ភ្នំពេញៈ អាជ្ញាធរជាតិសំបូរព្រៃគុក គ្រោងនឹងចាប់ផ្ដើមដំណើរការក្នុងការជួសជុល និងសង្គ្រោះប្រាសាទគុក ឬប្រាសាទអាស្រមមហាឥសីនៅដើមខែមេសាខាងមុខ ហើយដែលនឹងបញ្ចប់នៅចុងឆ្នាំនេះ។ នេះបើតាមមន្ត្រីជាន់ខ្ពស់នៃអាជ្ញាធរជាតិសំបូរព្រៃគុក។
លោក ផាន់ ណាឌី អគ្គនាយកនៃអាជ្ញាធរជាតិសំបូរ-ព្រៃគុកបានប្រាប់ភ្នំពេញប៉ុស្តិ៍នៅថ្ងៃទី ២៨ ខែមីនា ថា យោងតាមខ្លឹមសារនៃអនុស្សរណៈយោគយល់គ្នាជាមួយរដ្ឋាភិបាលឥណ្ឌា កាលពីថ្ងៃទី ២៥ ខែមីនា ឆ្នាំ ២០២២ ប្រាសាទគុក ឬប្រាសាទអាស្រមមហាឥសី ដែលមានទីតាំង ស្ថិតក្នុងតំបន់ប្រាសាទសំបូរព្រៃគុកមានអាយុកាលជាច្រើនសតវត្សរ៍មកហើយ មុនសម័យអង្គរ ហើយត្រូវបានចាស់ទ្រុឌទ្រោមដោយសារគ្រោះធម្មជាតិ និងសកម្មភាពមនុស្សជាច្រើនជំនាន់កន្លងមកនោះនឹងត្រូវធ្វើការជួសជុលឱ្យមានភាពរឹងមាំល្អប្រសើរឡើងវិញនាពេលឆាប់ៗខាងមុខនេះ។
លោក ណាឌី បានបញ្ជាក់ថា៖ «គម្រោងជួសជុល និងសង្គ្រោះប្រាសាទគុក ឬប្រាសាទអាស្រមមហាឥសីនេះ នឹងត្រូវចំណាយថវិកាប្រមាណ ៥ ម៉ឺនដុល្លារអាមេរិក ដោយចាប់ផ្ដើមដំណើរការនៅដើមខែមេសាខាងមុខនេះ និងបញ្ចប់នៅចុងឆ្នាំ ២០២២ នេះ»។
បើតាមលោក ផាន់ ណាឌី រមណីយដ្ឋានសំបូរព្រៃគុកជាក្រុងបុរាណ ឦសានបុរៈ ដែលត្រូវបានសាងសង់ឡើងនៅសតវត្សរ៍ទី ៦ និងដើមសតវត្សរ៍ទី ៧ (ក្នុងសម័យចេនឡា) ដោយស្តេចឦសានវរ្ម័នទី ១ នៅសម័យចេនឡា។ នៅក្នុងរមណីយដ្ឋាននេះមានទីទួលបុរាណ និងប្រាសាទចំនួន ២៩៣ កន្លែង។ ក្រុមប្រាសាទស្ទើរតែទាំងអស់ក្នុងរមណីយដ្ឋានសំបូរព្រៃគុកជាប្រភេទសំណង់ដែលត្រូវបានសង់ឡើងពីឥដ្ឋ លើកលែងតែប្រាសាទគុក ឬប្រាសាទអាស្រមមហាឥសី ជាប្រភេទសំណង់ ដែលត្រូវបានសង់ឡើងពីថ្មភក់។ ប្រាសាទនេះមានរចនាប័ទ្មស្រដៀងគ្នាទៅនឹងប្រាសាទមួយចំនួនរបស់ប្រទេសឥណ្ឌា ទើបធ្វើឱ្យភាគីឥណ្ឌាចាប់អារម្មណ៍ និងបានចុះអនុស្សរណៈដើម្បីគាំទ្រលើគម្រោងជួសជុលប្រាសាទនេះ។
លោកបានបន្តថា នៅពេលនេះ ក្រុមជំនាញការនៃប្រទេសទាំង ២ (កម្ពុជា-ឥណ្ឌា) កំពុងពិភាក្សាគ្នាលើកិច្ចការបច្ចេកទេសមួយចំនួន ដើម្បីកំណត់ពេលវេលាសមស្របណាមួយ សម្រាប់ការចាប់ផ្ដើមដំណើរការអនុវត្តគម្រោងជួសជុល និងសង្គ្រោះប្រាសាទដ៏មានវ័យចំណាស់នេះ ។
ចំណែកលោក ច័ន្ទ វិត្ថារ៉ុង ប្រធាននាយកដ្ឋាន រមណីយដ្ឋានបុរាណវិទ្យា និងអភិរក្សនៃអាជ្ញាធរជាតិសំបូរព្រៃគុកបានប្រាប់ភ្នំពេញប៉ុស្តិ៍ដែរថា បន្ទាប់ពីការដាក់បញ្ចូលតំបន់ប្រាសាទសំបូរព្រៃគុកទៅជាសម្បត្តិបេតិកភណ្ឌពិភពលោក កាលពីឆ្នាំ ២០១៧ មកនោះ អាជ្ញាធរជាតិសំបូរព្រៃគុក បានធ្វើកិច្ចការសំខាន់ៗជាច្រើន។ ក្នុងនោះ អាជ្ញាធរជាតិសំបូរព្រៃគុកបានរៀបចំស្លាកសញ្ញាបង្ហាញទិសច្រកចូលប្រាសាទ បន្ទប់ទឹកចំនួន ៣ ទីតាំង កែលម្អកន្លែងអាហារដ្ឋានឱ្យមានរបៀបរៀបរយ និងសណ្តាប់ធ្នាប់ល្អនៅមួយកន្លែង។
លោកបានថ្លែងថា៖ «ទន្ទឹមនឹងនេះ ក្រុមការងារយើងបានសិក្សាចងក្រងផែនទីហានិភ័យនៃប្រាសាទនីមួយៗ និងបានជួសជុលប្រាសាទដែលមានហានិភ័យខ្ពស់មួយចំនួនឱ្យមានភាពរឹងមាំល្អប្រសើរឡើងវិញផងដែរ ក្រោមការចូលរួមត្រួតពិនិត្យ និងផ្ដល់ប្រឹក្សាយោបល់ផ្នែកបច្ចេកទេសពីគណៈកម្មការ ICC Angkor»។
បើតាមប្រសាសន៍ លោក ច័ន្ទ វិត្ថារ៉ុង ប្រាសាទគុក ឬប្រាសាទអាស្រមមហាឥសី គឺជាប្រាសាទ ស្ថិតក្នុងហានិភ័យមធ្យមក្នុងចំណោមប្រាសាទ ដែលត្រូវបានសាងសង់ពីថ្មភក់ ដែលមាននៅក្នុងតំបន់រមណីយដ្ឋានប្រាសាទសំបូរព្រៃគុក៕