោករដ្ឋមន្ត្រីលើកឡើងថា បេសកកម្មរបស់ប្រតិភូ ILO ពិតជាមានសារៈសំខាន់ មិនមែនសម្រាប់តែអង្គការអន្តរជាតិខាងការងារប៉ុណ្ណោះទេ ប៉ុន្តែវាក៏មានសារៈសំខាន់ សម្រាប់កម្ពុជាផងដែរ។ ព្រោះវា គឺជាឱកាសដែលក្រសួងពាក់ព័ន្ធ របស់រាជរដ្ឋាភិបាល និងដៃគូពាក់ព័ន្ធ ដែលរួមមានទាំងតំណាងអង្គការវិជ្ជាជីវៈ និងដៃគូសង្គមបានជួប និងសន្ទនាដោយផ្ទាល់ជាមួយគណៈប្រតិភូ ដើម្បីបង្ហាញអំពីការវិវឌ្ឍវិស័យការងារ ជាពិសេសការគោរពសិទ្ធិ សេរីភាពអង្គការវិជ្ជាជីវៈនៅកម្ពុជា។
លោកបញ្ជាក់ថា៖ «តាមរយៈការជួបពិភាក្សាជាមួយមន្ត្រីបច្ចេកទេសរបស់ក្រសួងការងារ និងបណ្តុះបណ្តាលវិជ្ជាជីវៈក្រសួងពាក់ព័ន្ធតំណាងអង្គការវិជ្ជាជីវៈ និងដៃគូសង្គមនាពេលបន្ទាប់នេះ គណៈប្រតិភូនឹងទទួលបាននូវព័ត៌មានត្រឹមត្រូវ គ្រប់ជ្រុងជ្រោយ និងយកទៅពិចារណា និងវាយតម្លៃប្រកបដោយសុភវិនិច្ឆ័យ ឈរលើមូលដ្ឋានច្បាប់ និងបទប្បញ្ញត្តិជាតិ និងអន្តរជាតិជាធរមាន»។
បន្ថែមពីនេះលោក អ៊ិត សំហេង បញ្ជាក់ ថា សម្រាប់ក្រសួងការងាររង់ចាំទទួលយកនូវអនុសាសន៍របស់បេសកកម្មដោយផ្ទាល់នេះ ដើម្បីកែលម្អលក្ខខណ្ឌការងារ និងសិទ្ធិសេរីភាពរបស់អង្គការវិជ្ជាជីវៈឱ្យកាន់តែល្អប្រសើរបន្ថែមទៀត ស្របតាមបរិបទសង្គម និងសេដ្ឋកិច្ចកម្ពុជា។
តាមរយៈជំនួបនោះ ក្រសួងការងារ ឱ្យដឹងថា ការប្រជុំពិភាក្សា និងប្រឹក្សាយោបល់គ្នាទៅវិញទៅមករវាងគណៈប្រតិភូជាមួយថ្នាក់ដឹកនាំរបស់ក្រសួងការងារ និងបណ្តុះបណ្តាលវិជ្ជាជីវៈមានការយល់គ្នាកាន់តែប្រសើរ ដែលគណៈប្រតិភូមានលទ្ធភាពធ្វើសេចក្តីសន្និដ្ឋានឱ្យគ្រប់ភាគីពាក់ព័ន្ធអនុវត្តឱ្យមានប្រសិទ្ធភាពខ្ពស់ពាក់ព័ន្ធនឹងទំនាក់ទំនងវិជ្ជាជីវៈ សិទ្ធិការងារ សេរីភាពអង្គការវិជ្ជាជីវៈស្របតាមច្បាប់ការងារ និងបទដ្ឋានអន្តរជាតិដែលកម្ពុជាបានផ្តល់សច្ចាប័នកាន់តែមានភាពល្អប្រសើរបន្តទៀត។
នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា ថ្លែងថា ដោយសារកម្ពុជាផ្តល់សច្ចាប័នទៅលើអនុសញ្ញាស្តីពីសិទ្ធិសហជីព ដូច្នេះហើយទើបប្រតិភូ ILO មក កម្ពុជា ដើម្បីពិនិត្យមើលថា តើកម្ពុជាអនុវត្តកាតព្វកិច្ចពេញលេញឬនៅ។
សម្រាប់លោកដែលធ្វើការលើសិទ្ធិការងារ មើលឃើញកម្ពុជាពុំទាន់ធានាការអនុវត្តសិទ្ធិរបស់សហជីពនៅឡើយទេ ខណៈសហជីពខ្លះកំពុងជួបបញ្ហាប្រឈម ក្នុងការសម្តែងមតិរបស់ពួកគេ។
លោកថ្លែងថា៖ «ទី ១ ខ្ញុំមើលឃើញបេសកកម្មរបស់ប្រតិភូរបស់ ILO គឺមកពិនិត្យមើលអនុសញ្ញាស្នូលលេខ ៨៧ ផ្តោតទៅលើសេរីភាពសហជីព ទី ២ ការអនុវត្តសិទ្ធិសេរីភាពសហជីពនៅស្រុកខ្មែរ នៅជួបបញ្ហានៅឡើយ។ បញ្ហាមួយចំនួនសំខាន់ៗ គឺរឿងការអនុវត្តច្បាប់របស់យើង សព្វថ្ងៃមានបញ្ហាប្រឈម។ មានន័យថា សហជីពដែលមាននិន្នាការគាំទ្រខាងកម្មករ ពិតប្រាកដតែងត្រូវបានរងគ្រោះ»៕